فيوز منفذ الولاعه ضرب هل ليه بديل ؟

**iq360max** · 02-10-2011 08:12 AM

السلام عليكم انا بصراحه فرحان جدا ان فيه منتدى محترم بدأ يهتم بعربية جميلة زي اللوجان وفاتح نقاشات مع اعضاء زي العسل عشان يتناقشو في اي مشكلة تخص اللوجان ونحاول نحلها مع بعض
انا ليا خبرة بسيطة مع اللوجان 2010 اشترتها من سنة ونص
وحابب اساعد اي شخص عنده مشكلة في قطع الغيار عشان تعم الفايدة لكل اللوجاناويه

انا بقه ليا مشكلة اني حاولت اوصل مكنسة كهربائة بتشتغل ب 12 فولت وليها مكان توصيل بتاع الولاعة وكنت مشغل الكاسيت والعربية على ON مش دايرة المهم وصلتها الكاست طفا
وشلتها وجربت حاجه تانية زي الولاعة نفسها مش شاغله ولا FM Mp3
ولما اطفي العربية خالص الكاست يفضل شغال
شلت توصيلة البطارية خالص لمدة 10 دقاق ووصلتها تاني
المشكلة هيا هيا
قلت يمكن مشكلة الفيوز فعلا فتحت العلبة الي على جنب التابلوه ناحية باب السواق وبصيت على فيوز الكاست على اساس انه طفا اول ماحصلت القفله
لقيته فعلا اتحرق وبدلته بواحد ازرق مكتوب عليه 20 واشتغلت وبقه زي الفل

انا اسف على التطويل انا بس حبيت اساعد اي حد اتعرض للمشكلة دي
وعندي سؤال ممكن اجيب غيار للفيوز ده ولا خلاص كده راح عليه هل ليه قطع غيار لاي فيوز عربية ولا هوا خاص بالرينو بس ؟؟

بس ماحدش يقولي توكيل لان عربيتي خرجت من بند الضمان عشان حادثه وحشة شوية وقالي عاوز 43 الف عشان اصلخها يعني تلتين تمنها

وشكرا جزيلا

**neemmohamed** · 03-10-2011 02:15 AM

موجود عند محلات الاكسسوار بس المهم تجيبه نفس رقم الامبير المكتوب عليه

**Egyzizo** · 03-10-2011 02:33 AM

مرحباً بك ..
فعلاً، الفيوز متوفر مع مراعاة نفس الرقم وحذارى من استخدام رقم أعلى.

وياريت تدينا خبرتك فى اصلاح العربية بره التوكيل بعد الحادثة ، ومنين جبت احتياجات العربية والتكاليف؟

**iq360max** · 03-10-2011 06:07 AM

الف الف شكر على سرعة الرد
وجزاكم الله كل خير
والله يابشمهندس الحادثة الي حصلت كانت عالزراعي والعربية اتازت فيها لاني خبطت في الخرسانة الي بين الحارة الرايح والحارة الجاي

فدي كانت من سنة ونص والحمد لله العربية رجعت زي الاول
كلفتني كامل 15000 جنيه
ده طبعا انا كنت فاكر اني مأمن عليها لاني لما رحت رخصتها 3 سنيين دفعت تأمين اجباري انا فكرته ده هوا الاتأمين فعشان كده بعد الحادثة خت ونش وقطر العربية لغاية توكيل رينو الي في العامرية في الاسكندرية

ويعدين ركنتها هناك لانه كان يوم جمعة
جيت تاني يوم فوجئت انها لسه في ماكانها دخلت بلغت المهندس فقلي خلاص ادخل حضرتك استريح وحندخلها الاستقبال قعدت حوالي ساعه قالولوي ان خلاص دخلناها وحضرتك حتدفع 1000 جنيه عشان نعمل مقايسة ونقدر قيمة الاصلاحات ونعملك كلفة اجمالية عشان ندي اوردر الشغل في الصيانة

قلت ماشي بس انامأمن عليها قالي تيع ايه قلتله مصر للتامين قالي المهندس اوكي انت كلمهم لما نعمل القيمة الاجمالية على نمرتهم فامفهمتش حاجه قلتلته على الي فيها قالي انت كده يافندم مش مامن ولا حاجه وعرفت ان في بلدنا مصر في حاجه اسمها تأمين اجباري وحاجه تانيه اسمها تامين شامل انت بتعمله وانا طبعا عشان جايب العربية كاش فالمهندس المحترم الي في رينو سان ستيفانو حتى مابلغنيش بحاجة زي دي وانا اصلا جديد عالزيرو

المهم بعد 10 ايام اتصلت بيهم قالولوي العربية عاوزه 43.000 جنيه ّّّّّ!!!!!!!!!!!!!!!!!!!!!!

قلت الحقني يا بابا العربية راحت
والدي كلم ناس معارفه وكده خدناها حاجه حاجه

فحقول الي فاكرة
ودتها للسمركي استعدلها وزبط الشنطة مكانتش بتقفل والبابين واحد منهم كان بيعاكس لما بيفتح واكتر حاجه خد فيها صدر العربية
وخلاني اجيب كابوت جديد وجيته تيواني من اللي لي في شارع صلاح الدين في اسكندرية اي فاكر تمنه حقول عليه
وجبت رفرف ايمن
وجبت فانوس الشابورة من غير لمبة ب 65 جنيه
وجبت الشنب النيكل الي فوق العلامة والشبكة من عنده بحاجه بسيطة مش فاكر بكام
وطلبت الفاونيس الامامية قالي مش حتيجي دلوقتي هاتها توكيل
وجبت الدينامو كان فيه حتة بايظة فيه قالولي لا انت لازم تاخد الديانمو كله كام ياسيدي ب 2700 جنيه !!!! فرنساوي يافندم
رحت جايب من واحد كده ف زقاق متخصص في المارش وال\ينامو وكنت شايله معايا القديم ورتهوله بص على قاعدة الدينامو وعرض البوش بتاعه قالي انا عندي بتاع الكليو تاخده تجربة قلتله طيب بكام ياسيدي قالي ب 1000 فرنساوي ونفس ماركة اللوجان
طيب يرضيك ياعم والكلام ده مارضاش ينزل جنيه خته وقلتله لو فيه حاجه حرجعه
خته عند الكهربائي بعد ماخلصت سمكره ورش وفرن والليلة دي الرش والفرن رشيت تقريبا العربية كلها ماعدا البابين الي ورا ب 2500 جنيه انا عارف اني اتطشمت بس اصل ده واحد معرفة للسمكري والله كلهم حرامية في بعض بيستغلوا الواحد استغلال كانك في غابة والله بس اعمل ايه نار الصنايعية ولا جنة التوكيل

قطع الغيار الي جبتها من التوكيل
فانوسيين الامامين ب 800 جنيه و ب 400 الواحد بس مافهمومش خاصية الرفع والانزال الي بتعملاه بزارز تحت جنب مفاتح الكبوت بتاع الهاف اوبشن بس انا ماختش بالي في التوكيل من الحتة دي

وجبت القاعدة العلوية الي ماسكه دراع المكنه الي حتلقيها حشوتها جلد وهيا حديدي كده بيتثبت بمسامير في شاسيه العربية نفسه وجبتها ب 650 جنيه !!!!

وجبت فانوس خلفي يميمن الي فيها لمبة المارشدير ب 185 وعلى فكرة خلي بالك عشان الكهربائي بياخد اللمبات بتاعت الفانوس القديم السليمة عنده وبيركبلك الي جبته جديد وانت طبعا مع اللهوجة ومش مصدق نفسك انك خلاص بتلم العربية

جبت الشبكة الامامية - وعلامة الرينو جاتلي في كيس مكتوب عليه صنع فرنسا وعلامة مائية وحركات ب 65 جنيه - وجبت انبوب كاتوش على شكل حرف s الي بيربط بين الريداتير والمكنه ب 260 جنيه بيمشي فيه مية الريداتير -- وجبت الريداتير نفسه روماني ب 1050 جنيه --- وجبت الحتى البلاسيتك الكرتيرة الي بتغطي البطانة الي حوالين الكاوتش اليمين من ناحية الي جنب السواق مش فااكر بكام --- وسئلت على السربتينه ومواسير التكيف قالولي كلها حسبة 5000 جنيه قلت طز في المكيف حصلحه مع نفسي --- الحمد لله الاير باج مافتحش عشان الخبطه ماجتش غير من جنب العربية اليمين --
صلحت المكيف لسه ماكملش شهر زبطتلي المواسير استعدلها وكانت معجنة في بعض معاديا الماسور الي فيها السكس بلف
كانت سليمة
وجبت السربتينة جديدة ب 250 جنيه بتعت التوكيل ب 1700 جنيه وصلحلي المواسير ونضفلي الكومبيريسور وحاجه اسمها الاكسبنشن وشحلني فريون 3 مرات عشان مكاكنش عارف ان الكومبريسور ملاين تراب وكده وخد مني 700 جنيه والتكيف مشاء الله عسل عند واحد في دمنهور اسمه نجيب قاسم في شارع المقريزي

انا تعبت وطولت عليكم لو في حاجه عاوزينها انا تحت امركم ويارب يكفينا شر العربية دي

**shabaka** · 03-10-2011 08:13 PM

الحمد لله على سلامتك وربنا يعوض عليك

**MOUSTAFA_SAAD** · 03-10-2011 09:05 PM

حمد لله على سلامتك من الحادثه
والولاعه دى عيب فيوز
انت منين من دمنهور

**Ahmed A Rahman** · 03-10-2011 10:18 PM

الف مبروك على تصليح العربية

يعني ايه القاعدة دي ؟؟ وايه دراع المكنة ده

المشاركة الأصلية كتبت بواسطة iq360max

وجبت القاعدة العلوية الي ماسكه دراع المكنه الي حتلقيها حشوتها جلد وهيا حديدي كده بيتثبت بمسامير في شاسيه العربية نفسه وجبتها ب 650 جنيه !!!!

**MOUSTAFA_SAAD** · 04-10-2011 08:54 AM

المشاركة الأصلية كتبت بواسطة iq360max

imageshack® - online photo and video hosting

دي الصورة بتوضح الجزء الي اقصد بيها القاعده العلوية بتاعت المكنه

بالنسبة لاخي استاذ مصطفى احنا طلعنا بلديات اهوه كويس اتنيين لوجانويه بيواسو بعض
انا من شبرا - عند الكوبري العلوي في شارع المقريزي بالتحديد

والف شكر ليكم على ردكم وربنا يكفينا شرها ويبارك لنا فيها

اهلا بيك فى المنتدى

انا بعد بوابة المساحه بشارع

**iq360max** · 04-10-2011 01:01 PM

ده احنا جيران بقه على كده
اهلا بيك ويارب نقدر نفيد بعض ونفيد اخوانا المحترميين الي في الجروب
للتواصل 0102051557

الموضوع: فيوز منفذ الولاعه ضرب هل ليه بديل ؟

LinkBack

أدوات الموضوع

عرض

-

-

-

-

-

المواضيع المتشابهه

تعديلات على تابلوة الداستر واللوجان .. عملية انتحارية , هل من منفذ؟

اين يوجد منفذ توصيل الكمبيوتر

مبارك يصدر تعليمات بفتح منفذ رفح دون سقف زمنى

فيوز الولاعه وmp3

الولاعه

الكلمات الدلالية لهذا الموضوع

المفضلات

المفضلات

ضوابط المشاركة