الموضوع: أرجو ممن يشتكون من مشكلة الحرارة من الدواسات المشاركة

هى مشكله بسيطه وبتتحل فى دقايق فى التوكيل

هي ديه بقى فعلاً المشكلة اللي مضايقاني

الحرارة عند الدواسات حتى بعد ما ركبوا العازل المكون من قطعتين واحده عامله زي الفويل بتاع المطبخ و التانية عامله زي الموكيت

و كمان سخونة الكونسولة لدرجة أني لو حطيت بيبسي كان لمدة ربع ساعة و أنا سايق بلاقيها سخنت جداً و قولتهم عليها كذا مره في التوكيل

يا ريت تقولنا تجربتك عشان أخلص من الحوار ده

انا فعلا كانت عندي نفس المشكلة بس بعد ما ركبوا العاذل زالت المشكلة تماما واظن ان المشكلة دي زالت تماما في الموديلات من اول 2011

يعني المشكلة عندكوا يا وحوش عند دواسات السائق بس لكن مش موجودة عند دواسات الكرسي اليمين ولا الكونسولة بتسخن معاكوا (ممكن تلاحطوا الكلام ده لو حاطط موبيلك مثلاً أو أي مشروب ساقع في الكونسولة بتلاقيهم سخنوا جامد) ؟

المشاركة الأصلية كتبت بواسطة eng_mido9

موضوع السخونه من الدوسات ده مش باخد بالى منه بس انا عندى فعلا الكونسولة بتسخن جامد لانى كنت بسيب فيها الموبايل ولسه واخد باللى من الموضوع ده من يومين ان الموبايل بيسخن جامد (على فكرة ده غلط على الموبايل لان السخونة الجامده دى تبوظه ) هل فى حل للموضوع ده؟

أيـــــــوه هو ده اللي بيحصل معايا ، و كمان ممكن تجرب لو حطيت بيبسي أو عصير هتلاقيه سخن بسرعه

السلام عليكم،
صحيت من النوم بعد مشوار حماية المستهلك وآديني هكتبلكم القصة من طقطق لغاية دلوقتي، ﻷنها لسة ما وصلتشي سلامو عليكوا!

من أول ما اشتريت العربية في شهر نوفمبر 2010 وهي موديل 2011 وانا شاعر بالحرارة اللي بتخرج من عند الدواسات وبتنبعث في الكونسول، حرارة مزعجة جدا.
وضحت الموضوع ده وطلبت اتخاذ اجراء بخصوصه في صيانة ال 5000 ولما جيت استلم العربية لاقيتهم حطين حتتة لباد اكبر من كف الإيد شويتين عند خلفية الكونسول جنب دواسة البنزين بحيث تغطي ماسورتين الومونيوم لونهم فضي جنب دواسة البنزين. - انظر الصورة التالية:

وقالوا إنها هتحل المشكلة.
طبعا المشكلة ما اتحلتشي خالص ﻷن الماسورتين اللي في الصورة وبالذات الماسورة اللي تحت، هم اللي بيدخلو الحرارة الفظيعة دي جوة الصالون، ويقدر أي حد فيكوا يجرب الحكاية دي، يعني بعد ما تمشي بالعربية شوية وتسخن كدة، جرب حط إيدك على الماسورة دي - حط إيدك بحذر ﻷنها ممكن تحرق إيدك لو العربية دايرة من زمان -.

المهم اشتكيت إلى جهاز حماية المستهلك من الموضوع ده، وبعد اتصال منهم طلبوا مني ارسال فاكس فيه صورة رخصة العربية و ورقتين تانين كدة موش فاكرهم، وبعدها بشوية لاقيت الاستاذ عمرو ابوالفتوح -مدير خدمة عملاء EIM - اتصل بيا وقالي إن المشكلة سهلة وهنحلهالك. واتفقنا على ميعاد، وروحت التوكيل في العبور وتكرر اللي حصل في صيانة ال 5000 حطوا حتة لباد تانية في نفس المكان، بس اكبر من اﻷولانية.

بعدها اتصل بيا جهاز حماية المستهلك وقالي رأيك إيه؟ هل الموضوع اتحل بالنسبة ليك ام لا؟ فقلتلهم لاء لسة فيه حرارة. ده كان آخر اتصال من جهاز حماية المستهلك وكان قبل رمضان اللي فات بحوالي اسبوع تقريبا.

اول امبارح الأحد اتصل بيا الجهاز وقالي إن فيه لجنة يوم الاتنين - امبارح - والمفروض احضر فيها علشان هتناقش معهم في المشكلة وهيفحصوا العربية في مقر الجهاز 96 شارع احمد عرابي المهندسين.

بالفعل روحت امبارح على الميعاد ودخلت اللجنة وكان هناك الاستاذ عمرو ابو الفتوح. وهو قال إن تصميم العربية كدة ﻷنها تصميم اوروبي وإن المية الدافية بتدخل المواسير اللي موجودة في الصورة اللي فوق جنب الدواسات وأقنع اللجنة بإن إحساسي بالحرارة ده احساس فردي ممكن يتغير من شخص للتاني وإنهم لا يمكن يغيروا في تصميم العربية وإن اللباد ده هو اقصى إجراء ممكن يعملوه للتقليل من الحرارة. واضاف إنهم باعوا حوالي 15000 عربية وما اشتكاش من الموضوع ده سوى 200 للتوكيل وإن اللباد اللي ركبوه حل مشكلتهم وما حديش تقريبا بيشتكي غيري انا.

عضو من اللجنة عقب، على إنهم ما يقدروش يطلبوا تعديل في تصميم العربية من حاجة ما بيشتكيش منها سوى قلة من المستخدمين وان ما فيش داعي لفحص العربية لإن مندوب الشركة أقر بالموضوع وموش نفاه! وتكرموا وادوني رقم الشكوى المسجل عندهم وقاللولي لوة لاقيت عربيات لوجان تانية مافيهاش المشكلة دي خالص وعربيتك هي اللي فيها الموضوع ده لوحدها او لو لاقيت عربيات تانية كتير الموضوع ده بيمثل مشكلة لاصحابها واشتكوا ممكن تشتكي من جديد وتذكر رقم شكوتك القديم في الشكوى الجديدة.


طبعا انا لي تعليقات على اللي دار في اللجنة من الاستاذ عمرو ابوالفتوح، كان كل كلامه شفوي، بمعنى انه ذكر ان ده تصميم في العربية وما جابش معاه اي رسوم او مستندات من قبل الشركة المصنعة تؤكد الموضوع ده، مع العلم إن العربية دي بتتصنع في امريكا اللاتنينة وبتتوزع هناك تحت اسم نيسان. وبرضه مصنع ماهيندرا في الهند بيجمعها. كل دي مناطق حارة.
برضه حضرته ما ذكرشي ايه هي حدود الانبعاث الحراري اللي بيقرره التصميم اللي بيقول عليه.

الماسورتين اللي موجودين في الصورة يا سادة دول داخلين من دورة تبريد العربية للصالون انظر الصورة التالية:

وهو ده اساس المشكلة ولازم يتحل.

الخلاصة دلوقتي يا جماعة: أي حد عنده شكوى من الموضوع ده - تتأكد منها نهائيا من انك تحط ايدك على الماسورة اللي في الصورة اﻷولى عند الدواسة لاقيتها سخنة وبتلسع ايدك تبقى المشكلة موجودة - ارجو وبسرعة يتقدم بشكوى إلى جهاز حماية المستهلك.
موقع جهاز حماية المستهلك: ط¬ظ‡ط§ط² ط.ظ…ط§ظٹط© ط§ظ„ظ…ط³طھظ‡ظ„ظƒ
فاكس جهاز حماية المستهلك: 35380384