ياجماعه ياريت الكل يخش علشان المقارنه قويه

**zakihacker** · 29-10-2011 06:44 PM

انا كان معايا لانسر 1998 وبعتها وربنا يوفق صاحبها ويكفيه شرها المهم انا معايا فى حدود 90 لغايه 95 الف كنت عايز اجيب عربيه تكون محترمه يعنى تريحنى من الميكانيكيه بقى ووجع الدماغ والحوارات الى موجوده دى بقى وانتوا عارفين ان احنا شعب بنحب نتكلم بس فياريت تنصحونى اجيب ايه انا كان نفسى يبقى فيها فتحه سقف بقى وحاجات حلوة من الى بنسمع عنها دى وثبات وطاره وكهرباء ياترى المبلغ ده يجيب حاجه كويسه وياترى هتكون ايه

**SonaSteel** · 29-10-2011 07:50 PM

بص فتحة سقف تحت ال 100000 مش هتلاقيها الا في الbyd
بالنسبة للكماليات في الجين تو... والطارة مالتي فانكشن و ثبات و ماتور قوي ووسائل امان بس مشكلتها التوكيل و قطع الغيار
بس ملاكها بيصينوا في مركز اسمه الصفا ومتحرم... قطع غيارها هما يفيدوك عنها.... والبيرسونا نفس الكلام
اخر حاجة الصني تقريبا نفس الجين تو بي من غير طارة مالتي فانكشن... وماشاء الله برده ياباني ماتور وعفشة وتكييف ممتازين... وتوكيل تمام وبيفتح دلوقتي توكيلات جديدة و كبيرة وقطع غيار منتشرة وانواع... بس شكلها ممكن ميعجبش ناس
...........
لو تقدر بقي تزود وتجيب تيدا اول فئة يبقي كسبت عربية من اروع العربيات الموجوده في السوق وممكن متفكرش تبيعها دلوقتي خالص
ومتنساش الاستخارة وربنا ييسرلك كل خير يارب العالمين

**sanhory** · 29-10-2011 09:45 PM

المبلغ ده يجيب الاتي

- نيسان تيدا 2009 عربية محترمة جدا و اداء و نعومة و ووسع
-هوندا سيفيك 2007 غنية عن التعريف
-متسوبيشي لانسر شارك
-سوبارو امبريزا 2008 عربية ثابتة جدا و مليانة اوبشن بس هاتها هاي لاين بس متخدش منها تجميع قوي

**zakihacker** · 30-10-2011 02:56 AM

طيب الى انا قلت عليه ده مش مظبوط ولا ايه ممكن نتنازل عن الطاره ياجماعه
ونقول لانسر بومه كامله خليجى سوبر اكسن
او تيوتا كرولا بس مش عارف
انتوا بقى قيموا وفيدونى لان ناس كتير قالتلى كده

**minicooper20** · 30-10-2011 05:03 AM

ماذدا 3 ايرو

**szaalouk** · 30-10-2011 09:54 AM

صعب انك تلاقي كرولا خليجي نظيفه تحت ال 100 لكن ممكن شارك و ربنا يكرمك بيها هاي لاين
او بومه سوبر اكشن و كلاهما محترمين جدا .

تحياتي

**benmatar** · 30-10-2011 10:18 AM

السلام عليكم
طبعا حضرتك كنت راكب عربية ما شاء الله عليها، ولما هتركب حاجة تانية لازم تحس بفارق من نواحي كتير مش مجرد موديل أو شكل، أنصح حضرتك بالتوجه للأوروبي وخاصة إنك هتدفع مبلغ ربنا يزيد ويبارك، وعشان كده تقدر تختار حاجة أوروبي محترمة... ليه أوروبي؟؟؟؟ الأوروبي وبجد عن تجارب وليس تجربة معاملات الأمان فيه أعلى من الياباني والكوري والآسيوي بصفة عامة، والرفاهية فيه أعلى، والبرستيج أكثر، يعني مثلا نفس الرقم اللي معاك ممكن تشتري بيه سكودا أوكتافيا a4 موديلات 2009 ج.الكماليات أوتوماتيك، أو a5 موديلات 2006-2007 ج.الكماليات أوتوماتيك، علما بأن الأفضلية في الإختيار لسكودا a4 وهتستغرب بس كان معايا a5 وركبت a4 كتير بتاعت صديق. ممكن حضرتك لو عاوز تركب حاجة توب تتجه للباسات مثلا أوائل الألفينات، أو bmw318 موديل 99-2000 وهتلاقي منها حاجات كويسة، أو فولكس جيتا، ومحدش ينكر كفاءة وفخامة الأودي بس قطع غيارها نادرة شويتين. بصراحة وعن تجربة هتلاقي ثبات عالي جدا في السرعات، قوة محرك وكفاءة، كماليات ورفاهيات، نادرة الأعطال جدا جدا لو حالة العربية اللي هتشتريها تمام التمام وهتحافظ على الصيانات عند فني متخصص ( مش توكيل ولا ميكانيكي عشوائي) ودي أمور متجربة أيام وليالي، وبالنسبة للي هيقولك قطع غيار غالية... أقول لحضرتك غالية ضعف الياباني وبتعيش أربع أضعافه يعني متبقاش غالية، وأضربلك مثل: كان معايا كريستالة زي بتاعتك99 أوتوماتيك وماشاء الله عليها عربية ممتازة وكنت بغيرلها تيل بداية من 60ج وحتى 100ج حوالي 4 مرات في السنة (أنا بسافر كتير جدا) أما في البيجو406 التيل ثمنه 210ج انجليزي وبغيره مرة واحدة في السنة (أيهما أرخص؟؟)... وغيره كتير... آسف للإطالة بس النصيحة لوجه الله تعالى استخير وانتقي أوروبي وهتحس بفرق الركوب والاقتناء، وبالتوفيق

**zakihacker** · 30-10-2011 03:08 PM

انا بشكر الناس كلها بس كده حاسس ان المقارنه وسعت منى اوى

**Dawns_Mist** · 31-10-2011 01:29 PM

لو بتدور على مستعل و سقفك 95 ألف يعني إحنا كده هنحيرك ... و كلهم عربيات حلوه ، و كلهم كماليات و ركوبة و أداء .. بس انت لازم يكون عندك أساسيات للاختيار .. مستعد تصرف على قدع الغيار والصيانة ولا لأ ؟؟ هتبيع قريب ولا لأ ؟؟ يهمك أكتر التسارع و الشد ولا يهمك أكتر الثبات و الراحة الداخلية ولا يهمك أكتر الاتساع الداخلي ؟؟ لازم يكون عند أسس تختار عليها .. و عموما أنا هقولك شوية من العربيات اللي في بالي مش كلهم لإن كده انت هتزهق مني لو قعدت أعددهم كلهم :

- رينو ميجان 2008 هاتش باك أو سيدان هاي لاين .. و هتوفر فلوس كمان من المبلغ اللي معاك .. بس مش هتلاقي حد بيعرف يشتغل فيها ..!!
- بيجو 307 هاي لاين 2008 .. و أوبشنات و كماليات عمرك ماهتعرف تعدها و تحصرها و اتساع داخلي و نعومة و أداء .. و هتوفر فلوس من المبلغ اللي معاك .. لكن هتدفع في المراية الجانبية 1000 جنيه ..!!
- جراند بونتو 2008 و أداء فوق الممتاز و شكل متميز جدا و مش منتشر و كماليات و نعومة ، لكن قطع غيار برضه غالية .. و لما تحب تبيعها هتستنى عليها 3 شهور على ماحد يقولك عايزها ...!!
- بي إم 316 .. و بجيبلك من الآخر أهه موديل 2002 .. عيش بقى يا كبير في الكماليات و الثبات و التسارع و كل اللي تحلم بيه .. بس تقيلة جدا في البيع ، و قطع غيارها برضه مش رخيصة ..!!
- قدامي باسات 2007 عيبها الوحيد إن الإير باج ضربت و ملحومه بس مش باينة .. بس قطع غيار أغلى من البي إم بكتير ..!!
- سيفيك 2008 هاي لاين .. و هنا هتريح دماغك و عمرك ماهتشوف الميكانيكي لحد ماتبيع العربية .. و هتكون أسهل في البيع من الأوروبي .. بس صدقني قطع غيارها متعبه أكتر من الأوكتافيا بكتير ..!!
- أوكتافيا a5 2007 هاي لاين و عربية مافيهاش غلطة .. و هنا هيكون اختيار ممتاز لو عرفت تجيب حالة حلوة .. بس تسأل على قطع غيارها الأول لإنك كان معاك كريستالة قبلها علشان ماتتفاجئش ..!!
- تويوتا الشكل الجديد هيكون اختيار مريح للي بيحبوا يكبروا دماغهم من العربية يدور و يسوق و خلاص ..!!
- شارك هاي لاين هيكون اختيار ممتاز جدا و عن تجربة عربية مالهاش حل و الفرق بينها و بين الأوروبي مش كتير و قطع غيارها يعني تعتبر معقولة و بدأت تنتشر تايواني و صيني و كل حاجة خلاص ..!!
- مازدا 2007 هاي لاين .. عربية وحش .. و هتفر فلوس من المبلغ اللي معاك ..بس قطع غيارها زي البيجو كده ..!!
- بيجو 406 .. الكبير كبير .. و مريحة في صيانتها عن أغلب البيجوهات التانية .. وعائلية جدا .. بس هتعرف تلاقي حالة كويسه منها ..؟؟
- تيدا هاتش باك 2009 اختيار ممتاز .. أداء كويس ، نعومة كويسه ، عائلية ، قطع غيار معقولة جدا ..!!
-
-
-
على فكره فيه عندك لحد مرسيدس E240 2000 ... و فيه اختيارات بالعبيط .. بس هتقع في مواقف صعبة جدا .. لما تقول أنا عايز دي .. هتقعد تدور عليها شوية علشان تلاقي حالة كويسه خصوصا لو عايز اوروبي .. و لما تقول أنا عايز أداء عالي هقولك يبقى اعمل حسابك على مصاريف صيانة دورية كتير .. و هكذا ... الاختيارات كتييييييييييييييييييييييي ييير جدااااا
انت اللي لازم تقرر عايز إيه ؟؟
و عموما هقولك كلمة حلوة .. عايز أداء موتور قوي و تسارع و شد و جري و هكذا و عايز حاجة تستحمل الحركات دي .. فكر في الياباني ..
عايز فخامة و ثبات و أمان و اتساع داخلي و عربية عائلية بتاعت بريستيج بس يلزمها اهتمام و رعاية و مصاريف .. يبقى فكر في الأوروبي ..