أجيب عربية أوتوماتيك ولا مانيوال ؟

**Ghosts** · 22-12-2011 10:46 PM

محتااااار جدآ يا جماعة ....
أجيب عربية أوتوماتيك ولا مانيوال ؟

هو طبعآ الأوتوماتيك مريحة فى بلدنا اللى المرور واقف فيها ليل ونهار ....
بس اللى خايف منة هو أعطال الأوتوماتيك اللى سمعت أن تصليحها بيبقى أغلى من المانيوال بكتير ....

ياريت كل اللى عندهم عربيات أوتوماتيك يقولوا لنا على خبراتهم ....
وخصوصآ موضوع الأعطال دة ....

**sabregas1978** · 22-12-2011 11:03 PM

انا هاحكيلك تجربتى الشخصية باختصار
انا كان معايا لانوس 2007 مانيوال طبعا (زيرو) وبعتها وحجزت نيو اكسنت مانيوال وكان نفسى اركب اوتوماتيك بس كنت خايف زيك بالضبط من اللى بسمعه عن مشاكل الاوتوماتيك
وبعد ما سألت كل اللى كان بيقابلنى راكب اوتوماتيك وكان بيطمنى اتكلت على الله وغيرت الحجز الى اوتوماتيك والعربية معايا من سبتمبر 2009 وزى الفل مفيش اى مشكلة نهائى مع العلم انى مواظب على الصيانة فى التوكيل
فنصيحتى ليك هات الاوتوماتيك وبالمحافظة عليها هتدعيلى

**Land_Cruiser** · 22-12-2011 11:10 PM

الكلام ده كان فى التسعينات و الخوف من الاتوماتيك لكن دلوقتى معظم العربيات بتنزل اتوماتيك بدون مشاكل و أريح مليون مره. هى المشاكل للفتيس هتلاقيها للفتيس dsg بالذات لكن غير كده شغال و لازم. بس البطاريه تكون كويسه علشان الاتوماتيك زى ما انت عرف ما بيتزقش

**zocor742** · 22-12-2011 11:15 PM

بصراحة الاوتوماتيك بقى مهم جدا خصوصا الزحمة اللى مايعلم بيها الاربنا
بس ياباشا عمتا الاتوماتيك بيحتاج صيانة واهتمام اكتر من المانيوال ومتابعة الزيوت والفلاتر
اهم حاجة خليك فى الزيرو فى الاوتو

**Ghosts** · 22-12-2011 11:20 PM

المشاركة الأصلية كتبت بواسطة sabregas1978

انا هاحكيلك تجربتى الشخصية باختصار
انا كان معايا لانوس 2007 مانيوال طبعا (زيرو) وبعتها وحجزت نيو اكسنت مانيوال وكان نفسى اركب اوتوماتيك بس كنت خايف زيك بالضبط من اللى بسمعه عن مشاكل الاوتوماتيك
وبعد ما سألت كل اللى كان بيقابلنى راكب اوتوماتيك وكان بيطمنى اتكلت على الله وغيرت الحجز الى اوتوماتيك والعربية معايا من سبتمبر 2009 وزى الفل مفيش اى مشكلة نهائى مع العلم انى مواظب على الصيانة فى التوكيل
فنصيحتى ليك هات الاوتوماتيك وبالمحافظة عليها هتدعيلى

أحكيلك أنا بقى عن تجربتى ....
أول ما قررت أشترى عربية سئلت واحد معرفة شغال محاسب فى غبور ....

أشترى أوتوماتيك ولا مانيوال؟
من غير تفكير قالى مانيوال وبلاش أوتوماتيك عشان تصليح أعطالة بتبقى غالية أوى ....

طبعآ قفلنى من الأوتوماتيك وأشتريت المانيوال ....
بس أنا فعلآ تعبت من الدبرياج ودة اللى خلانى أفكر فى الأوتوماتيك بس متردد ....

**sabregas1978** · 22-12-2011 11:27 PM

طيب ماهو انا كمان عربيتى من غبور وسالت اكتر من مهندس من الشركة نفسها وصدقنى نصحنى بالاوتوماتيك وهى معايا تحفة بجد

**IronHead** · 22-12-2011 11:42 PM

المشاركة الأصلية كتبت بواسطة wshawky

الكلام ده كان فى التسعينات و الخوف من الاتوماتيك لكن دلوقتى معظم العربيات بتنزل اتوماتيك بدون مشاكل و أريح مليون مره. هى المشاكل للفتيس هتلاقيها للفتيس dsg بالذات لكن غير كده شغال و لازم. بس البطاريه تكون كويسه علشان الاتوماتيك زى ما انت عرف ما بيتزقش

كلام مضبوط 100 ال 100, اضيف على القايمه السوداء DSG + اوتوماتك البيجو الجديد فيما عدا الموديلات العاليه اللى الفتيس بتاعها system porsch

**IronHead** · 22-12-2011 11:46 PM

لو انت من سكان المحروسه قاهرة المعز يبقى اوتو بلا ادنى شك, انت هتحس بالنعمه فعلا لما تتطلع كوبرى اكتوبر الساعه 6 بليل والكوبرى واقف من اوله لاخره,
اهم حاجه فى الفتيس الاوتو تغيير الزيت فى معاده ومتقضيهاش كيك داونات عمال على بطال.