الموضوع: مشكلة اللوجان لما تبطل مع التكييف

كنت من كام شهر كتبت عن مشكله عندى فى العربيه ان الار بى ام بيقعد يتهز ويعلى ويوطى بطريقه غريبه بعد ساعه من المشى بالعربيه ولو شغلت التكييف ساعتها الاقى العربيه بطلت خصوصا فى الاشارات والاماكن الزحمه

ولقيت وقتها كذا زميل قالوا ان عندهم نفس المشكله وبرضه التوكيل مش عارف يحلها

روحت عملت شكوى ضد فرع المقطم علشان ماكانوش عارفين يكتشفوا سبب المشكله

وبعد الشكوى لقيت خدمة المبيعات اتصلوا بيا ووعدوا بحل المشكله

وبعد فتره برضه من التجريه لاكثر من مره , فى الاخر لقوا انها مشكله فى الايدل والبوابه كما توقع بعض الزملا فى المنتدى هنا

وتم تغيير القطعه والحمدلله العربيه بقت زى الفل وبشغل التكييف بالساعات وبجرى وبسافر بيها ومش بتبطل زى الاول



عايز اقولكم المفاجأه

كنت فى الهند الاسبوع اللى فات
لقيت ان اكتر عربيه فى الهند هى رينو لوجان
تاكسيات وملاكى ومنتشره بطريقه رهيبه اكتر من الفيرنا واللانوس عندنا

وعاملين فيها شغل حلو جدا وعندهم كماليات جديده وحركات

وسألت سواق تاكسى معاه لوجان هناك عن عيوبها الراجل شكرلى فيها وقال ان برضه فيه بعض السواقين اشتكوا من حاجه زى المشكله اللى كانت عندى

بس دا كان فى الاول من كام سنه وبعد كده اتعالجت

وحاليا اللوجان بتتجمع فى الهند وهى العربيه الشعبيه الاولى هناك