الموضوع: طريقة ضبط كاربراتير السيارة .. " خصوصا الريجاتا "

السلام عليكم

حبيت اكتب الموضوع هنا تانى برة رابطة الريجاتا حتى يصبح مرئى للجميع بشكل افضل
ولا ينحصر على اعضاء الرابطة الكرام



الصورة بالاعلى لكربراتير ريجاتا .. لو الصورة مش واضحة هصورها تانى ولا مشكلة ف ذلك
ووضعها على سيرفري عشان متتمسحش ولضمان وجودها

الاول هنتعرف على اجزاء الكربراتير من الخلف .. وبعد كدة ندخل لمرحلة الضبط :

رقم 1 : خاص بمسمار السلانسية وهو نفسة البنزين
هتلاحظ ان فية سوستة حلزونية او دائرية خلفة وظيفتها هي الضغط على المسمار
لكى يقوم برفع قطعة معدينة تحدد مسافة ذراع دواسة البنزين

رقم 3 : ذراع دواسة البنزين ... او الذراع المتحكم ف كمية الضخ للبنزين للموتور

رقم 2 : هو مسمار كبير وعريض وهو خاص بظبط الهواء

ملحوظة هامة جداَ : بعض الكربراتيرات بيكون فيها مسمار ثالث يسمى بالخلاط .. او مسمار خلط بنزين وهواء مع بعض
ودة نادراَ .. لكن لو لقيت 3 مسمار ف الخلف .. لا تطبق اي شيئ .. لان الشرح هنا على النوع اللى بدون مسمار خلط
ولا ينطبق الشرح ابداَ على النوع اللى فية خلاط وهو نادر وجودة .

الخطوة الاولى :
اول حاجة لازم المكنة تكون باردة ومتلجة عشان تظبط الكربراتير ... ولو رحت لصنايعي وظبط الكربراتير والعربية سخنة
اعرف انة كفتجى وخد عربيتك وامشى .. لازم العربية تكون باردة لذلك يفضل ان تضبط الكربراتير ف يوم متكونش خرجت بية بالعربية .. هو يفضل ذلك طبعا .

الخطوة الثانية :
اقفل مسمار رقم 2 ع الاخر وهو مسمار الهواء
بعد كدة رجعة مرتين
دور العربية بتاعتك

لو لقيت المكنة بترجرج وتكركر عادي .. لف لفة تالتة واتركة ع الوضع دة

بعد كدة روح للمسمار رقم 1 الخاص بالبنزين
والعربية دايرة لفة كأنك بتـقفل
المكنة هتبطل منك .. عادي
رجع المسمار مرة واحدة للخلف
دور المكنة
هدور لكن برعشة جامدة وكأن الموتور اصابة الجنون .. عادي
لف للعكس لحد ما المكنة تهدي
غالبا هتكون لفة واحدة بس
اول ما المكنة تهدي ارجع لمسمار الهوا رقم 2

لفة لفة كمان .. لو حسيت ان فية صوت زي سسسسسسسسسسس
رجع المسمار لفة .. الصوت كأن صوت هوا .. والمكنة هتبرجل
لو مفيش صوت سيب المسمار زي مهو ولا تيجي جمبة

الخطوة الاخيرة :
معدل ظبط مسمار الهوا بيكون بعد ما يتقفل ع الاخر .. من لفتين .. ل 3 لفات حد اقصى
افضل ضبط غالباَ هيكون على لفتين ونص .. هتقدر تعرف من خلال المكنة لو مرتاحة وصوتها مرتاح اوك

ارجع مسمار البنزين .. لفة لحد ما تسمع صوت المكنة بتعلي
لفة العكس اي ارجع بالمسمار لحد ما صوت المكنة يهدي ولو وصلت لمرحلة ان المكنة بترج رج
رجعة لحد ما المكنة تبقى بدور وثابتة .... بس الف مبرووووووووك

طيب اعرف نتيجة اللى عملتة دة صح ولا غلط ازاي ؟؟؟؟
هقول لحضرتك .. مسمار البنزين سهل تعرف نتيجتة عن طريق صوت الموتور ف السلانسية وانت بتلفة
اما النتيجة النهائية .. اعمل مشوار وبعدة فك بوجية واحد ... لو فيها هباب اسود .. او طبقة كربون كثيفة
يبقى كدة فية زيادة فى مزيج البنزين .. يبقى لازم تقفل مسمار البنزين شوية .. وكذلك مسمار الهوا رجعة مرة واحدة

طيب اية اللى يترتب على الضبط الخاطئ لمسمار الهواء والبنزين ؟؟
نسبة البنزين هتكون اعلى من نسبة الهواء .. او العكس .. وهيترتب على ذلك
1 - استهلاك عالى ف البنزين
2 - البوجيهات هتتراكم عليها كمية كربون كبيرة الى ان تتوقف السيارة عن العمل ف احد المرات
نتيجة لتكون طبقة الكربون الذى ادت لمنع تكون الشرارة اللازمة لحرق البنزين
3 - العربية هتاكل بوجيهات وهتضطر تغير بوجيهات كل شهر ع الاقل

حبيت اذكر عيوب عدم ضبط الكربراتير بشكل جيد .. علشان الاعضاء تعرف انة ممكن يبرجل عربيتة اكتر بدل ميصلحها
ف حالة انة مقدرش ينفذ الخطوات .. وعلى فكرة للعلم وللاهمية .... فية متخصصين كربراتير وبعض الميكانيكية
وبقول بعضهم .. مبيعرفش يظبط الكربراتير كويس .. وبدل ميظبط يبهدل الدنيا .. وانا عانيت وجربت امثالهم كتير
وصادفت كل المشاكل دي لذلك قمت المغامرة وفكيت كربراتير حتة حتة قطع عشان اعرف الدنيا اية من جوة
ونزلت كتالوج للكربراتير الخاص بالريجاتا وقريت

* مقصد القول المحير *
مش معنى انك هتروح لميكانيكي انة هيظبطة كويس .. لاء ممكن يبهدلة
ومش معنى انك هتعملة بنفسك انك مش مممكن تظبطة ... لاء ممكن .. بس تركز ويكون عندك صبر
ولو العربية برجلت منك عادي .. افضل وراها لحد ما تظبطها .. معرفتش ؟ .. روح لميكانيكي معروف عنة الخبرة
هيظبطهولك وركز معة وهو بيظبطة واسألة اية الخطأ اللى انت عملتة ؟
ممكن تكون لفيت مسمار الهوا زيادة عن اللزوم ؟ ممكن تكون قفلتة ع الاخر ونسيت ترجعة ... الخ وبكدة تبقى عرفت
انت غلط ف اية وعرفت ازاي تظبطة بنفسك ف اي وقت

الف شكر علي الموضوع

الصوره مش ظاهرة