الموضوع: عاوز اروح زيارة لآثار سقارة ....

اهل بيك عندنا لو تحب فى اى وقت تعمل الزيارة دى انا تحت امرك المكان ده من الاماكن اللى دايما فيها على طول وانا تحت امرك فى اى وقت لو حابب فى نص السنة و كلمنى على الخاص وانا ارتب مع حضرتك

السلام عليكم ورحمة الله وبركاته.

تحت امرك وامر البشوات يا استاذ احمد.

لو جاى دائرى من وسط البلد فجاردن سيتى -المعادى يبقى تكمل علطول لحد ما توصل لمفترق ( يمين المنصورية-المريوطية) هتخليك فى اللى فى النص وتمسك يمينك علطول لان النزلة على طريق سقارة بعد اقل من كيلو.

هتمسك الطريق ده حوالى 17-19 كيلو لحد ما توصل لمنطقة هيبقى على يمينك مدارس سجاد .هدى السرعة خالص وهيقابلك مطب عالى وهتخش يمين وعلى شمالك هتبقى مدرسة سجاد مقفولة اسمها سفنكس.هتمشى علطول وهنا على يمينك مدارس سجاد كتير لحد ما توصل لمطب عالى وكمل اقل من كيلو هتقابل كمين سقارة (رخصة وبطاقة وتفتيش شنطة) وشكرا وتكمل هتخش يمين مع الطريق واقل من 500 متر هتخش يمين عشان التذاكر.

اركن وانزل وخدهم معاك وقفل العربية وعلى يمينك هتلاقى مبنى وبوابة امن.هتخش ومش هتتفتش وهتلاقى على يمينك الحمامات وكافيتريا وبعدها هتنزل كام سلمة هتلاقى الشباك على شمالك.هتشترى التذاكر وهتلاقى متحف سقارة على يمينك وانت راجع فى اتجاه الكافيتريا.خشوا المتحف بنفس التذكرة وممنوع التصوير عشان تعرفوا تاريخ المنطقة وطريقة بناء الهرم والاعمدة.

خلص المتحف وارجع لعربيتك وامشى اكنك خارج من المنطقة بس خش يمين هتتطلع مطلع خلى بالك المطلع رايح جاى ومفيش سور على يمينك فخلى بالك من ملفاته.

هتخلص هتلاقى هرم فى وشك (شكله متبهدل-اكوام حجارة) خش انت شمال هتلاقى الهرم المدرج على يمينك وخلى بالك الطرق اوله مدق.

اركن العربية وخش المنطقة هتلاقى 3-4 سلمات اطلعهم وورى الامن تذاكرك وكمل علطول هتلاقى سور كبير من الحجر الجيرى وتلاقى بوابة مبنية فى الحجر وعليها 2-3 غفر.خش وهتبدا الرحلة من هنا.

انت كدة فى صالة الاعمدة وبعدها الهرم هيبقى على يمينك وبنعمل عليه ترميمات.امشى قريب من الهرم واتفرج على الحجارة وحجمها وشكل المدخل الجديد.

هترجع من التمشية لحد الهرم وترجع على يمينك هتلاقى بقايا سور عليه رؤوس كوبرا وسلم واودامه بير دفن كبير.

اطلع السلم وتفرج على المنطقة من فوق وهتلاقى على شمالك اودام شوية بير تانى بس له سلالم وده كان مدخل تانى واتقفل ووراه على البعد هتلاقى هرمين(ده لو الجو حلو والسما صافية) ديه منطقة دهشور.

لو وقفت على الحافة اللى ورا هتلاقى على يمينك هرم مهدم واودامه مبانى وبيوت صغيرة ارتفاعها تقريبا 3 متر وده هرم اوناس لو حابب تروح تشوف منطقته وتخرج برا المنطقة من هناك ممكن ولو مش حابب وعاوز ترجع على العربية ارجع علطول زى ما جيت بس لما تنزل السلم هتبقى صالة الاعمدة فى وشك وده نفس طريق الدخول.

وانت رايح على العربية وراجع تنزل المنزل وقبل ما تنزله هتلاقى على شمالك طريق تانى مدق شوية يوديك على هرم تانى اسمه تيتى وده عبارة عن هرم قمته او ما تبقى منها رملة ولكن جوه تحفة معمارية لان الحوائط كلها منقوشة هيروغليفى والسقف منقوش بنجوم خماسية. وفيه تابوت من البازلت كبير جدا.

لما توصل اخر المدق هتلاقى عربيات راكنة اركن وتانى هتورى التذاكر لبتوع الامن ده لو واقفين وهيبقى الهرم على يمينك امشى على الطريق المرصوف هيوصلك لمدخل الهرم.

وانت خارج من الهرم لو حابب تدخل مقبرة منقوشة وفيها اجزاء ملونة يبقى تخش مقبرة كاجمنى وديه هتلاقيها فى وش مدخل هرم تيتى ومدخلها على الشمال.وممنوع التصوير جوة.

وانت مروح بامر الله بالسلامة هتطلع مكان ما جيت وتنزل المطلع وخلى بالك برضه.وهتعدى على الكمين وعلطول لحد ما تخلص الطريق اللى فيه مدارس السجاد وبعدين علطول على كوبرى صغير وشمال مع الطريق لحد ما توصل لمطلع الدائرى بعد تقريبا 19 كم .

او كمل من تحت الدائرى لو عاوز ترجع على شارع الهرم وخلى بالك ان الطريق مكسر شوية وفيه جزء رايح جاى.

ملحوظات :

الطريق من الدائرى على طريق سقارة حلو وناعم ومغرى للجرى بس خلى بالك اول ما توصل للنزلة لانه فيها ملف صعب شوية واخرها الطريق مكسر.هتنزل وتمسك شمالك وخلى بالك فيه عربيات هتبقى جاية من شمالك وداخلين يمين.

طريق سقارة حلو معظمه للى عارفه وبما انها اول مرة يبقى اقطر ميكروباص او عربية سياحة وامشى وراه لان الطريق فيه بلاعات وحشة وفيه كام مطب ومطبين هوا.

مش هتلاقى مضايقة زى منطقة الهرم من بياعين او غيره كتير الا لما توصل لبوابة الهرم عند الغفر اللى ممكن يقولك عاوز مرشد(ويطلع معاك هو) لو عاوز ماشى واديله اللى فيه النصيب حسب ما تقدر انت ولو مش عاوز ومعاك كتاب او الولاد مذاكرين يبقى خلاص لا شكرا.

التذاكر تخليها معاك دايما لانها هتنفعك فى كل المنطقة.

سعر التذاكر على ما افتكر 2 او 4 جنيه والعربية 2 جنيه.

الرحلة بكل الحاجات اللى ذكرتها ممكن تاخد من 3-4 ساعات.

مش فاكر ايه تانى ممكن اقوله ولو افتكرت حاجة هكتبهالك بامر الله.

ربنا يخليك يا افندم.

وهرم اوناس دخوله بتصريح من هيئة الاثار.ولو تفتكر انك شفت نقوش جوا الهرم يبقى انت كنت فى اوناس ولكن لو كان فاضى من النقوش يبقى انت دخلت المدخل الجنوبى لهرم زوسر المدرج.

اجى معاك يا حاج أحمد
حاجيب معايا كوريك و غلق و نحفر يمكن نطلع حاجة