أشترى منين نظارة شمس أصلية في مصر ؟؟

**Innovation** · 29-10-2011 11:29 PM

السلام عليكم

موضوع شراء نظارات شمسيه فى مصر اصبح شيئ مش سهل خالص .. لأنك بتروح المحلات يقولك ايوه ده اصلى وهوه ولا اصلى ولا حاجه .. ومحلات تانيه يقولك مافيش اصلي اصلاً في مصر خالص !!

ياترى ممكن اشترى نظارة شمس اصليه منين فى مصر ؟؟ وازاى أتأكد انها اصلي مش كوبى اوريجينال اللى بيقولو عليها تجاريه دى ..
وهل ممكن اجيب نضارة اصليه فى حدود اقل من 1000 جنيه والا لازم هيكون اعلى من كده ؟؟

بجد ممكن الموضوع شكله يكون بسيط ومش مستاهل .. بس اللى بيلبس عدسات طبيه بيحتاج نضاره اصلي بشكل ضرورى جداً .. فالحكايه مش رفاهيه يعنى ده موضوع طبي بحت ..

انا عملت سيرش لقيت فيديوهات بتوضح الريبان الاصلى والتقليد .. بس افرض مش عايزه ريبان وعايزه اجيب ماركات تانيه هعرف ازاى انها اصلي ؟؟ ايه المحلات المضمونه بجد؟؟

ياريت لو تقدرو تساعدونى لو حد عنده خبره فى الموضوع ده لأن آخر نضاره اشتريتها طلعت تقليد وتاعبانى جداً ومش عايزه ادبس في واحده جديده تطلع تقليد بردو .

**M7amD_7amDy** · 30-10-2011 12:15 AM

كل اللى فى السوق أغلبه هاى كوبى لكن مش بالسوء ده وبتكون طبية ومصرح بيها

النظارات الشعبى هيا اللى بتضر العين فعلا

والأصلى فعلا لازم تكون فوق الألف ومش كل المحلات بتعمل تشكيلة منها

فى الأول والأخر هيا بتبقى عملية ثقة وضمير للمحل اللى بتشترى منه

**zegna** · 30-10-2011 12:29 AM

انا عندي يا باشا نضارات اصلي made in itlay rayban كتير لو عايز تبوص عليهم بس قولي استايللك اية يعني شكل الشنبر اللي في دماغك لان اغلب اللي عندي استايل Aviator

**M7amD_7amDy** · 30-10-2011 12:32 AM

والله أنا متعاملتش معاه . ممكن لو حد ليه تجربة أكيد هيفيدك

حاولى على قد متقدرى تاخدى ضمانات أو اى إثباتات من المحل إنها تكون أصلية

بالتوفيق :)

**amrezzat82** · 30-10-2011 01:49 AM

باشا مش لازم تكون فوق الألف عشان تكون أصلي
و فى محلات كتيرة فعلا أصلي مش هاي كوبي أبدا
أنزل مدنية نصر أو كارفور أو المعادي أو وسط البلد
المحلات المحترمة كتيرة جدا
و مش لازم ريبان طبعا ممكن تختار اللى أنته عايزه

**A_H_M_A_D** · 30-10-2011 02:03 AM

نصيحة لو عايز تشتري نضارة و تتأكد إنها فعلا أصلية , إشتري نوع مايكونش نزل منه مضروب

أنا مثلا لما جيت أشتري نضارة نظر إشتريت نوع إسمه oga فرنساوي عشان مفيش منه كوبي أصلا و بكده تتأكد إنك إشتريت حاجه أصلي حتى ولو مكانتش ليها شهرة كبيرة بس نوع محترم

**r0xer** · 30-10-2011 02:09 AM

والله نصيحة......لو عايز تجيب نضارة اصلية خلي حد يجبهالك من برة. غير كدا الموضوع مش مضمون اطلاقاً.....ولاتقولي توكيل ولا متوكيلش...عن خبرة وتجارب وصرف فلوس قد كدا السنتين اللي فاتو!.