الموضوع: تقريري عن كيا سيراتو بعد 2000 كم

السلام عليكم ،

بعد تفكير عميق وقراءات ومقارنات ، ربنا وفقني اشتري كيا سيراتو 2012 خليجي والتقرير ده توثيق لأول 2000 كم مع السيراتو .

إجمالا :
سعر ممتاز في مقابل قيادة ممتعة سهلة ، عربية متسعة مقارنة بفئتها ، اقتصادية نسبيا ، جميلة شكلا توكيل جيد (حتى الآن).
بكل تأكيد ارشح العربية لأي حد بيفكر ف عربية في نفس المستوى السعري .

أولا : الكماليات :
انا اشتريت أعلى فئة ، مرايات ضم ، مفتاح ذكي ، كاميرا خلفية ، جنوط 17 .
بالنظر لسعر العربية ، مجرد فكرة اجتماع الكماليات دي فيها حاجة مبهرة . أنا مشفتش BMW 3 series فيها الكماليات دي . حتى Mercedes E series فيه كماليات في السيراتو مش فيها (الكاميرا الخلفية مثلا) .
قيادة العربية بسبب الكماليات دي تجربة ممتعة حتى في أسخف المشاوير بالنسبالي : 6 أكتوبر - مدينة نصر الساعة 5 مساءا . أو حتى الركنة اللي بقت أسهل بظهر العربية !

ثانيا : التسارع :
أنا لسه مسافرتش بالعربية وأعلى سرعة جبتها كانت 130 على المحور وف يوسف عباس لكن التسارع متوسط ، العربية بتعمل ضجة عالية لكن تسارعها مش على نفس مستوى الضجة . يمكن محتاج أحسن تكنيك التسارع .
نقطة تستحق الذكر : أحيانا تفاعل العربية معاك بيكون مش على درجة عالية بمعنى اني احيانا كنت بادوس بنزين والدواسة بتتحرك تحت رجلي لكن مش بنفس معدل تسارع العربية .

ثالثا : العفشة - التعليق :
أول أسبوع بالعربية نسيت تماما ان المعرض بينفخ الكاوتش زيادة وفضلت ماشي بالعربية بكاوتش منفوخ على 45! كانت العربية صعبة جدا .
بعد تظبيط الكاوتش على 30 ، العربية بقت هايلة جدا ، بعد النيتروجين بدل الهواء في كل العجل ، العربية بقت ممتازة . أنا مش مقتنع بولا كلمة من اللي اتقالت هنا في المنتدى عن سوء العفشة . أنا بادخل ف شوارع مكسرة (شارع جمال عبد الناصر في الحرفيين مثلا) ومش متضايق اطلاقا .
في المقابل ، الثبات على السرعات معقول جدا . على الرغم من ان العربية بتنط نطة خفيفة على الفواصل السخيفة اللي بين الحارات على المحور لكن تحكمك في العربية بيفضل عالي جدا .

رابعا : استهلاك الوقود :
في المتوسط 11 لتر لكل 100 كم (دي من عداد العربية) ، من واقع عدد المرات اللي مليت فيها التنك الرقم ممكن يقل شوية . أعتقد هايتحسن بمرور الوقت وتغيير نمط القيادة .

خامسا : الصيانة :
اتصلت بكيا عشان احجز معاد ، اخترت معاد مسائي (7 مساءا) في توكيل روكسي .
رحت متأخر (حوالي 8 إلا ربع) كانوا قربوا يقفلوا ، شرحت للمهندس المسئول اني اتأخرت لظروف خارجة عن ارادتي واني مينفعش اخد معاد تاني ووافق أدخل . نص ساعة والعربية خلصت صيانة الألف . دفعت 90 جنيه زيادة لأني خليجي مش وكيل (إجمالا دفعت 390 جنيه).
مش متضايق إطلاقا من السعر مقابل الجودة .

اتمنى اني أكون ساعدت حد بالتقرير ده ومستعد أجاوب على أي أسئلة .