هى الصيانات غليت واللا إيه؟

**Egyzizo** · 23-10-2011 02:06 AM

كنت بأعمل النهارده صيانة الـ 30 ألف ، دفعونى 542 جنيه + 30 جنيه ضبط زوايا.

من حوالى سنة وشوية عملت صيانة العشرة اللى المفروض انها زى الـتلاتين بـ 417 جنيه فقط.

ليه كده؟

الظريف فى الموضوع انى انبسطت خالص لما لقيت تيل الفرامل عندى بيزيد مش بينقص ، لأن تقرير الصيانة قال ان حالة التيل 70% ، بينما فى تقرير صيانة العشرين كانت حالة التيل 50% فقط

**Egyzizo** · 23-10-2011 02:11 AM

الصيانة كنت فى مركز معتمد (مركز العدوى على طريق المحلة المنصورة)
والتفاصيل كالتالى (مع ملاحظة ان الضريبة مضافة على كل بند، مش فى الآخر) :

زيت 260
فلتر زيت 46
وردة 4
مصنعية 232
ضبط زوايا 30
_______________
الكلى : 572

**amrelzawawy** · 23-10-2011 03:50 AM

يا جدعان محنا قلنا خلى بالكو ان الصيانه دى بيحسب فيها المفروض تغيير الزيت وتغيير فلتر الزيت وزياده عليهم تغيير فلتر البنزين عشان كده مزود المصنعيه من 130 جنيه اللى كانت فى الصيانه المماثله فى ال10000 الاف الى 230 جنيه واحنا مبنغيرشى فلتر البنزين لانه داخل طلمبه البنزين وفى زميل قالهم كده ردوا قالوا هيه كده على السيستم فيا ريت اى حد رايح قريب يكون فاهم ويعترض وميتحججوش بالسيستم ويخلوها نفس مبلغ صيانه ال10000 الاف 430 جنيه بس لا كده مائه جنيه زياده بتتاخد اونطه

**Egyzizo** · 23-10-2011 04:46 AM

يعنى الزيادة كانت فى المصنعية فقط ..
ومقابل لا شئ.
آآآآه يا ولاد التيييت ..

أنا فهمت كده الفولة ، وبعت استفسار للنقطة دى على موقعهم اللى على الفيسبوك .. أما نشوف هيردوا بايه .

**amriar** · 23-10-2011 01:22 PM

هو فلتر البنزين كل 30000 كيلو ولا على حسب حالته ؟

**akerima** · 23-10-2011 03:54 PM

المغربي لا يوجد بة فلتر بنزين مستقل الفلتر اللي موجود داخل ترمبة البنزين ولا يحتاج الي تغيير

**gebreel** · 24-10-2011 09:40 PM

شكرا للتنبيه بخصوص موضوع فلتر البنزين

**mabdelaziz** · 26-10-2011 02:10 PM

انا فى العامرية بعمل صيانة ال 10000 آلاف, والمهندسة قالت الصيانة حتكلف حوالى 500 جنيه بغسيل العربية والموتور, قلت هى مش فى حدود 430؟ قالت لى لا, وعلى العموم ممكن تتأكد من الأستاذ إسلام.
سألت الأستاذ إسلام أعطانى جدول الصيانات ومكتوب فيه 465 (المصنعيات 130 وقطع الغيار335), وعلى جنب الورقة يتم إضافة 10% ضريبة مبيعات و35 جنيه فى حالة غسيل الموتور.

لسه ماستملتش العربية, إن شاء الله لما أروح ابقى أحطلكم جدول الصيانات بالكامل.