الموضوع: صيانة الـ 15 ألف و تزييق العفشة

السلام عليكم و رحمة الله و بركاته

أزيكوا يا أجدع وحوش

كان عندي مشكلة قارفاني بصراحة و هي أن كان في صوت تزييق بيطلع من العفشة لما بكون ماشي ع أرض مش مستوية أو مطبات كتير ورا بعض و دول طبعاً ما أكثرهم في طرقنا الجميلة

و سألت كتير من وحوشنا و طبعاً ما بخلوش علينا بمعلوماتهم و نصحوني بغسيل العربية من تحت و كان في كلام كتير في الموضوع ده هل تتغسل جاز بس و لا جاز و زيت و لا ميه بس توهت بصراحة و ما بقتش عارف أي رأي فيهم الأصح

المهم كان عندي صيانة الـ 15 ألف قولت أجرب فرع القطامية الجديد

روحت الفرع الجديد لقيته حاجه جميله و نظام جميل مش هتكلم عليه تاني لأن في وحوش كتير أتكلمه عليه بس هو فعلاً فرع محترم أحسن من المقطم كمان

طولت عليكوا معلش بس بحب أقولكوا كل حاجه بالتفصيل عشان الكل يستفاد قديم و جديد

لما المهندس إستلم العربية مني سألني العربية بتبطل معاك أو الأر بي إم بيعلى و يوطى لوحده قولتله لا و سألته ع سبب السؤال قالي الماتور مش مظبوط و قالي هنظبطه
و كمان قولتله ع موضوع التزييق ده و صفارة الهواء ع السرعات العالية

خلصت الصيانة و لله الحمد و التزييق راح بنسبة 80% و صفارة الهواء كمان راحت و كان عندي فرده من الكلاكس ضربت قالولي هنغيرهالك في الضمان بس هي مش موجوده دلوقتي

بعدها بيومين لقيت تليفون من فرع القطامية بيتابع معايا الحاجات اللي أتعملت و قولتله أن التزييق راح بنسبة 80% قولتله أغسلها بالجاز و الزيت من تحت قالي ما تعملش أي حاجه و هاتها تاني ، إن شاء الله هروحله يوم السبت عشان الموضوع ده و كمان الكلاكس و في حاجه تانيه بسمع صوت خبطة من عند العجل في الخلف لما اكون اعدي على مطب بسمع الصوت من ورا

حبيت أقولكوا الحل اللي الحمد لله ريحني نفسياً و ظبط العربية كتير و اللي أكيد بيواجه ناس كتير

أسف لو طولت عليكوا

اللهم صلي و سلم على سيدنا محمد و على آل سيدنا محمد

بص شيل موضوع الاسطوانة من دماغك خاااالص دلوقت مهما حصل واتعلمت على العربية احتمااال بسيط جدا ان الاسطوانة يكون جرالها حاااجة .... وفي ناس تقولك هات رابع وحاول تطلع عليه لو العربية ميشت يبقى الاسطونة باي باي بس سيبك من الكلام ... طالما مافيش رجة وانتا بتطلع على الاول او انخفاض في عزم العربية وارتفاع في الاربي ام على الفاضي يبقى انسى ..... الهبدة خليهم يربطو عفشة الاول