الموضوع: مقارنة قياده بين مازدا 3 الجديده والالنترا الجديده

بسم الله الرحمن الرحيم

مقارنة قياده بين مازدا 3 الشكل الجديد وهيونداي النترا الشكل الجديد
المقارنه بما يرضي الله لأفادة اي حد ناوي يشتري
انا امتلك السيارتين مازدا 2010 ب 127 ونص بيزك
النترا 2012 ب 126 اول فئه اوتو

1- التصميم الخارجي : اذواق

2-الانتيريور : برضو اذواق :) الاتنين ممتازين بصراحه وان كانت المازدا خامات الابواب افضل واطري

3- الراحه والجلوس : ممتاز في الاتنين داخل البلد بس كل عربيه ليها ميزه عن التانيه
-الالنترا اوسع بفرق مش قليل
-المازدا مريحه جدا علي السرعات في السفر والطرق الغير ممهده
الكنبه في المازدا اكثر راحه في الجلوس والالنترا برضو مريحه جدا

4- العفشه : المازدا افضل واطري
الالنترا جيده ولكن ناشفه شويه هي بتفكرني الي حد ما بالسيراتو ولكن اطري منها

5-الموتور: الالنترا متورها صامت تحس انك ماشي بسياره بالكهرباء مع القرص صوته بيعلي والموتور سحبه كويس جدا حتي مع التكييف
المازدا صوته رياضي رائع طلعته من الثبات اقوي من الالنترا لكن عامة محستش بالفرق الشاسع في عدد الاحصنه فرق 23 حصان لصالح الهيونداي السحب تقريبا واحد مع ميزة السكون للصوت في الالنترا وميزة الطلعه الاقوي في المازدا

6-الجير بوكس ممتاز في الاتنين لاتشعر بالنقلات ولكن الالنترا 6 نقلات والمازدا 4

7-الفرامل :المازدا فراملها ممتازه جدا وقادره علي ايقاف السياره في اي ظرف
الالنترا >>مش عارف حاسس الفرامل غريبه شويه بس هي مع التعود بتبقي كويسه اولا مشوار البدال قصير وثانيا قوة الفرامل مش متوزعه علي مشوار البدال هي متجمعه في نهاية البدال ولازم تدوس جامد
الفرامل افضل في المازدا

8-استهلاك البنزين : محسبتوش بالضبط ولكن الالنترا افضل بفرق مش كبير

9-الثبات: المازدا افضل وحتي في المنحنيات المازدا ماسكه نفسها الالنترا بحس ان ضهرها بيلعب

10- الكماليات: طبعا الاتنين فيهم الكماليات العاديه باور سنتر وتكييف وزجاج كهربائي ومفتاح فولد و مرايات كهرباء
الالنترا تزيد طاره مالتي للكاسيت ووظايف العداد وفيها خاصية الايكو اللي بتقفل تلقائي مع الشد والجري وفوانيس شبوره اماميه

المازدا تزيد فوانيس اماميه عدسات مع موتور تحريكها للاعلي والاسفل _ الاربعه زجاج اوتو اب اند داون -ايموبيلايزر - فرامل abs ebd - الشنطه علي 2 مساعدين

11- التكييف ممتاز جدا في الاتنين

12-الباور: في الالنترا مياه بمعني الكلمه وطبعا بيتقل مع السرعات وبيزيد لحد السرعات العاليه بيتقل قوي طبعا مريح جدا في الركن لكن في الزحمه بيقلقني شويه
لالمازدا الباور خفيف لكن مش زي الالنترا بيتقل مع السرعات ومريح في السرعات المنخفضه
الالنترا ميزتها في الركن تدوره بصباعك الصغير والمازدا ميزتها في الزحمه بتتحكم في العربيه بشكل افضل

13- متعة القياده : المازدا ثم المازدا ثم المازدا قياده رياضيه وتعليق ممتاز جدا وتحكم كامل في السياره تحس انها جزء منك بجد متعه لم اجدها حتي في الفنتازيا معرفش هي فيها ايه بيخليها ممتعه كده !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !

14- قيمه مقابل السعر : المازدا افضل كقيمه مقابل السعر ولكن المشكله في سعر اعادة البيع ولكن بصراحه اللي يجربها مش هيفكر يغيرها

15-نفس التوكيل

16-السياره في كلمه :
الالنترا : سياره اقتصاديه جيده لكن يعيبها الاهتمام بالشكل اكثر من المضمون

المازدا : رياضيه ممتعه بكل ماتحمل الكلمه من معاني

17- الالنترا : 7.5 من 10

المازدا 9 من 10

اي استفسار انا في الخدمه
في حالة النقل ارجو ذكر المصدر