الموضوع: >>>سلسلة كبسولات قانونية – ما حدش يضحك عليك ويقولك عقد ايجار قديم

ما حدش يضحك عليك ويقولك عقد ايجار قديم

كبسولات قانونية – ما حدش يضحك عليك ويقولك عقد ايجار قديم


ضمن سلسلة مقالات الثقافة القانونية
بقلم المستشار ق/ هانى عادل


السلام عليكم ورحمة الله وبركاته
ببساطة وكل وضوح
ما فيش حاجة اسمها عقد ايجار قديم !!!!

@ازاي يا عم ؟
خلصت خلاص ..
واي حد ييجي يقولك حاكتب لك عقد ايجار
ونعمله بتاريخ قديم
او على ورق عقد ايجار املاك بتاع زمان الحلو ده .
عشان تقعد وتبرطع في الشقة براحتك .
وحتدفع بس قرشين كده .. كام ألف .. زي خلو رجل ..
بس اسمع .. حيتخصموا من الايجار ..
وكمان حاكتبه ليك مشاهره ..

ده واحد .. وانا أأأسف في اللفظ بيشتغلك ..


@بيشتغلني .. مش ممكن .. قول كلام غير ده .

اي عقد بعد 31-1-1996
هو عقد خاضع للقانون المدني ..
وخارج اطار ونطاق وحدود قانون الايجار الغير طبيعي وغير شرعي
المدعو
الايجار القديم ..

@ايه ده ؟ طب نعمل ايه يعني .
انا عارف انك عايز تدخل شقة وتلبد فيها ..
عشان تستقر.. وتعيش في تبات ونبات .. وتخلف كتاكيت وكتكوتات.


@الله ينور عليييييييك .
مش بقولك ..
اللي مطلوب منك اولا انك تستعين بعد الله بمحامي .. صاحبك قريبك .. خالك عمك ..
المهم حد بيفهم بجد في القانون .. وشغال في المهنه ..

@موجود.
وتشوف صاحب البيت .. عنده استعداد يأجر مدة طويله .

@ازاي بقه من غير عقد ايجار قديم ؟
يا عم اسمع بس ..
عقد الايجار الجديد ممكن يتكتب بأي مبلغ ..
وبأي مدة

@ايه ده ؟ بجد .. هوا مش تسع سنين بس ؟!
مين اللي قال كده يا عبقري .

@هوا . .
تسع سنين ده رقم .. محدد عند الشهر العقاري لاثبات تاريخ عقد الايجار ..

@واكتر من كده ما ينفعش..
لا .. ينفع .
بس باجراءات تانية .. عشان تسجل العقد .
المهم ..
انك تقدر تكتب في العقد الجديد مثلا 50 سنة .
والايجار بيزداد كل فترة بنسبه محدده ..
وتاخد عليه صحة توقيع ..
بعد ما تتأكد ان اللي مضى هو المالك الفعلي ..
يعني ما عندوش شركاء .. على المشاع مثلا ..
او ليه شركاء ..
وهو النسبه الحاكمة .


@بس صاحب البيت عايزني اطلع عواميد الشقة وابنيها كلها .
حبيب قلبي !!!
يا سلااااااااااااااااااااااا اااااااااااااااااام
انت جيب على الحته اللي كان نفسي اسمعها منك .
خد دي .

@ابعت يا طيب .
اي مبلغ ..
واي اجراء ..
واي همسه ..
تنكتب في العقد .

@ازااااااي؟
زي الناس .. لو انت حتكمل الشقة او تبنيها او تصرف عليها في اي شئ ..
ينكتب في العقد .

@بس العقد ما فهوش مكان اكتب ده كله .
انا عارف اني حيجيلي شلل منك.
يا سيدي اكتب عقد كاااااااااااااامل على الكمبيوتر
العقد المطبوع ده اصلا مش المفروض يتباع ..
لان العقد لازم اللي يكتبه ويشرف عليه محامي .. وبدرجة ابتدائي على الاقل .

@آآآآه .
الحمد لله ..
وتكتب العقد الجميل .. ويتظبط .. ويتراجع .. وتتفاهم .

@طب اعذرني .. ليه ده كله .. ما هو عقد وخلاص.
لا يا حلو
لان حييجي وقت .. في المستقبل .. انت او ولادك .
ويقولوا
كاااااااااااااان يا مكان .. في سالف العصر والاوان .. ابونا منه لله .. صاحب الملك ضحك عليه ..
وكان السبب في طردنا من البيت اللي صرفنا فيه فلوسنا .

@حيدعوا عليا ؟!!
طبعا .. مش انت اللي استهترت .
لازم تكتب كل فلوس بتدفعها .. وكل شئ اتفقتوا عليه ..

النفووووووووووووووووووووو وس بتتغير
والورق ثابت .
وممكن بعد سنة اتنين عشره ..
ييجي صاحب الملك .. او اولاده ..
يقولك بره يا خفيف ..
او تدخل في قضايا تحرق دمك سنين .. وانت مهدد بالطرد من بيييييييييييتك .
افهم بقه يا سيدي الفاضل


@لا يا عم الحكاية كبيره باين .. انا أجيب محامي احسن يمشى في السكه دي معايا . ممكن تيجي معايا ..
مش فاضي الحقيقة .
(شكله حيتعب اعصابي)


==ارجو ان تكون الامور وضحت بشكل مبدئي للسادة القراء .. وقد آثرت وضعها في هذا الشكل كحوار .. ليكون اكثر
بساطه في الفهم للمواطن العادي ..

وأذكركم ان الرسول عليه الصلاه والسلام .. والقرآن قد أمرنا كل منهم ان نكتب العقود ولا نهمل فيها .

بالتوفيق باذن الله وشقة سعيده عليكم ..


احترامي

المستشار ق/ هانى عادل
محام أمام محكمة الاستئناف المصرية العليا
ومترجم قانونى
lawyer.hany03@gmail.com