تكلفة بناء دور ارضى + اول علوى على مساحة 105 متر كام؟

**mohaismail** · 09-09-2011 11:22 PM

سلام عليكم
لو حد عنده خبره فى موضوع المبانى او لو مهندس مدنى او مقاول فاهم يريت يفيدنى
دالوقتى عندنا بيت على مساحة 105 متر بس قديم بدون عواميد يعنى مبنى بالطوب بس بس طوب زمان غير طوب دالوقتى خالصوالبيت دلوقتى 3 ادوار (ارضى+اول علوى+تانى علوى+السطح)
وان شاء الله هنهد البيت ونبنيه من الاول وهيبقى دور ارضى +دور اول علوى فقط مع امكانيه زيادة دور كمان فى المستقبل
عايز اعرف حدود الميزانية هتكون كام بالتفصيل يعنى عاوز نوصل لمرحلة المحارة وبعد كده نتكلم فى التشطيب لوحده
ياريت اعرف تكلفة بناء الدور الارضى والاساسات كام + تكلفة الدور الاول علوى هيكون كام
لحد مرحلة المحارة(نص تشطيب).
نخش على التشطيب
عاوز اعرف سعر متر التشطيب للسوبر لوكس والهاى لوكس كام وايه الفرق بينهم ؟
حاجة اخيرة
هل الهدم والبناء محتاجة تراخيص جديدة وورق جديدة مع ان البيت الحالى مرخص وكل حاجة ؟ مع العلم ان رسم البيت وتقسيم الشقة هيتغير تماما..

معلش طولت عليكم بس ياريت حد يفيدنى عشان ميضحكش عليا فى الموضوع ده وجزاكم الله خيرا

**mohaismail** · 10-09-2011 06:53 PM

حد عنده فكرة

**abokoko** · 10-09-2011 07:22 PM

اصبر وهيكون فى ردود كتير
بس يفضل تزودهم بالمعلومات زى مكان المنزل القاهره ولا محافظه اخرى
لانى المبانى فى القاهرة هتختلف عنها فى الريف عنها فى المدن الساحليه
والرخصة هتكون كام دور مع العلم انها متوقفه على عرض الشارع

**mohaismail** · 10-09-2011 08:46 PM

فى الشرقية

**hugan** · 10-09-2011 08:54 PM

بالنسبه للمساحه بتاعتك
لاني لسه باني من حوالي 3 سنوات في العاشر لكن اكبر شويه بسيطه
قواعد وسملات
من 20الي 25 لكن لو ها تخف في الحديد ممكن اقل
العمدان 17 عمود
من 12 الي 10وممكن اقل
بلاطه السقف
18 الي 20
يعني محتاج 50 حتي الدور الارضي

**mohaismail** · 10-09-2011 09:26 PM

انتوا متأكدين من الارقام دى ى جماعة ؟
انا سامع ارقام تانية خالص !!!!!!!!!
الاساسات وتقفيل الارضى بدون تشطيب 90 الف !!!!
ودور اول علوى 50 الف بدون تشطيب !!!!!

**محمد عز** · 10-09-2011 09:52 PM

الدورين يكلفوك حوالى ١٥٠ الف جنيه نص تشطيب تقريبا.

**hussein** · 10-09-2011 09:59 PM

اولا الاساسات عايزه كام دور وطبيعة الارض ايه؟ يعنى طين ولا رمل ولا صخر
فى مياه فى الاساسات ولا لأ
هنفترض انك هتعمل اساست 4 ادوار مثلا وتربه طينينة جيده او رملية فتعمل قواعد وسملات كويسة
الاساسات تتكلف فى حدود 30 الف
الدور بالاعمده يتكلف فى حدود 30 الف (خرسانات فقط)
تكلفة المبانى الطوب حوالى 7 الاف جنية بالمصنعيات للدور الواحد بفرض ارتفاع الدور 3 م
يبقى الاجمالى لحد دلوقتى 104 الف جنيه غير الهدم والحفر و التشطيب
المفروض طبعا لازم تصريح هدم و رخصة جديده وعك كده لو تقدر تظبط امورك اشتغل على كده و لما تخلص ركب العدادا القديمة تانى ويبقى بعدت عن الحى والكهربا خالص

**mohaismail** · 10-09-2011 10:10 PM

المشاركة الأصلية كتبت بواسطة hussein

اولا الاساسات عايزه كام دور وطبيعة الارض ايه؟ يعنى طين ولا رمل ولا صخر
فى مياه فى الاساسات ولا لأ
هنفترض انك هتعمل اساست 4 ادوار مثلا وتربه طينينة جيده او رملية فتعمل قواعد وسملات كويسة
الاساسات تتكلف فى حدود 30 الف
الدور بالاعمده يتكلف فى حدود 30 الف (خرسانات فقط)
تكلفة المبانى الطوب حوالى 7 الاف جنية بالمصنعيات للدور الواحد بفرض ارتفاع الدور 3 م
يبقى الاجمالى لحد دلوقتى 104 الف جنيه غير الهدم والحفر و التشطيب
المفروض طبعا لازم تصريح هدم و رخصة جديده وعك كده لو تقدر تظبط امورك اشتغل على كده و لما تخلص ركب العدادا القديمة تانى ويبقى بعدت عن الحى والكهربا خالص

الاساسات ل
3 ادوار يعنى ارضى واول علوى وتانى علوى
الارض رملية
ال 104 الف ده اجمالى الدور الارضى بدون تشطيب ؟ ولا ارضى واول علوى بدون تشطيب ؟
وياريت تقولى تقفيل الارضى بالاساسات بكل حاجة بتاعته كام لوحده والاول علوى كام لوحده وطبعا بدون تشطيب يعنى عاوز التكلفة لحد ما اوصل لمرحلة المحارة فقط لانى عاوز اعرف الاسعار التقريبية قبل ما ابدأ ان شاء الله واكلم الناس تبدأ شغل