لمبة الزيت مش بتطفي

**shaddadfalcon1** · 15-09-2011 01:50 PM

البارح بعد مادورت العربيه الصبح لمبة الزيت فضلت منوره قمت مطفي العربيه ومدور تاني قامت طافيه
وانا راجع من الشغل علي الزراعي هديت عند كمين قامت منوره وبعد مامشيت طفت تاني

النهارده الصبح كل ماادور العربيه تفضل منوره لحد تقريبا رابع مره ابطل وادور قامت طافيه
طلعت الزراعي بعد حوالي 10 كيلو قامت منوره - ابطل وادور مفيش فايده
رحت بها من كفرالدوار لحد العامريه رايح جاي وهي منوره
علما باني الصبح كاشف علي الزيت ومظبوط وانا لسه مغير زيت من 1200 كيلو شيل الاصفر والفلتر بقاله 5000 كيلو

كلمت الميكانيكي قالي غير فلتر الزيت وذود ربع كيلو ولو عملت تاني ابقي هاتها ابص عليها

الحراره مظبوطه ومفيش اي ريحه غربيه ومفيش تاثير علي السحب يعني العربيه ماشيه عادي خالص

دلوني الله يكرمكم وهل غلط اني امشي بها كده ولايه

ولو كانت طرمبة زيت مثلا سعرها كام

**tarek_2005** · 15-09-2011 02:11 PM

طالما سافرت بها وربنا سترها معاك دا مكنة الزيت بايظة وهي المسئولة عن طفي اللمبة والكهربائية بيسموها (( ساعة الزيت )) غيرها والدنيا هتبقي تمام

**shaddadfalcon1** · 15-09-2011 02:37 PM

المشاركة الأصلية كتبت بواسطة tarek_2005

طالما سافرت بها وربنا سترها معاك دا مكنة الزيت بايظة وهي المسئولة عن طفي اللمبة والكهربائية بيسموها (( ساعة الزيت )) غيرها والدنيا هتبقي تمام

طيب دي ايه تاثيرها لو متغيرتش دلوقتي؟

**tarek_2005** · 15-09-2011 03:41 PM

ممكن يحصل مشكلة لاقدر الله في دورة زيت المحرك وانتا فاكر انها مكنة الزيت بايظة وتمشي بالعربية وتحرق الموتور لاقدر الله
لمبة الزيت لو نورت المفروض انك لا تحاول ادارة المحرك مرة ثانية الا بعد معرفة السبب واصلاحه موضوع سفرك واللمبة منورة دا مش عايز اقول حاجة ااخذ عليها بس اكتفي بانك خاطرت مخاطرة كبيرة جدا بحياتك وبالسيارة الي انتا راكبها
لانك لاقدر الله لو عيب فلتر مسدود مثلاً كان الموتور هيقفش منك والله اعلم انتا هتبقي ماشي ساعتها علي سرعة كام وفي انهي حارة وحالة الطريق حواليك ايه

لمبة الزيت لا يتم التهاون في التعامل معها ويجب اصلاح العطل قبل التفكير في ادارة محرك سيارتك مرة اخري

**shaddadfalcon1** · 15-09-2011 04:02 PM

شكرا ليكم
ان شاء الله معلش بقي هروح بيها علي الميكانيكي وده مشورا 25 كيلو بس علي الزراعي فباذن الله هحاول امشي بيها براحه

**shaddadfalcon1** · 15-09-2011 04:03 PM

بس هو فعلا ممكن يكون فلتر؟ اصله بقاله يادوب 5000 ومحلصتش قبل كده خالص

**shaddadfalcon1** · 15-09-2011 04:13 PM

المشاركة الأصلية كتبت بواسطة ahmed_mido1889

ممكن طرمبه الزيت ضعيفه لو بتنور في السلانسيه فقط

لا دي دلوقتي منوره علي طول في السلانسيه والطوالي

**shaddadfalcon1** · 15-09-2011 04:20 PM

سعرها كام ياجماعه وازاي اتاكد انها طرمبة الزيت

**shaddadfalcon1** · 15-09-2011 10:03 PM

رحت بنزينة موبيل اللي في سموحه اغير فلتر والصنايعي قالي ابص عليها الأول ونزل تحتها شال فيشه قالي اللمبه منوره قلت لا وفضل يعمل شوية حاجات وقالي دي ساعة الزيت عايزه تتغير

اشتريت واحده وانا مروح ب 30 جنيه بس لسه مركتهاش