الموضوع: الحمد لله عملت صيانة الـ 30000 للـبونتو إيفـو - أومـاترا الدراسة

السلام عليكم ورحمة الله وبركاته

الحمد لله عملت صيانة الـ 30000 كم ، كنت اتصلت علشان احجز ميعاد صيانة في جسر السويس كالعادة، ولكن فوجئت بإن اوماترا هايفتتحوا مركز خدمة في الدراسة، وبالتالي حجزت هناك افضل.
وده موضوع منفصل عن المركز الجديد
http://www.nilemotors.net/Nile/250116-a.html

ماتم بالصيانة:

صيانة الأرقام الفردية ( 10000 / 30000 / 50000) تقريبا زي بعض:

تغيير زيت: المرة دي اخدت معايا "كـاسترول ايدج" وحسيت بفرق كبير بينه وبين الموبيل 1 = 280.00 جم
تغيير فلتر الزيت = 32.00 جم
تغيير فلتر الهواء = 85.00 جم
غسيل الموتور بالفوم = 27.00 جم
وكالعادة مياة مقطرة للمساحات = 5.00 جم (مع اني قلتلهم اني لسه مزودها)
والمصنعيات = 1.5 ساعة * 90.00 = 135.00 جم وتم خصم 10% علشان كنت العميل # 1

أما عن الإيجابيات والسلبيات ف الزيارة المرة كانت كلها ايجابيات (:

بداية من الترحيب الشديد من السيد/ جيوزيبي نوفازيو، المدير العام لأوماترا، واللي كان واقف مع المهندس/ سيد وهو بيستلم العربية، وبعد كده قعد معانا وشرحلنا ان الفترة اللي جاية هاتكون أفضل، وانه جاري العمل على إنشاء مركز خدمة جديد بغرب القاهرة، وان مكتبه مفتوح للإقتراحات والشكاوي الخاصة بعملاء فيات، وكان موجود ايضا المهندس/ طارق جبريل، مدير الصيانة.

* مش عارف "المهندس / سيد" ده اللي كانت العضوة ازميرالدا بتقول عليه ولا لأ، أنا دي أول مرة اتعامل معاه، ولما استلمت العربية منه - بعد تجربتها - قاللي ان في عندي صوت في الباب اللأمامي شمال وده بسبب الكالون، والحل قطعة من الكاوتش بتركب علية لمنع الصوت، وفي صوت تاني في الباب الخلفي بسبب "الشداد" وده بيتغير أو بيتفك ويتعمله صيانة، بس انا قلتله خليها المرة الجاية، ودي اول مرة حد في اوماترا يوضح بنفسه المشاكل اللي في العربية مش يقعد يقنعك انها مافيهاش حاجة، وان انت اللي عندك مجرد "تهيؤات"