الموضوع: بولو , ابيزا , و لا جوليت

المشاركة الأصلية كتبت بواسطة himalking

شكرا على الرد
يعنى انت تقصد الابيزا 2001 تعمل حوالي 32000 جنيه
و الجوليت 2001 تعمل 35000 جنيه ؟

مش عارف حاسس الأسعار كده رخيصة أوي , أصلي دخلت على كونتاكت كارز لقيتهم بيعدو 41000 و بصراحة أنا حاسس برضو انهم كده غاليين

أنا مدعوك ف السوق وانا بابيع اللانوس وقبلها جولف 2 وبوينتر والكلام اللي باقولهولك ده عن ثقة. لو جبت واحد بتاع بيع وشرا بجد يجيبلك حالة حلوة ممكن رشة حزام وتكشف ع الدواخل عند سمكري كويس وتجيبلك ال35 باكو. وخلي بالك أنا قلتلك لو حالة شاذة أو خليجي حاتعلي ف السعر. يعني اللي معاه فابريقة برة وجوة وماكملش بيها مثلا سبعين تمانين ألف كيلو ممكن يحط ف الاعلان 40 ولا 42 ألف وفي الآخر الكلام يرسي علي 38 مثلا لأن انت عارف ان كل ده بيبقي بداية كلام. واللي بيحط سعر عالي ف عربية مضروبة بيبقي علي أمل ان حد غشيم يشوف السعر عالي فا يقتنع ان حالتها كويسة وبعد ما يشتريها باسبوع يكتشف المصيبة.
تاخد بالك وتاخد معاك واحد بيفهم ف الحاجات دي عشان أولا ماتتخمش (أنا اخدت قفا كبير ف اللانوس رغم ان عندي خبرة شوية ف شرا كام عربية قبلها) وعشان هو بيعرف يتعامل ف موضوع السعر.

طبعا مع كامل احترامي للأراء السابقة

بس ماينفعش تسيب البولو علي جنب
الا لو شايفها ماينفعش تتقارن بالأبيزا والجوليت

البولو عربية محبوبة لأبعد الحدود وموديل 2001 من اكتر الموديلات المطلوبة فيها والي اثبتت كفائة غير مسبوقة ليها يليها طبعا الموديل الشهير البولو فوكس 1995
السعر لن يقل لأي سبب من الأسباب عن 42000

الأبيزا 2001
بنت عم البولو ومشتركة معاها في كل حاجة من الموتور للشاسيه للتعليق للعفشة لألات الجر للفتيس وفي الموديلات لحد 98 في الطابلوه كمان والكراسي
ينطبق عليها مع يقال عن البولو من وفرة قطع الغيار المعمرة ولكن بسعر اغلي شوية من الكوري في مقابل العمر الأفتراضي

ماقولتش انها "ماينفعش" تتقارن بالابيزا والجوليت.. بس تعالي قارن بين البولو والابيزا حتلاقي ان اعتمادية الابيزا ف مصر أعلي. احسبها معايا:
الابيزا زي الجولف 1و 2 والسيفيك 92 والكريستالة وغيرهم. رغم انها بتقدم بس سعرها ماسك نفسه عشان الشباب بيفضلها ف تسقيط موتور ولعب فيها وخلافه. الكلام ده كمان يخلي قطع غيارها متوفرة بشكل أوسع شوية عن البولو (قصدي في الحاجات اللي تفرق بينهم) كمان رغم اني ماجربتش واحدة منهم لفترة طويلة بس اتجاه الشباب كلهم ف التعديل للابيزا عن البولو بيثبت أكتر ان اعتماديتها أعلي (هنا ف مصر ع الأقل) وعلي الأساس ده طالما ان اتنين محسوم أمرهم ف واحدة منهم يبقي ناخدها ونسيب التانية.. كدا ولا اييه؟

تعديل: لو قصدك وقصد صاحب الموضوع علي الجولف 2001 سواء اللي كشافاتها كبيرة شوية أو العيون... انساااا... قطع غيار نار والعربية مش منتشرة وماحدش حايبيعها بأقل من 42 ولا 43 ألف.. ولو واحدة 1400 ممكن توصل 46 أو أكتر.

الجوليت (لانوس)
عربية جميلة اوي ومحبوبة اوي للبنات قبل الشباب
أخر الرجال المحترمين في عائلة دايو
قطع غيار متوفرة وببلاش
غير اقتصادية في البنزين بالمقارنة بالبولو والأبيزا
اوسع من حيث الشنطة فقط مقارنة بالأبيزا

1- البولو أشيك
2- الأبيزا أأمن
3- الجوليت أوفر

دي وجهة نظري المتواضعة وطبعا انا مادتش العربيات دي حقها ولكني كنت برد علي مقولة استبعد البولو من المقارنة

والله المستعان

برضه قبل ما أعلق علي دي حارجع أقولك سبب استبعاد البولو من المناقشة "فقط" هو ان الابيزا تكسب من أي اتجاه. زي بالظبط لما نقارن كورولا 97 بكريستالة 97 مثلا ومعاهم حاجات تانية. أول حاجة حاعملها حاستبعد الكورولا لأن بنظرة تعرف ان الكريستالة تحل محل الكورولا.. مجرد رأي برضه.
وبعد اذنك برضه موضوع الشياكة برضه مجرد رأي.. الابيزا دايما باحترم اللي صممها لأن لو ضيفتلها عتب علي سبويلر ورا تحس فجأة ان العربية كبرت ماعرفش لييه. برضه الجوليت اعمل الفوانيس فيميه والزق خطين من الباب كدة بطول العربية تحس انها بقت حاجة تانية خالص. لو بصيت للبولو للأسف مش حاسسها كدة ف أي تعديل ولا اي حاجة.. كتيرها تعلقلها معطر علي المراية وشكرا.