الموضوع: جددت الرخصة (بدون اكراميات ولا وسايط ) في ساعتين بس :)

السلام عليكم يا اهالي المنتدى الكرام

وحشني المنتدى بعد غيبة طويلـــــــــــــــــــــ ـــــة لمدة 10 ايام تقريبا نظرا لظروف صحية و قلت لازم اشارككم اخر الاخبار

اكتشفت بالصدفة البحتة من تلات اسابيع كدا ان رخصتي انتهيت و انها دخلت في شهر السماح و طبعا كان لسة في موال تجديد التامين و جواب البنك و الحوارات دي عشان العربية بالتقسيط بس الحمد لله كلمت شركة التأمين لاقيتهم جددوا البوليصة تلقائيا و بنسبة كويسة كمان و الورق كله خلصان و جاهز الحمد لله

روحت شركة التأمين دفعت المعلوم ( 2667 جنيه باتمام و الكمال ) و خدت الورق و انا منشكحة و طلعت عالبنك و اديت الموضف الورق قاللي ماينفعش طب ليه كدا يا عم ما احنا كنا كويسين قاللي عشان الورق مش طالع برقم اللوحة و دا ماينفعش غير في اول سنة فقط لكن بعد كدا لازم رقم اللوحة يبقى مثبت في الورق و دا لمصلحتك و كدا قلتلو شكرا جزيلا و كان اليوم خلص فا كلمت شركة التأمين و قلتلهم ازاي انتو مش عارفين الاجراءات و بتطلعو الورق ناقص قالولي طيب ابعتيلنا صورة الرخصة من اي فاكس جنبك و بكرة هايكون ملحق برقم اللوحة جاهز من 11 صباحا تتفضلي تستلميه و فعلا قد كان

بعتلهم الفاكس و روحت تاني يوم الساعة 11 و شوية لاقيت الروقة جاهزة و الشركة فعلا معاملتهم محترمة جدا لحد دلوقتي
و خدت الملحق اللي برقم اللوحات و طلعت عالبنك و خدو مني الورق و قالولي اسبوع و هانكلمك نقولك تعالي خدي جواب البنك و دا اللي حصل فعلا و ساعتها ماكنش فاضل غير كام يوم و الشهر المهلة اللي بعد تاريخ انتهاء الرخصة يخلص فاقررت اني اروح يوم الخميس بدري عشان الحق اخلص

عادة عندي واسطة في مرور فيصل بتخلصلي كل حاجة علطول و لو مش موجود بنفسو بيبعتني برضو لامين شرطة هناك يخلصلي الدنيا و ياخد الاكرامية ، بس المرة دي نويت اني لا استخدم الواسطة ولا ادفع اي اكراميات لاي موضف ولا اي حد يخلصلي الورق _ تقريبا ضميري نقح عليا عشان داخلة اعمل عملية بعدها بكام يوم - المهم توكلت على الله و قلت يا انا يا المرور و سبحان الله دخلت من باب المرور الساعة 10:05 صباحا و كنت مخلصة كل حاجة و خارجة الساعة 12:05 مساءا بالظبط يعني الحكاية كلها ساعتين بالظبط

الدنيا كانت رايقة اصلا و السيدات مش كتير و الحمد لله بس موضفة الشباك قعدت تقوللي اي خدمة و انتي تؤمري قلتلها الامر لله و جزاك الله خيرا و سيبتلها الملف و مشيت و الحمد لله لما الواحد بينوي مايعملش حاجة غلط ربنا بيسهللو الامور و كان عندي استعداد والله اقعد 6 ساعات حتى بس اخلص المصلحة بما يرضي الله و الحمد لله خلصت و انا مبسوطة و راضية جدا و الحمد لله

عقبال عندكم جميعا