الموضوع: صيانة اللينيا ال 60 الف و اشياء أخرى

الخميس الى فات عملت صيانة ال60 الف لعربيتى اللينيا تربو في البرقان و كانت كالاتي:

1- زيت ليكوى مولى هاى تك ب 315 جنيه من موزع في صقر قريش
2- مياه الريدياتير الحمراء الجركن ب 60 جنيه من محطة موبيل

و دول انا جبتهم بنفسى

اما الحاجات اللى اشتريتها منهم:

3- زيت فرمل شل دوت 4 مصرى العلبة 500 مللى
4-زيت باور شل كندى
5- تغيير زيت الفتيس المانيوال شل برضه

و الزيوت دى حسبوها ب 80 جنيه

6- طقم بوجيهات التربو اللى بيتغير كل 30 الف حسب المانيوال ال ان جي كيه ب 464 جنيه
7- فلتر زيت ب 116 جنيه و هواء ب 153 جنية - فوم 35 جنيه
8- المصنعية 175 جنيه

و طبعا فوق كل ده 10% ضريبة

يعني كله كده حسبة بتاع 1500 جنيه بالتمام و الكمال و الصيانة ما شاء الله كويسة جدا و طبعا لسة محستتش بفرق الزيت قوى

نيجي بقي للمشاكل اللى مكتوبة في التقرير بتاعهم:

1- مطلوب تغيير تيل فرامل خلفي و قالولي قدامه 3000كم و يودعع و المرة الجاية طنابير خلفي برضوا و قلتلهم مش هاغيره و انا مغير التيل امامى و خلفي في ال40 الف يعني التأكل في ال4 تيول لازم يكون زي بعض و افتكرت مشكلة يوكو مع الماستر الخلفي بس انا حاسس ان السبب ان كان ممكن يكون فيه نسبة هوا بسيطة لما أدوس فرامل و كان فيه كمان صوت حاجة بتحك باسمعها علي السرعات البطيئة بس الحقيقة بعد تغيير زيت الفرامل حاسس ان العربيه بقت تفرمل زى ما كانت زيرو ما شاء الله و أمرى لله ابقى أغير الاتنين مع بعض المرة الجاية.

2- البطاحات عندى بتزيق يمين و شمال من زمان و م. وليد اللي في البرقان قاللي لازم يتغيروا لأن ممكن المساعدين يتعوجوا مع الوقت و تغير الركبتين كلهم وبينى و بينكم قلقت من الموضوع ده و قلت له طب نغييرهم دلوقتى قالى الاتنين مش موجودين و الواحدة ب 400 جنيه غير الضريبة و ادونى نمر أوماترا العباسية و قالي هتلاقيهم هناك و ركبهم عندهم بالمرة.

المهم أخدت بعضى و مشيت و اقعدت أحاول أكلم أوماترا دى في كل الفروع يا جرس و ما حدش بيرد أو مشغول و مفيش طبعا اى اختيارات تانية قلت بقي كدة مفيش غير عمو الكيلانى بتاع شامبليون فرحتله السبت الي فات و لقيت عنده جوز البطاحات هما هما بتوع اللينيا بنفس البارت نامبر بس مش الأصلي ونوع تركي اسمه بي جي و ب 300 جنيه الاتنين رحت و اخدهم علطول و قلت زي ما يطلعوا وممكن يطلعوا مكونات محلية في التصنيع في تركيا ckd يعنى و ممكن يكونوا هما نفس النوع اللي راكب في العربية أصلا ميين عارف

الحاجة التانية سألتهم علي التيول لقيت عندهم النوع الأصلى بس عنده نوع أسباني بنص تمن الأصلى زى الريمسا بس قالولى ده كمان أحسن و اسمه ICER بس انا مش عارفه

و يارب أعرف أركب البطاحات و محدش يقوللى احنا مش هنركب قطع غير من برة التوكيل لأن لو معرفتش أركبهم عند أوماترا أو البرقان أنا ان شاء الله هاخرج من التوكيل ده خالص و هاعمل كل حاجة برة و أرخص سواء قطع الغيار أو المصنعيات أو ال 10% ضريبة دى كمان

و شكرا يا جماعة و منتظر تعليقاتكم

المشاركة الأصلية كتبت بواسطة yoko

ألخلفي أكيد أرخض من الجراند أنا كنت بقول على الأمامي
المساحات انا هجيب دراعات جديدة مش بتاعت فيات وبكده أي مساحات تركب عليها وبرده هتبقى ارخض من مساحات فيات

ياريت تبقي تنزلها في السلسلة التعليمية دى تبقي جامدة جدا