الموضوع: استفسار مهم جدا بخصوص كورولا 2006

سلام عليكم
اخواني في الاول انا اسمي محمد
ومعايا عربيه نيسان صني 2010 وطلعت عيني وعين كل واحد اعرفه في حياتي ...
بس اكتر حاجه احب اقولها في حق العربيه دي انها كانت بتجيب 200 كسرعه ولا بحس بالسرعه دي لحد اخر شهرين والسبب التوكيل وهو السبب في اني قفلت من العربيه ومن النيسان كلها
المهم بقي
انا في صحبي الانتيخ بقي معاه تيوتا كورولا 2006 اوتوماتيك
المهم العربيه صيانتها كلها في التوكيل حتي بعد الضمان
وبالظبط الي حصل في العربيه انها مره اتخبطت من الجمب وهي واقفه وغيرلها البابين في التوكيل
ومره تانيه الكبوت اتخبط وصلحه برا عند راجل محترم انا صلحت خبطه في عربيتي ومش باينه خالص عند نفس الراجل
وفي كم خدشه كده بسيطه وهو مصلحها بردوا عند الراجل ده
وفيها كسر بسيط في الفانوس الخلفي بس هو كويس وازازه كويس بس فيه زي حفره صغيره فيه
وفيه نقره بسيطه بردوا بسبب الظلط الي علي الطريق في الازاز الي قدام ومفيش فيه شروخات
واخر حاجه انه كشف عليها من شهر واتلاقي ان المساعد الامامي يمين مكسور وغيره باستيراد وبقت تمام بس انا مشفتهاش من اخر مره
بس هو محافظ عليها جدا وهادي في سواقته
هو عارضها علي 115
وممكن اوصلها ل 110
انتم ايه رايكم
مع العلم اني هبيع عربيتي خلاص لاني اتخنقت من اي حاجه تخص نيسان من بعيد او قريب

فانتم شايفين السعر كده كويس ولا عالي وارجو نصائحكم
انا محتاج العربيه علشان
بحبها جدا وبعشق صوتها ونعومتها وشكلها الخرافي بالنسبالي وصالونها الواسع علشان عيله هتستخدمها
المهم انا سواقتي هاديه بس متسرع يعني انا كنت بالصني بجيب 200
بس بالكورولا مش هجيب حاجه زي كده يعني اخري بتاع 130 او 140
المهم انا هستخدمها في سفر من اكتوبر للمنصوره مره في الاسبوع ومن اكتوبر للقاهره يوميا
وممكن اسكندريه مره كل شهرين ولا حاجه
يوميا بقطع بتاع من 150 ل 250 كيلو ده لو في القاهره لكن لو هسافر ممكن تكون 500 كيلو
فعايز رايكم هل العربيه دي هتنفعني ولا اعمل ايه لاني الحقيقه مش هقدر اغير بعدها الا بزمن ان شاء الله فعايز نصيحتكم لاخوكم الصغير وجزاكم الله خيرا جميعا
وتقبلوني بقي عضو في القسم بتاعكم