فتيس dsg حقائق ومعلومات !

**farahat** · 23-10-2011 01:45 PM

المشاركة الأصلية كتبت بواسطة hany63

استاذ فرحات
ياريت تشرحلنا نظام الفتيس بتاع البى ام ال 8 سرعات الجديد اوتو عادي ولا ايه
ماداهيه ليطلع زي ال dsg برضه
عشان انا ناوي اجيب حاجه من الفئه التالته الشكل الجديد

هههههههه ، لا متقلقش ، الفتيس أوتوماتيك عادي مع تحسينات في الأداء ، الفتيس إلي ذي ال-DSG عند بي إم إسمه SMG ، ودة مش بيستعمل في العربيات العادية من فترة ، يعني كانو بيركبوه على العربيات السبورت أو ال-M

بس أوعدك أول ما تقع تحت ايدي ال-technical design ........s بتاعت الفتيس الجديد ال-8 سرعات بتاع ZF دة هشرحه هنا على طول

**HISHAM80** · 23-10-2011 02:11 PM

استاذ فرحات أنا بس كنت عايز اوضح نقطه ان احنا بنتكلم عن عربيه في مصر سعرها غالي جدا واي مستهلك لما بيشتري عربيه من النوع ده يتوقع قدر قليل من الاعتماديه وراحه البال زي ما قولت قبل كده مع ال حترامي لملاك الصيني ما بيحصلش فيها كده احنا ممكن نتكلم عن عيوب صناعه في اجزاء ثانويه مش في حاجه اساسيه زي الفتيس
أول حاجه ان شايف ان فولكس و تيوتا غلطو لما نزلو الفتيس من غير دعايه كافيه ويعرفو المستهلك يعني ايه فتيس DSG يعني معظم الناس بتشتري النوع ده من العربيات في مصر من شريحه عمريه معينه معتقدش ان حد فيهم كان فاهم يعني ايه فتيس DSG كل الي كان بيفكرو فيه انها اوتوماتيك بس كان مفروض انهم يعرفو المستهلك ان في ديسك واسطوانه بس هما خافوا من الناحيه التسويقيه وده اعتبرو تضليل للمستهلك.
الفتيس متجربش كويس في مصر علشان يشوفو ان كان مناسب ولا لأ ودي حاجه اساسيه في أي منتج جديد عايز تنزلو السوق لازم يتم اختباره لمده كافيه في مع الظروف.
التوكل متعملش مع المشكله بجديه سواء العربيه خليجي أو مصري كان لازم يوجد قطع غير كافيه ويتم استبدال كل قطع الغير واضافه ضمان اضافي على مجموعه الحركه على الاقل 5 سنوات بعد ضمان العربيه.
الكلام ده بيحصل في أي شركه محترمه خصوصا في مجال الهندسه لما تكون شركة ليها اسم وعن تجربه بس بدون الدخول في تفاصيل لما يكون في مشكله من المنتج عايز قل لحضرتك ممكن علشان نصلح العيب بيكلفنا ملايين بس بيتعمل من منطلق Customer satisfaction

**HISHAM80** · 23-10-2011 02:43 PM

احب اضيف أنا مستمتع جدا بالنقاش مع حضرتك انشاء الله خلال اسبوع هتيجي عربيه باسات cc موتور 2.0 و فتيس DSG انشاء الله هعمل عنها تقرير هتعد معايا 3 شهور على الاقل هسافر بيها يوميا 240 كم

**ayman_sff** · 23-10-2011 02:53 PM

شكرا لسرعة الرد

**farahat** · 24-10-2011 01:17 AM

المشاركة الأصلية كتبت بواسطة hisham80

استاذ فرحات أنا بس كنت عايز اوضح نقطه ان احنا بنتكلم عن عربيه في مصر سعرها غالي جدا واي مستهلك لما بيشتري عربيه من النوع ده يتوقع قدر قليل من الاعتماديه وراحه البال زي ما قولت قبل كده مع ال حترامي لملاك الصيني ما بيحصلش فيها كده احنا ممكن نتكلم عن عيوب صناعه في اجزاء ثانويه مش في حاجه اساسيه زي الفتيس
أول حاجه ان شايف ان فولكس و تيوتا غلطو لما نزلو الفتيس من غير دعايه كافيه ويعرفو المستهلك يعني ايه فتيس dsg يعني معظم الناس بتشتري النوع ده من العربيات في مصر من شريحه عمريه معينه معتقدش ان حد فيهم كان فاهم يعني ايه فتيس dsg كل الي كان بيفكرو فيه انها اوتوماتيك بس كان مفروض انهم يعرفو المستهلك ان في ديسك واسطوانه بس هما خافوا من الناحيه التسويقيه وده اعتبرو تضليل للمستهلك.
الفتيس متجربش كويس في مصر علشان يشوفو ان كان مناسب ولا لأ ودي حاجه اساسيه في أي منتج جديد عايز تنزلو السوق لازم يتم اختباره لمده كافيه في مع الظروف.
التوكل متعملش مع المشكله بجديه سواء العربيه خليجي أو مصري كان لازم يوجد قطع غير كافيه ويتم استبدال كل قطع الغير واضافه ضمان اضافي على مجموعه الحركه على الاقل 5 سنوات بعد ضمان العربيه.
الكلام ده بيحصل في أي شركه محترمه خصوصا في مجال الهندسه لما تكون شركة ليها اسم وعن تجربه بس بدون الدخول في تفاصيل لما يكون في مشكله من المنتج عايز قل لحضرتك ممكن علشان نصلح العيب بيكلفنا ملايين بس بيتعمل من منطلق customer satisfaction

المشاركة الأصلية كتبت بواسطة hisham80

احب اضيف أنا مستمتع جدا بالنقاش مع حضرتك إن شاء الله خلال اسبوع هتيجي عربيه باسات cc موتور 2.0 و فتيس dsg إن شاء الله هعمل عنها تقرير هتعد معايا 3 شهور على الاقل هسافر بيها يوميا 240 كم

يا باشا بدون النقاش في التفاصيل دي كلها ، في الحقيقة أنا مش شايف إن دي حاجة تعيب المنتج ، لكن مش هختلف معاك إن التوكيل نص كم شوية في الموضوع دة، ومش في الموضوع دة بس ، توكيل فولكس من زمان معروف إنه مش أحسن توكيل في مصر يعني ، يمكن اتحسن شوية في الاواخر لكن واضح إن لسة محتاج شوية .

ومنتظر تقريرك عن الموتور ال-2000 مع ال-dsg :)

**hany63** · 24-10-2011 01:24 AM

طب لما يكون التوكيل نص كم في الحاجه اللي من غير مشاكل امال يبقى ايه مع الفتيس الجديد اللي ليه مشاكل؟

**HISHAM80** · 24-10-2011 07:53 AM

أنا ولله حاسس بحضرتك ربنا معاك بس هوا توكيل فولكس زي مقال الاستاذ فرحات مش أحسن توكيل في مصر بس هقول لحضرتك على نصيحه بحكم شغلي أي منتج هندسي جديد محتاج فتره علشان يتجرب حتى لو الشركه عملت أبحاث ودي مكلفه جدا بيحتاج برده يجرب على الطبيعه وبعد فتره بينزل تحسينات جديده سواء software أو hardware فحضرتك دايما متشتريش من اول batch بينزل استنى شويه لما يتجرب شوف reviews أنا شخصيا بأعمل كده في أي حاجه بشتريها حتى لو موبيل لاني عارف ان لازم فيه نسبه خطأ وارده, طبعا أنا معترض على الفتيس لأن جزء اساسي بس صدقني الفتيس ده ثوري يبمعنى الكلمه لما نتكلم من ناحيه هندسيه بس من وجهة نظر المستهلك الي دفع الفلوس أكيد لأ

**hany63** · 24-10-2011 01:39 PM

هو فعلا ثوري بس عايز واحد مشاويره طوالي
انا مع حضرتك ان الغلطه ان الواحد خد وش القفص بس لعلمك الوكيل مانبهش لموضوع الفتيس انه نظام اسطوانات دبرياج و كان الكلام كله علي قوه الموتور اللي الواحد لما عمل تيست درايف للعربيه وده كان طبعا في العبور انبهر و ماكنش عارف بالخيبه اللي مستنياه لدرجة اول انطباع في السواقه في الزحمه كأن واحد سايق مانيوال وما مبيعرفش يسوق وطبعا عشان مافيش بدال دبرياج حاسس ان الفتيس بيتكسر تحت رجللك ولا حول لك ولا قوه
المهم ان الشركه عدلت طقم الدبرياج عشان تمنع البوش وكمان عدلت الوفت وير وبقت تخلي النقلات تيجي على اقل rpm ممكن عشان تقلل الاحساس بالنقله في حاله الزحمه (shift down)
لدرجه ان العربيه تقريبا بتطلع على الغيار التاني و بتجيب الغيار السابع على 55 كم
فاتحسن الاداء نسبيا بس للاسف ده كان حمل زايد جدا على الدبرياج و خصوصا الاسطوانه رقم 2
فبقي الفتيس اخره معاك في حدود 25000 كم و بعدها تلقي العربيه بترعش على التاني مش في الطلعه
و الغريب ان لحد الجمعه اللي فاتت الفتيس بيتغير بالكامل عشان العربيه ترجع زي الاول و لو مش مصدقين اديكوا نمر تلاته اصحابي واحد ربنا كرمه اخيرا وغير الفتيس بالكامل بعد ما غيروا طقم الدبرياج و العيب ما راحش و التاني عربيته في التوكيل حاليا بعد ما غير ميكاترونيك وبرضه لقاها بترعش برضه و التالت ربنا يتولاه عمالين يحطوا في سوفت وير ويكسبوا وقت وفي الاخر قالوا ان تعليمات المانيا ان السوفت وير يتجرب لمده شهر وبعدين يبقوا يشوفوايعني من الاخر لما العربيه تيجي علي ونش
ولو رجعنا للاستاذ اللي معاه بي ام 316 مانيوال وافاد ان طقم الدبرياج اتغير على 560000 كم و اكيد طبعا ان الراجل سواقته كويسه نتخيل ان نفس الشخص ونفس المشاوير غير لعربيه بفتيس DSG النتيجه الطبيعيه ان الفتيس هايبوظ بالكتير على 200000 كم عشان طول مانت ماشي علي سرعات متغيره هافضل ينتقل باستمرار غصب عنك يعني حتى لو رجللك حرير يعني مافيش فايده

**hany63** · 24-10-2011 02:17 PM

نسيت اقول ان عربيات اصحابي كلها 2010 يعني بعد ما ظبطوا الليله

**farahat** · 25-10-2011 05:47 PM

المشاركة الأصلية كتبت بواسطة hany63

نسيت اقول ان عربيات اصحابي كلها 2010 يعني بعد ما ظبطوا الليله

قصدك بعد ما يدوب صلحوا مشاكل 2008 ؟ ، لو فيه عيوب ظهرت في موديل بتظهر التصليحات بتاعتها في الموديل إلي بعديه بسنة ، يعني الفتيس بتاع 2010 هو عبارة عن تصليحات عيوب ظهرت في 2008 ، وهكذا ..
صحيح مدل 2010 و-2011 أداهم كان أحسن في ال-dsg لكن لسة ماتقدرش تقول إن الفتيس أصبح 100% وبدون مشاكل ، ممكن نسبة الأيوب أقل كتير من الاول والعدد أقل ، لكن لسة فيه ناس هتفضل تشتكي، يمكن لحد 2013 كمان .