كاوتشة الكوبلن الشمال

**mostafabakry** · 15-01-2012 09:56 PM

السلام عليكم و رحمة الله و بركاته

من حوالي 10 ايام لاحظت اثار زيت علي المقص الشمال و انا ببص عالعربية من خلال الكبوت لمجرد الاطمنان
استغربت من الزيت دا فرحت مادد ايدي اشوف ايه الزيت دا لقيته سميك و تقيل واكتشفت انه شحم مش زيت

حاولت اعرف مصدره من فين معرفتش و قلت يمكن عادي لما العربية كانت في التوكيل بتغير القنطرة جايز يكون الصنايعي ايده فيها شحم و لاحاجة خصوصا و انه شحم مش زيت وكل مستويات الزيوت كويسة مش ناقصة و بصراحة انا معرفس ايه اللي ممكن يكون فيه شحم في العربية

غسلت العربية في المغسلة و خليت الواد بتاع الغسيل يضرب مسدس الميه في العربية من تحت عشان ينضفها كويس و اشوف ان كان فيه شحم تاني هيظهر

النهاردة قررت اني اسافر بالعربية لقاهرة عشان اوديها لمركز خدمة رينو المقطم عشان يشوفوا حل للونه اللي بتظهر عندي و مش عارفين ايه سببها لان العربية خلاص علي اخر الشهر هتكمل 3 سنين و هتطلع برا الضمان و اغني انا ظلموه بعد كدا

قلت اروح اطمن علي اثار الشحم دا قبل ما ادب مشوار القاهرة و يكون فيه مشكلة ممكن تكبر

رحت مركز خدمة صن جير الاقصر و هناك قالولي ان كاوتشة الكوبلن الشمال الداخلية ناحية الفتيس مقطوعة و الشحم بتاع الكوبلن هو اللي بيطلع برا و غلط انك تسافر بيها لان السحم ممكن كله يطلع و التراب يدخل مكانة و يعمل مشكلة في الكوبلن و عملولي البحر طحينة و انا اصلا خواف بطبيعتي و ما بحبش امشي بالعربية و يكون فيه اي حاجة مش مظبوطة

انا سألت علي الكاوتشة و لقيتها 320 جنيه بالضريبة غير مصنعية تركيبها و مش عارف كام المصنعية هتكون

الكاوتشة اتشحنت من القاهرة و هتوصل بكرا الاقصر

ايه رايكم في الموضوع دا

معقولة حته كاوتشة ب 320 جنيه ؟؟؟؟ و هل فعلا غلط اني اسيبها و اسافر القاهرة و اغيرها في المركز الرئيسي بالمرة طالما ان رايح هناك

الواحد خلاص جاب اخره من مصاريف العربية الشهر دا

انا لسه دافع 5000 جنيه بعد الحادثة و غيرت قنطرة و سمكرة و دوكو و طمبورة تكييف و بلا ازرق علي دماغي
و للاسف مقدرش استغني لحظة عن العربية

**amr.elsayed** · 15-01-2012 11:06 PM

ربنا معاك يا مصطفى باين عليك واخد عين صح
ونصيحة منى يا مصطفى لو حسيت بحاجة فى العفشة تروح تكشف على العربية عند عفشجى كويس
لان عايز اقولك ان الحاجة اللى بتتعمل برة التوكيل ب 30 جنيه بتتعمل جواه ب 300 على طول

**wassim_nasser** · 16-01-2012 01:33 AM

بص يا باشا هو كلام عمرو مظبوط .. قطع الغيار اسعارها معقوله بس الكارثه كلها ف مصنعيات التركيب .. انا كان عندي العتبه اليمين متبهدله وفكرت اروح اغيرها ف التوكيل لقيتها ب 350 بالضريبه ومصنعية تركيبها 800 جنيه! .. رحت سمكرتها ورشيتها ف ورشه محترمه بره ب 250 .. بس برضه ارجع اقولك ده كوبلن يعنى حاجه حيوية و إهمالها فيه خطر عليك وان عملتها ف التوكيل يبقى أضمن عشان مش هاتتعبك قدام ..

**dr_mohamed16** · 19-01-2012 10:04 PM

فكرتنى يوم لما روحت غير كاوتشت الكوبلن بتاع ال 127
كانت ب 7 جنيه :))

**Ahmed A Rahman** · 20-01-2012 11:37 AM

دور عليها بره

كاوتشة المقص في التوكيل مش موجودة لازم تغير المقص

المقص في التوكيل بحوالي 500 جنيه
المقص التركي في كل حته ب 175 جنيه

كاوتشة المقص بتتباع لوحدها ب 45 جنيه تركي