الموضوع: صورة وذكريات-خاطر وعبد الناصر والمعرض الصناعي

السلام عليكم ورحمه الله
النهاردة الجمعة الموعد الاسبوعي عند بيت العائلة
وده يوم لازم نقضيه عند الحاجة
بيدو بيقلب في درج جدو كعادتة ويقعد يبهدلة حاجتة
وطبعا الشتيمة المعتادة من جدة ممكن تكون مصحوبة بشلوت او بوسه حسب مزاج الاجداد :-)
المحصلة صورة غريبة تجمع عبد الناصر فيما يشبه مؤتمر او مناسبة وعبد الناصر صغير جدا ولابس البدلة الصيفي المعتادة بتاعت الاشتراكية ومعاه ناس معرفهومش
بسال الحاج صورة مين دي وشايلها عندك ليه
قاللي انت عارف ان جدك كان عندة مصنع نسيج قولتلة ايوة
قاللي كان المكن بتاع زمان يجي من روسيا او فرنسا وكان في فني شاطر قوي اسمه عبد العزيز خاطر
كان بيجي يصلح الماكينات بتاعت المصنع ماكينات الخياطة والتطريز الفرنسي بالذات
وفي يوم كان في ماكينة غالية ومهمة جدا في المصنع بليت تمام وكان مفيش استيراد
لاننا كنا سنة الثورة والبلد مقلوبة خالص
المهم
عبد العزيز فك الماكينة وطلع معظم القطع اللي باظت ورسمها وعمل زيها عند الخراط وركبها واشتغلت الماكينة تمام ورجع المصنع ينتج
جدي وكان راجل عصبي وعصامي قاله انت لما بتعرف تعمل كل ده مافكرتش تعمل ماكينة ليه
قاله مافيش وقت وامكانيات يا حاج
جدي وفر له مكان بالمصنع عبارة عن اوضه وسابلة المكن يشتغل عليه بليل ويرسمه بعد فكه
ويركبه قبل وردية الصبح
وعبد العزيز يرسمع ويخرط ويجرب
وعمل اول ماكينة مصري
وكتب عليها ع.خاطر
جدي قدمله على المعرض الصناعي الي كان بيقام بالاوبرا
وقدم الماكينة فيه واتعرضت قدام عبد الناصر سنة 1953
اللي لما عرف انها منتج مصري امر بصرف 500 جنية مكافئة لعبد العزيز
تشجيعا له على الاستمرار
500 جنيه سنة 1953 يا بشر
وتشيجع الابتكار والتصنيع المحلي
والصورة كانت مع عبد الناصر وعبد العزيز خاطر
بجد عايزين واحد زيه يشجع الابتكار والتصنيع مش يطفش المبتكرين على برة ويجبلهم احباط
كريم منير