البطارية فى الباي باى بعد سنة ونص

**aaet1** · 06-10-2011 12:27 AM

السلام عليكم، النهاردة جيت أشغل العربية ألاقى مجرد تكتكة ومابتدرش، الأنوار كلها ضعيفة، الموضوع ده حصل مرتين تلاتة بدون سبب واضح خلال السنة والنص اللى فاتت وفى كل مرة كنت بشحن البطارية من خلال وصلة ببطارية عربية تانية وأمشى عليها شوية لغاية ما تشحن وتقعدها 3 أو 4 شهور وتعمل نفس الحركة تانى، المرة دى بقى مش قابلة الشحن من خلال الوصلة وطبعا فكيتها ورحت بيها لواحد بتاع بطاريات وطبعا لقاها فاضية، الفكرة بقى انه قالى العيب ده موجود فى البطاريات اللى مقاسها 45 وانه شاف نفس المشكلة فى عربيات تانية زى الماتركس والنيو هيونداى ان فجأة البطارية تموت وبعدين تشحنها تمشلها كام شهر وتعمل نفس المشكلة ونصحنى انى أغيرها ببطارية مقاس 55.... الفكرة بقى هل الكلام ده طبيعى، هل البطارية فعلا بتسافر وماترجعش بعد مجرد سنة ونص، طب أغير أجيب نوع إيه ومنين

تحياتى للجميع

**dexter** · 06-10-2011 01:13 AM

انا معايا بيكانتو و حصل معايا نفس الموضوع من اسبوعين, البطارية ماتت فجأة بعد سنة و اربع شهور تقريبا و بدون اي مقدمات.

**3ateef** · 06-10-2011 02:02 AM

انا غيرت البطارية ب فارتا المانى 60 امبير...ب 540 جنية
وفية ال 55 امبير ب 480 جنية...

**aminibrahim** · 06-10-2011 02:12 AM

طب هي البطاريه الاصليه كام امبير

انت بتقول 45 ازاي

طب وممكن الواحد يجيب بطاريه اعلي مش فاهم

**aaet1** · 06-10-2011 02:51 AM

أيوه الأصلية بتاعة العربية فعلا 45 .... وحسب كلام الراجل بتاع البطاريات وناس تانية برضه انها كده صغيرة على احتياجات العربية ونصحنى ب 55 علشان المساحة التخزينية (الشحن) ليها أكبر، وبتركب برضه فى العربية بس مش هيبقى حواليها الكافر المطاط علشان مساحتها أكبر شوية من ال 45

**ammarhameda** · 06-10-2011 11:37 AM

هوة الاحسن اني تركب 75 امبير احسن شي انا بس عندي بطارية السيراتو بس تموت رح ركب 75امبر AC Delco

**Egyzizo** · 06-10-2011 11:59 AM

أنا معايا 128 .. وحصل نفس الحكاية الأسبوع اللى فات ، البطارية (55 أمبير) ماتت فجأة بدون مقدمات ، فغيرتها، دى كان عمرها سنتين.
ومعايا 127 .. وحصل نفس الحكاية امبارح (70 أمبير) ، برضه ماتت فجأة وغيرتها، ودى كان عمرها سنة ونص.

خبطتين فى أسبوع واحد.

السؤال دلوقتى ، الراجل بتاع البطاريات لما رحت له علشان يشوف البطارية اللى نامت، قاس الفولت بتاعها ، فلما بيلاقيه أقل من 12 (طلع عندى 9) ، فمعنى كده ان البطارية مافيش فيها أمل ، الكلام ده مظبوط؟

**Egyzizo** · 06-10-2011 12:06 PM

ملحوظة : قريت فى المنتدى قبل كده ان تركيب البطارية ذات الأمبير العالى عن الستاندارد بتاع العربية مش سليم لأنها بتؤذى الدينامو تقريباً.

**masterzmind** · 07-10-2011 03:47 PM

مش عارف حوار تغير البطارية ببطارية اعلى فى الامبير دة صح ام خطا... والسيراتو لما بتركيب فيها زينون بيعمل مشكلة فى ال usb نتيجة لضعف قوة الامبير الى فى البطارية هل انا لما احط بطارية اعلى فى الامبير ممكن المشكلة دى تتحل .......... مستنى رأى الاعضاء فى الكلام دة

**aaet1** · 07-10-2011 04:14 PM

أنا خلاص غيرت البطارية بمقاس 55، وزى ما قلت لحضراتكم قبل كده وعلى لسان أكتر من واحد بتاع بطاريات ان البطارية ال 45 نازلة وعاملة مشاكل مع عربيات كتير زى السيراتو والماتريكس والهيونداى، وان فيه أكتر من واحد اشتكى انها بتهرب وبتفصل كل فترة وماهياش مناسبة لاحتياجات العربية وخصوصا لو مركب انذار وان المناسب هو البطارية ال 55