انا المخلوووووووووووع ... نيهههااااااااااا

**khaled_sabry** · 19-11-2011 02:43 PM

اه و الله انا المخلوع .... ماتندهشوش
اصل كتفى الشمال اتخلع يوم الثلاثاء اللى فات .... مخكم راح فين
المهم
غلطتى انى روحت مستشفى المطريه ( رغم انى ساكن جنب المستشفى العسكرى للعظام بس مخى وقتها ماخلنيش افكر فيها)
كتفى اتخلع الساعه 8 الصبح و طبعا عقبال ما جه دورى و البهدله المعتاده فى المستشفيات الحكوميه كان كتفى اترد الساعه 2 الظهر .... اى بعد 6 ساعات ... فهل كده اتأخرت وممكن يكون حصل مشكله؟؟
تفاصيل عمليه الخلع اللى استغرقت نصف ساعه ... فى الاول جوم 2 دكاتره قالولى نام على السرير وواحد لف ملايه حول صدرى و الثانى مسك ايدى و الاتنين بقيو يشدو فى اتجاهين متقابلين
و بعد عده محاولات فاشله والم رهيب قالو عاوزين واحد ثالث يشد معانا
وطبعا عقبال ما الدكتور الثالث جاء
كنت حاسس بان كتفى اتحركت لكن مارجعتشى مكانها ..و نتج عن ده الام مستمره . و كان لازم واحد منهم يفضل رافعهالى لفوق لتخفيف الالم الرهيب اللى بقي مستمر و حسيت بكف ايدى بيورم
و لما جاء الدكتور الثالث بقيو الثلاثه بيشدو مع بعض لغايه ما اخيرا سمعت كتفى طق و رجع كتفى مكانها و عملت اشعه و قالولى ان كله تمام بس البس شدادة الكتف لمده 3 اسابيع
النقطه ان الثلاث دكاتره واضح انهم حديثى التخرج و خبرتهم قليله (يعنى من الاخر كانو بيتعلمو فيا )و حاسس انهم ردولى الكتف بطريقه خاطئه
فهل ممكن يكون حصل مضاعفات بسبب طريقة الرد دى ؟؟
و هل فيه طريقه تانيه اقدر استغنى عن شدادة الذراع دى (زى رباط ضاغط مثلا )

**korkor** · 19-11-2011 02:51 PM

الف حمد الله على السلامه وربنا يشفيك ان شاء الله بس استفسار صحيح انت ماردتش كتفك لوحدك علاطول ليه , انت راجل برتبه عقيد فى المخابرات المصريه وياما كتفك اتخلع قبل كده كتير

**A.Saad** · 19-11-2011 02:55 PM

الف سلامة ليك

**heshamzaky** · 19-11-2011 02:59 PM

الف سلامة يا باشا و ما تقلقش أن شاء الله يبقى تمام و مفيهوش مشكلة
طبعا عليك و على المسكنات الجامدة و شوية و حا يبقى تمام

**khaled_sabry** · 19-11-2011 03:14 PM

الله يسلمكم كلكم

المشاركة الأصلية كتبت بواسطة heshamzaky

طبعا عليك و على المسكنات الجامدة و شوية و حا يبقى تمام

ليه استخدم مسكنات ؟؟؟
انا مش حاسس بالم اصلا لأنى مش بحرك دراعى بسبب الكتافه دى ... فهل المسكنات ضروريه لاسباب اخرى؟؟

**korkor** · 19-11-2011 03:38 PM

المشاركة الأصلية كتبت بواسطة khaled_sabry

ده انتا متابع بقى

بس انا قولت قبل كده انى بقيت عميييييييد .... ولولا الفساد كنت بقيت لواء كمان (لواء فى 29 من عمره - بس عادى بقى )

بس ياريت حد يقولى بديل عن الكتافه دى لأنى بقيت حاسس انى معوق ..

بصراحه انا مهندس ومش عارف اخوانا الدكاتره اللى فى المنتدى يقدروا يفيدوك اكتر بس غريبه موضوع الكتافه دى انا فى الافلام كنت اشوف ميل جيبسون وجيت لى وبروس ويلز يردوا كتفهم بنفسهم ويطيحوا فى البشر , ايه العضمه كبرت ولا ايه ياسياده العميد

**morsi** · 19-11-2011 03:46 PM

الف سلامة عليك وان شاء الله مش هايحصل حاجة نتيجة التأخير بس فى معظم حالات خلع الكتف بيكون الالم شديد جدا ومعوق للحركة ولابد من تخدير كلى ورد الكتف فى ثوانى وبعدين بيتحط بلاستر لضمان عدم الحركة.انت بطل انك تحملت الالم بس واضح فعلا ان الدكاترة دول كانوا امتياز.

**khaled_sabry** · 19-11-2011 04:44 PM

المشاركة الأصلية كتبت بواسطة korkor

بصراحه انا مهندس ومش عارف اخوانا الدكاتره اللى فى المنتدى يقدروا يفيدوك اكتر بس غريبه موضوع الكتافه دى انا فى الافلام كنت اشوف ميل جيبسون وجيت لى وبروس ويلز يردوا كتفهم بنفسهم ويطيحوا فى البشر , ايه العضمه كبرت ولا ايه ياسياده العميد

على فكره انا مهندس برمجيات انا كمان (ده الغطاء بتاعى اللى مدسوس بيه على الشعب) و بجد كان فى دماغى ان الموضوع هايف و انى ممكن اعمله بنفسى تأثرا بالافلام دى (تحديدا بروس ويلز فى داى هارد) و حاولت اعدله بنفسى لكن ماعرفتش
و لما روحت للدكتور و قالى اعملى اشعه الاول قولته "ليه هو الموضوع مستاهل ... انا اعرف ان فى الجيش بيردوه لوحدهم عادى "و هو بصلى باستحقار و قالى "خلاص روح الجيش خليهم ينفعوك "
و امال لو كنت قولتله على بروس ويلز كان عمل ايه ... انا كنت حعملها بس اتكسفت

المشاركة الأصلية كتبت بواسطة morsi

الف سلامة عليك وان شاء الله مش هايحصل حاجة نتيجة التأخير بس فى معظم حالات خلع الكتف بيكون الالم شديد جدا ومعوق للحركة ولابد من تخدير كلى ورد الكتف فى ثوانى وبعدين بيتحط بلاستر لضمان عدم الحركة.انت بطل انك تحملت الالم بس واضح فعلا ان الدكاترة دول كانوا امتياز.

فى ثوانى ... دول فضلو نص ساعه ... و انا كنت برفص و بقولهم ادولى بنج بس قالو مش حينفع معاك ... وكنت فاكر انى انا اللى بدلع
بس جديده حكاية البلاستر دى ... انتا حتخليني اروح اكشف تانى عند دكتور محترم

**heshamzaky** · 19-11-2011 04:58 PM

هههههههههه أنت عايز تعمل رد الكتف الميدانى
يعنى تخبط كتفك فى حائط صلب و يترد هههههههههههههههههه
بص الكلام دة مش سهل كدة طالما فية دكتور سيبة طبعا يشوف شغلة الصح
و ان شاء الله ما تحتاجس المسكنات ليلا بس اختفظ بشريط مسكن للطوارىء و زيادة فى الاحتياط خد حقنة فولتارين من دلوقت

الموضوع: انا المخلوووووووووووع ... نيهههااااااااااا

LinkBack

أدوات الموضوع

عرض

-

الكلمات الدلالية لهذا الموضوع

المفضلات

المفضلات

ضوابط المشاركة