الموضوع: للافادة عرضين ADSL فودافون و TeData

أحبائي اعضاء نادي نايل موتورز الموقريين

النهاردة بقي جايبلكوا عرضين ADSL فودافون و TeData عشان اللي عايز يركب خط انترنت جديد او اللي عايز يجدد

-------------------------------

أنا عن نفسي اخترت Vodafone لكن هشرح ليكم العرضين للافادة العامة لأحبائي الاعضاء

أولا ً عرض Vodafone

العرض بيتلخص في طريقة معينة لو اتبعناها اكيد هتشترك بدون مشاكل و هي :

ممكن تشترك في اي سرعة من سرعات الانترنت بفودافون و بنص ثمن السرعة يعني مثلا 1 ميجا = 133 جنيه في الشهر يبقي في العرض هتدفع فقط = 70 جنيه و العرض ده ساري لمدة سنة واحدة و بيعطي لك راوتر فودافون 4 بورت و فيه WiFi

بس عشان تشترك في العرض ده لازم تكون عارف حد من اصحابك مشترك في فودافون و بعد كده بتاخد الرقم الارضي بتاعه و تروح اي ستور فودافون و تقدم برقم موبايلك علي خطك الارضي لأن يا جماعه العرض ده اللي هو اعلانه في التليفزيون اقطع خط النت مع صاحبك و اشترك لوحدك فلازم يكون معاك رقم ارضي حد يكون مشترك في فودافون و بيتم التركيب في خلال 14 يوم و خدمة ممتازة

عرض TeData

العرض بسيط و مش محتاج شرح و هو :

تروح تشترك في تي اي داتا و ده طبعا للعملاء الجدد او لخط غير متصل عليه تي اي داتا و يكون الغي اشتراكه مع اي شبكة تانيه

هو انك تدفع 3 شهور في اي باقة من باقات الانترنت و تاخد 3 شهور مجانا ً و معاه راوتر 4 بورت و فيه WiFi

العرض ده يا جماعة احتمال و بنسبة كبيرة هينتهي في 08-12-2011

ملحوظة بعيدة عن العروض و هي :
سمعت من ناس كتير ان في الفترة اللي جاية هتنزل اسعار باقات الانترنت الي النصف بس طبعا كل ده سماعي و غير متاكد منه.

أتمني اكون أفادتكم

أخوكم
بيشوي PEACEMAN

المشاركة الأصلية كتبت بواسطة mr_sameh

انا لسه مشترك في عرض فودافون من اسبوعين وممتاز جدا اشتركت في واحد ميجا ومعاه 40 جيجا داون لود في الشهر وبسعر 60 جنيه وجابولي راوتر اربعه بورت بالاضافه للويرليث وبصراحه قمة الاحترام

حضرتك متأكد انه بـ 60 جنيه ولا بـ 70 جنيه ؟؟

المشاركة الأصلية كتبت بواسطة pro_samir

مشكور بيشوي بيك

عرض فودافون ممتاز وكده هو نفس مواصفات الاشتراك العادي حتي نفس الباندويدث ..

بس مش فاهم كده الخطين هيكون اشتراكهم 70 ولا الجديد فقط ؟

لو الاتنين يبقي هدور علي اي حد عايز يشغل خط جديد :)

مش هتفرق حاجه لأن انت ممكن كل شهر تغير الباقة بتاعتك زي ما انت عاوز فممكن خطك يبقي في باقة مختلفة عن باقة الخط التاني

المشاركة الأصلية كتبت بواسطة donzi

حلو اوي عرض فودافون

بس انا عندي اصلا تي اي داتا عالارضي مش عارفة لازم الغيه بقى ولا ايه ؟؟

تي اي داتا في الكانسلايشن بيتأخروا اوي و ممكن يعلقوا الخط .. ممكن تشوفي خط ارضي تاني زي ما احد الاعضاء قال بالظبط

المشاركة الأصلية كتبت بواسطة mr_sameh

انا رحت اشترك عادي قالولي علي العرض واحد ميجا بستين جنيه في الشهر وده لمدة سنه وكمان ادوني خط فودافون ورقمه كويس كمان وده علشان ادفع الاشتراك من خلال شحن كروت

علي فكرة في حاجه بقي انا عاملها حلو اوي .. انا معايا خط فودافون ايزي بفاتورة شهرية فخليتهم ينزلوا اشتراك adsl علي الفاتورة بتاعة الخط و طبعا اشتراك النت بينزل علي الفاتورة من غير ضريبة مبيعات يعني في الفاتورة بيفصلوا ضريبة المبيعات عن خط adsl بحيث تكون الضريبة علي المكالمات و الـ usb فقط لا غير