الموضوع: مقارنة طويلة شوية معلش استحملونى !!

اولا السلام عليكم ورحمة الله وبركاتة

ثانيا : انا محتار جامد اشترى اية فى رينج الفلوس اللى معايا 27-30 الف

اسلوب القيادة : عنيف الى حد ما مابنقلش الا على 4000-5000 ار بى ام مثلا (يعنى عايز عربية تستحمل غشامتى فى السواقة )

الكماليات : مش مهمة اوى بالنسبة لى لانى متعود على القديم سوقت (لادا -131 -متسوبيشى جالانت ) بس ياريت يكون فية تكييف بس
قطع الغيار :اهم حاجة تكون متوفرة وسعرها معقول لانى اتقرصت جامد فى الجالانت اللى كانت معايا فى موضوع توافر وسعر قطع الغيار دة
سعة الموتور واستهلاك البنزين : مش فارقة معايا نهائى لانى مشاويرى قليلة جدا ومابسافرش بالعربية


المقارنة هنا مابين عدد كبير شوية هى ما بين 6 عربيات

ورينج سعر 27-30 الف
1-هيونداى اكسيل ناعمة قوى ومريحة جدا فى السواقة بس حاسس انها حريمى ماتستحملنيش
2-جولف 2 خايف من قطع غيارها
3-فيات تمبرا سوقت منها ال 1400 وبصراحة ممتازة عاملة زى الدايو بس برضو موضوع قطع الغيار وعايزة ميكانيكى بيفهم فيها ووجع دماغ

4-سيات ابيزا ماعرفش عنها اى حاجة

5-دوجان سبب اختيارى ليهاانها كارونة وانا عاشق للعربيات الكارونة وغير كدة قطع غيارها ببلاش تقريبا زى ال 128

6-سوزوكى سوفت ماعرفش عنها حاجة برضو
انا عارف ان العربية حالة اولا واخيرا بس انا عايز احدد الاول انابدور على اية وموضوع الحالة دة ليا ناس الحمد لله حتخدمنى فى الموضوع دة بس اهم حاجة ارسى على اختيار الاول

أنصحك بالآكسيل عربية محترمة بس دور على حالة نظيفة ثم دوجان
والله الموفق والمستعان