الموضوع: شنط المدارس غاليه جدا

السلام عليكم يا شباب

امبارح ام البنات قعدت تزن عشان ننزل نجيب شنطة المدرسه عشان لوجي حبيبتي

المهم كنت سمعت ان كارفور عامل عروض

قلت احسن حاجه عشان بعيد عن الزحمه و البهدله

نار يا حبيبي نار

ده انا اللي بغني الله يرحمك يا حليم (يا تري الشنط كانت بكام علي ايامك)

الاسعار من 130 ل 200 جنيه

الحمد لله مفيش حاجه عجبت لوجي بست ايدي شعر و دقن فلوسك حلال يابوحميد

المدام قالتلي بما اننا في كارفور نجيب شوية طلبات للبيت قلت و ماله

حاجات بسيطه كده شوية جبن و كورن فليكس علي كام كيس شيبسي حسبة 600 جنيه

فلوسي حلال والله

الرجاء يا جدعان اللي يعرف مكان اجيب منه شنطة لوجي يقوللي

وربنا يبعدكم عن كارفور

المشاركة الأصلية كتبت بواسطة ayman-ahmed

فى مكان اسمه حارة الشنط وده فى العتبة او الموسكى مش عارف بصراحة ولكن بيتميز باشكال وانواع كتير والاسعار حنينة خالص.لاننى عارف ناس بتجيب منه ولكن للاسف معرفش فين بالظبط.

انا بجيب من هناك على فكره على طول و مش بقتنع بحاجه اسمها اجيب شنطه لطفل بـ 100 جنيه لانه هيقطعها و يبهدلها فى اول اسبوع للمدرسه

السنه دى جبت شنطه للأستاذ عبدالله شكلها تحفه بـ 40 جنيه بحالهم و كنت شفت زيها فى التوحيد و النور بـ 70 جنيه و جبت شنطه صغيره و دينر بوكس لحضانه للاستاذ يوسف بـ 70 جنيه بس طبعاً لازم تفاصل و تعرف تنقى الحاجه اللى هتشتريها كويس و تجرب السوست

الحاره دى تحفه و هى اللى فيه مصانع وورش الشنط اللى بتتباع فى كل حته فى البلد من اول محلات وسط البلد و كارفور و كل المولات الراقية حتى اللى بيبيعوا على الرصيف و كل خامه و شكل و حاجه لها تمن طبعاً

اللى عايز يروح هناك مع العيله و الولاد ممكن يركن العربيه فى جراج مول اسمه وكاله الازهر بعد الموسكى (هتطلع كوبرى لو جاى من ناحيه العباسيه و باب الشعريه و تلف شمال من امام مديريه امن القاهره هتلاقيه على يمينك او هتلاقيه على طول لو جاى من ناحيه السيده زينب) الساعه هناك بـ 2.5 و الركنه امان جدا جدا و قريبه للموسكى جدا جدا هتتمشى على رجلك على طول 3 دقايق تعدى اشاره التقاطع هتلاقى الموسكى متقاطع مع الشارع يمين و شمال هتعدى الناحيه التانيه و تخش فى الشمال و بعدها تدخل اول حاره شمال هى دى ...

او فيه طريق تانى تركب المترو و تنزل محطة مترو العتبه و تخرج من جراج العتبة و تسأل عن الموسكى الف من يدلك هو بينه و بين مخرج المترو 5 دقائق تقريباً هتمشى على طول فى الموسكى لا تحود يمين و لا شمال لغايه لما تلاقيك خلصت الموسكى و طالع على ش بورسعيد خش الحاره اليمين قبل ما تطلع على ش بورسعيد هى دى حاره الشنط ...