فرع الصيانة الجديد بالقطامية (eim)

**The_School** · 29-10-2011 02:06 AM

انا حجزت صيانة 25000 يوم الاثنين 31/ 10 فى الفرع الجديد فى القطامية
حد يعرف اى اخبار عن الفرع دة او حد جرب يعمل الصيانة فية

**Egyzizo** · 29-10-2011 04:39 AM

أرجو ان حد يفيدك ..
بس برضه يا ريت بعد زيارتك تعطينا انطباعاتك عن المكان ، وخصوصاً وصف الطريق ، والزحمة ، وانطباعك عن جودة الخدمة ، وتوفر قطع الغيار.

هيبقى تقرير حصرى على فكرة.

وليا سؤال : حضرتك حجزت امتى علشان تاخد موعد يوم 31؟

**The_School** · 29-10-2011 11:50 AM

اتصلت 16202 يوم السبت 28/10 الساعة 11.30 مساء
وكنت دائما بروح فرع المقطم ولكن لقيت اقرب ميعاد بعد العيد فطلبت ميعاد قريب الموظف قالى على الفرع الجديد واكد انة مش مركز معتمد زى فرنش موتورز او الميكانيكيون العرب . دة فرع جديد زى المقطم والعبور

**ModySheta** · 29-10-2011 02:04 PM

المشاركة الأصلية كتبت بواسطة egyzizo

أرجو ان حد يفيدك ..
بس برضه يا ريت بعد زيارتك تعطينا انطباعاتك عن المكان ، وخصوصاً وصف الطريق ، والزحمة ، وانطباعك عن جودة الخدمة ، وتوفر قطع الغيار.

هيبقى تقرير حصرى على فكرة.

فعلاً يا ريت تقولنا أخبار الصيانة حتكون إيه و عدد العربيات و المعاملة و الاهتمام بالعربية و بملاحظاتك!!! و لك جزيل الشكر...
الواحد عاوزيخفف الضغط على المقطم و العبور بس خايف يكون الناس اللي هناك مش قد كده!

**elshaky** · 29-10-2011 03:37 PM

انا لا بروح العبور ولا المقطم انا بروح الميكانيكون العرب بدون حجز ووجع قلب وناس هناك ف قمه الزوق ومركز شيك والمصنعيه قليله مش زى التوكيل والحمد لله انا مرتاح معاهم وعملت هناك صيانتين ال 5 وال 10 الاف
واتأكدت من انهم بيفهموا ف شغلهم فى مره روحت قولتلهم عندى طقه شمال المهم العربيه قعدت ساعه وكانوا بيغيروا زيت برضو وخرجت العربيه وقالولى الطقه من الجلب بتاعت المقص وكانوا عايزين يغيروا المقص كله المهم انا جبت جلب المقص ورحت ركبتها والحمد لله لم اسمع الطقه مره اخرى وده دليل على انهم عرفوا الطقه منين وقبل كده كان فى ميكانيكى بيبص على العفشه ومعرفش الطقه منين خالص

**Egyzizo** · 29-10-2011 04:02 PM

أنا برضه باتعامل مع مركز معتمد ومستريح جداً معاه بس هى الفكرة فى المراكز المعتمدة زى الميكانيكيون العرب وغيره ان الواحد بيخاف تكون قطع الغيار غير الاعتيادية (الغير خاصة بالصيانة الروتينية) مش متوفرة عندهم.

**tawfic** · 29-10-2011 10:45 PM

انا اتعملت معاه بس مش فى الصيانه الدوريه
اللى حصل انى رحت الثلاثاء اللى فات المقطم لصيانه 5000 وكنت حاجز تمام
لما اشتكيت من سخونيه الدوسات قالولى اتنقل فى القطاميه
كلمت الحجز تانى ورحت تانى يوم
المهم هو فعلا مركز صيانه متكامل لسه مجهز لدرجه ان الكراسى بالاستكرز اللى عليها وشاشات التلفزيون لسه بتركب
بس بالنسبه للمعامله
1- استاذ حسام اللى هناك شخص قمه قمه الاحترام والشياكه والذوق
2- استراحه العملاء فى الدور الثانى على ومن الشباك شايف كل حاجه بتحصل فى العربيه
3-الموضوع خد ساعه ونصف بالضبط
4- وده المهم فوجت بالاستاذ حسام ده تانى يوم بيطلبنى علشان يتطمن اخبار السخونيه ايه
اه والله حصل وانا ولا اعرفه ولا حاجه
----------------------------
اهم حاجه بقه الطريق للمركز علشان انا تهت
جنب محمد ذكى على شماله
يعنى كائنك رايح تطلع الدائرى وقبل ماتطلع الدائرى تمشى فى الطريق اللى على شمالك عكس اتجاه حوالى 50 متر جنب بنزينه فى الشارع اللى قبلها
خش على جوجل وبعدين الخرائط وبعدين حط الاحدثيات دى
29.981628,31.360656