الموضوع: مالكى ال Megane - كيفية اعداد و استخدام مثبت السرعة ؟

الأول في نظامين في الميجان مثيت سرعه speed limiter والنظام التاني نظام الملاحه الآلي Cruise Control هاتكلم على النظامين ان شاء الله وكيفية تشغيلهم .

1- نظام مثبت السرعه :- هذا النظام يعمل على المحافظه على السرعه المطلوبه اللي حضرتك محتاج تمشي عليها يعني على الطرق السريعه مثلا حضرتك مسافر في طريق عليه رادار وكتير مننا مع طول المسافه واجهاد السفر الواحد رجله بتتقل على البنزين سنه وممكن يسرح النظام ده هانقول ان حددنا السرعه على 100 حضرتك طول ماانت مااشي العربيه هاتجيب سرعه لغاية 100 بعد كده مش هاتستجيب لضغط على البنزين وبالتالي مهما سرحنا هاتفضل السرعه على السرعه سابقة المعايره.

كيفية تشغيل النظام :- زرار تشغيل النظام مكانه تحت على الشمال تحت الدركسيون قليلاً بجانب زرار تظبيط اضاءه العدادات هنضغط على الزرار هتلاقي العداد في لمبه برتقالي هتنور على اقصى يمين العدادات تحت وفي شاشة الكمبيوتر هيكتب speed limiter هانيجي دلوقتي لزراير التحكم الموجوده في الدركسيون وهم 4 ( 2 على الشمال وعلاماتهم + و - وطبعاً وظيفتهم واضحه وهي معايرة السرعه + للزياده و - للنقص ) ( 2 على اليمين ودول علاماتهم كالآتي اللي فوق علامته R ودي من Remember ودي معناها تشغيل النظام اوتوماتيك على السرعه السابقة المعايره والحفظ في الكمبيوتر . الزرار التاني علامته O و دي من Off وده بيعمل على اطفاء النظام بشكل مؤقت بمعنى ان النظام هايطفي وهاترجع العربيه عادي بس الكمبيوتر هيفضل محافظ على السرعه المخزنه فيه بحيث ان ضغطه واحد على زرار R يرجع النظام يعمل على طول اوتوماتيك على السرعه اللي حضرتك معايرها.

بعد وظايف الأزرار نيجي لي ازاي نشغل ؟ بالترتيب كالآتي
1-نضغط على الزرار اللي تحت على الشمال الأول حتى نجد الاضاءه البرتقالي تظهر في العداد والكبيوتر يكتب speed limiter
2- نضغط على زرار + اللي في الشمال اوتوماتيك الكبيوتر هايحدد سرعتك الحاليه كام وليكن مثلا حضرتك شغلت النظام على سرعه 80 الكمبيوتر هيكتب 80 وطبعا لك حرية الاختيار وقتها باستخدام ال + و - لتحديد السرعه المطلوبه وهو دقيق للغايه في ده نتصور اننا عملنا بزرار + لغاية 100 هتفضل العربيه طول ما في تسارع تطلع من 80 لغاية ال 100 بعد كده مهما كان التسارع مش هيفيد والسرعه هاتثبت على ال 100 .

ملحوظه النظام ده بيعمل فقط بعد سرعه 30 كم/الساعه الملحوظه التانيه وهي مهمه جداً في بعض الأحيان على الطرق الصحراويه بنحتاج نزيد السرعه بصوره مفاجأه لتخطي شاحنه كبيره او حاجه وطبعاً النظام ده هايكون عائق لده !! لأ ابدا مجرد ماتحس انك محتاج تتسارع بصوره مفاجأه وتكسر السرعه المثبته اضغط بصوره سريعه على دواسة البنزين للأخر فوراً الكبيوتر هيفهم ان في مشكله وهيفصل اوتوماتيك محدد السرعه وتتجاوز سرعتك عادي بعد كده مجرد ما ترجع تهدي السرعه لي 100 تاني النظام اوتوماتيك هايرجع يشتغل.

النظام التاني هو نظام الملاحه الألي أو Cruise Control :- وده الحقيقه مشابه للنظام السابق لكنه أوسع شويه من سابقه وهو انه بيعمل على انه يجيب السرعه المطلوبه ويحافظ عليها يعني مع النظام ده مابنحتاجش لدواسة البنزين في حاجه هو بيتسارع لوحده ويجيب السرعه المطلوبه ويثتب عندها اوتوماتيك .

الأزرار المستخده هي نفس الأزرار في النظام الأول ونفس الاستخدام دون اختلاف.

التشغيل :
1-نضغط على الزرار اللي تحت على الشمال الأول لكن المره دي الاختلاف في علامة النظام هاتطلع في نفس المكان اقصى اليمين في العداد لكن المره دي لونها أخضر والكمبيوتر هيكتب cruise control
2- بالضغط على زرار + هيبدأ النظام بالعمل الاوتوماتيكي لكن برضه على نفس سرعتك وبالتالي مش هاتحس بحاجه الأول هنضغط + عشان نوصل السرعه على الشاشه لي 100 بس يرجى الحذر هذه المره لئن لما هنزود السرعه دلوقتي الكمبيوتر اوتوماتيك هيتسارع عشان يوصل ليها وتسارع الى حد ما سريع وبالتالي ياريت نكون على طريق فاضي ومافيش قدامنا حد المهم نفرض اننا حددنا 100 اوتوماتيك هتلاقي العربيه بدون ماندوس بنزين ولا اي حاجه بتجيب ال 100 وبتقف عندها وتثبت عليها بدون بنزين النظام ده مريح جدا خصوصاً في الطرق السريعه .

بعض الملاحظات على النظام :-
هل النظام دقيق في تحديد السرعه ؟ نعم للغايه لدرجة ان في طرق السفر بيكون في كباري ومطالع ومنازل ومناطق الهوا فيها شديد شويه ومناطق تانيه الطريق نازل فيها وكده .... مجرد ماتيجي على منزل او كوبري حتى والسرعه هاتزيد هتلاقي الكمبيوتر لوحده حس بكده وقاوم التسارع وثبت على 100 والعكس يعني على 100 وطالع كوبري السرعه هاتقل ! لأ ابداً الكمبيتور بعد لحظات هتلاقيه اوتوماتيك تسارع زياده عشان يعوض السرعه المفقوده نتيجه مطلع الكوبري او مقاومة الهوا أو ايا كان السبب ويوصل ل 100 ويثبت......
النظام قد يكون مخيف لئنه سيصور لنا انه واحد دايس ينزين وخلاص لأ طبعاً النظام حساس جداً وأي ضغط على الدبرياج او الفرامل وقد يكون في الاوتوماتيك تغيير النقله مبطل للنظام فوراً ويتوقف النظام عن العمل بصوره مؤقته ويعود للعمل مره أخرى بعد الضغط على زرار ال R

أخيراً وليس أخراً التحكم وايقاف النظام اللي كاتبه فوق للحالات الطارئه لا قدر الله لكن لو في الطبيعي زراير الابطال والتفعيل على يمين الدركسيون قريبه جداً مننها طول ما ماسكين الدركسيون وبالتالي الضغط على O يعمل على ابطال النظام و R يعمل على اعادة العمل .

شكراً جزيلاً واتمنى ان يكون كلامي فيه من الإفاده القليل.

وأي ضغط على الدبرياج او الفرامل وقد يكون في الاوتوماتيك تغيير النقله مبطل للنظام فوراً ويتوقف النظام عن العمل بصوره مؤقته ويعود للعمل مره أخرى بعد الضغط على زرار ال R

شرح جميل ووافي
بس هو النظامين دول موجودين في الماتيوال كمان ولا الاتوماتيك بس ؟!!!

شكرا جزيلاً .
نعم النظامين موجودين في المانيوال والاوتوماتيك ودي كانت غريبه شويه انها تكون موجوده في المانيوال خصوصاً ال Cruise Control وانا مصدقتش الكلام ده غير لما استلمت العربيه زمان لئن سيارة العبد الفقير الى الله مانيوال وفيها النظامين الحمد لله.

غريبه قوي ان الكروز كنترول موجود في عربيه مانيوال
دي اول مره اسمع عن عربيه مانيوال بكروز كنترول .... ولسه ياما هنشوف من الميجان

طيب بما انك معاك المانيوال يا باشا
انا اليومين دول بفكر في الميجان جامد
وبصراحه سعر المانيول هيبقى حلو بالنسبه لي

ايه رأيه نخلص فيها ولا اصبر شويه و نستنى نجيب الاوتو
غالبا هتبقى اول فئة في الاوتو اللي هي ب 128 مش ها اقدر ازود تاني
في رأيك ايه الفروق غير الفتيس ؟؟؟
وهل في فرق كبير في استهلاك البنزين والتيل بين المانايوال والاوتو؟؟

والله انا شخصياً محب للمانيوال عشان كده جبتها مانيوال طبعاً بجانب السعر لئن كان حوالي 9000 فرق وقت ما اشتريت انا والفرق الوحيد بين العربيتين هو الفتيس اوتوماتيك مش مانيوال انا باتكلم عن اول فئه عندنا اللي هيا 119.000 مانيوال 128.000 الف اوتوماتيك الاتنين نفس الكماليات فرق النقل بس مع طبعا اعجابي بالاوتوماتيك والستيبترونيك في الميجان واللي كتير الحقيقه خصوصاً وانا على المحور او كوبري 6 اكتوبر باقول ياريت كان الواحد استنى وجاب اوتوماتيك اريح لكن الحمد لله انا برضه مازلت بحب قيادة المانيوال حتى وان كان الستبترونك هيعوض الاحساس بس برضه المانيوال مانيوال :) والدبرياج دبرياج ......

فرق الاستهلاك منطقي جداً لكن مش بصوره كبيره الاوتوماتيك لو فهمت التعامل معاه وقللت استخدامك للفرامل قدر المستطاع هاتحافظ على التيل ومش هاتحس بفرق كبير نفس الموضوع في استهلاك البنزين له وربنا يوفقك في الاختيار ونبارك لحضرتك قريب ان شاء الله.

شكرا يا باشا على اهتمامك

انا ان شاء الله رايح يوم السبت العبور ها اعمل اتست درايف
ربنا يعمل اللي فيه الخييير

الف شكر اخى رامى بجد موضوع مفيد جدا جدا جدا جدا

تسلم ايدك يا رامي شرح واضح و مبسط