سؤال فنى حول حساب استهلاك الزيت

**Ashraf_Ashraf** · 18-10-2011 01:13 PM

امبارح ومن غير مطول عليكم قطعت المسافه من مخرج نفق الازهر الى نفق العروبه فى اكتر من ساعه ونص والعربيه دايره وماشين كلنا بسبب الزحمه على الاول
فخطر فى بالى سؤال مهم
اذا كلنا بنحسب الزيوت على معدل الكيلو متر المقطوعه ونغيره بعد مانوصل للمعدل اللى احنا عارفين ( واللى بيختلف من زيت لزيت ومن شخص للتانى )
طيب دلوقتى معدل دوران الموتور على السلانسيه او على 1000 لفه بيعدى نفس الزمن لو انا مسافر
يعنى لو الساعه ونص دول فى سفر كنت على الاقل قطعت 200 كيلو
اذا حساب معدل استهلاك الزيت كده غلط لان دوران الموتور فى بلادنا الزحمه بياخد من عمر الزيت
انا حسبتها ثلت عمر الزيت فى الدوران سلانسيه بمعنى لو زيت بيعمل 10000 كيلو يبقى نحسبها 7000 مشى و3000 سلانسيه ومش عارف هل حسابى كده صح ولا لا
ياريت رايكم فى الموضع ده

**Elawany13** · 18-10-2011 01:27 PM

موضوع تغيير الزيت بعد عدد معين من الكليومترات مجرد اجتهادات وتخمينات
وحتى لو على علم ودراسة من بعض شركات الزيوت
بردوا بتختلف من بلد الى اخرى
ومن طرق الى اخرى
وممكن يكون ليها اهداف اخرى للتسويق مثلاً
واعتقد انها تقديرات تقريبيه وليست دقيقة
وعلشان الناس تريح دمغها
الموضوع بيختلف حسب حالة العربية
وطريقة القيادة
وحسب درجة الحرارة
المفروض حضرتك بتكشف على الزيت لو خواصه اتغيرت أو كميته نقصت بيتغير على طول
بغض النظر عن عدد الكيلومترات المقطوعه فعليا
عن نفسى جبت زيت موبيل الجركن الابيض (كان بـ 65 جنيه ووصل دلوقتى 80 جنيه)
كل الناس بتقولى يتغير بعد 1500 الى 2000 كيلو بالكتير
وأوعى تسيبه أكثر من كده
أنا غيرته بعد 4000 كيلو وكان زى الفل
والميكانيكى قالى سيبه متغيروش دلوقتى
بس قولت خلاص كتر خيره

هذا رأى اللى اكتسبته بالخبرة العملية
ومن خلال قرائتى فى مواضيع هذا المنتدى الجميل بأعضاؤه
والله اعلم