الموضوع: الموضوع فعلا مش سهل ومحتاج نصيحه

المشاركة الأصلية كتبت بواسطة ayman1204

اللوجان علشان معايا فانا هقولك كل عيوبها ومميزاتها واللى بكتبه على طول

ألكلام النهائي فى
رينو لوجان
اوربي ( فرنسي - رومانى ) تقفيل المغرب
اهم المميزات
اهم واحدة >> عالية عن الارض بطريقة فظيعه مش هتحك مع اى مطب حتى لو محمل 6 فيها والشنطة مالينة على الاخر
مصفحة من تحت كمان عند حوض الماتور ودا مش موجود فى فئتها
من ضمن العربيات القليلة اللى تحت الـ 100 الف نازلة بكاوتشات 15
العربية الوحيدة اللى شفتها لحد دلوقتى المرايات بتعتها دينميكية مش بتكسر بتروح مع الخبطة وترجع تانى
عفشة نعمه مالهاش زى
انعم دبرياج هتشوفه فى حياتك
كمبيوتر رحلات ( معرفة استهلاك البنزين ومدة الرحلة وكم البنزين المتبقى .......الخ ) ومش موجود فى عربيات لحد الـ 120 الف
اير باج
مستوى امان 3 نجوم
اوسع شنطة 510 لتر
امان تام على السرعات العالية ودا بتجربة بنفسي على الـ 180 وبغرز وكنا 6 فى العربية والموضوع بالتوقيع
موفرة فى البنزين بسبب ان الماتور 8 صباب ( يفضل بنزين 92)
اوسع صالون فى فئتها واوسع تانك بنزين اكتر من (60 لتر بالاحتياطى )
صاج اللوجان صاج قوى والاقوى برضوا فى فئتها
طبعا فى اوبشنز تانية يختلف على حسب اذا كنت هتجيب هاف او فول اوبشنز
ألصيانة الدورية مع التوكيل كل 5000 كيلو مرة مجانا ومرة بفلوس ودا هيخليك ما تفتحتش كبوت العربية حتى 100 الف كيلو *


العيوب ( ومش هنسميهاعيوب ) هنسيمها حركات غلسة بس هتتعود عليها

الكلاكس فى درع الاشارة
زارير الازار فى التابلوة
ازاز الشباك اللى وراؤ بيفتح لحد التلت ودا علشان الامان للاطفال علشان هى سيارة عائلية
تنك البنزين والشنطة بمفتاح
ترجيع الكراسي بتقعد تلف البكرة
صوت الماتور عالى سنة
الباور تقيل شوية ودا لثبات العربية على السرعات العالية
رعشة بسيطة ببعض الموديلات فى دواسة البنزين اول لما تستلم السيارة وبتختفى لوحدها بعد تليين السيارة اول 5000 كيلو

على فكره انا متفق معاك فى كل اللى قولته بس انا دايما لما أسوق اللوجان بحس انى سايق عربيه نوعا ما مش حديثه .. بص انا دايما بسوق نوبيرا تمام .. لما أجى أسوق اللوجان اول حاجه وضعيه كرسى السواق ( ودى مش ف اللوجان بس دى فى معظم الرينو بيبقى تصميم العربيه قابب لقدام لانك لو بعدت شويه وبصيت على العربيه من بعيد هتحس انها جايه بأرتفاع من ناحيه الشنطه ثم تنزل تدريجيا لتحت ف القعده الداخليه بتاعتها من قدام تحس انك وانت راكب الكرسى الامامى قاعد مستريح تمام وكل حاجه بس برضه فى ميلان لقدام كده او حاجه غلط فى القعده ( على فكره انا بكلمك على تجربتى واستخدامى للوجان من 2010 وحتى الساعه 6 صباحا اللى هيه من ساعه ونص فاتت ) عشان بس متفتكرش انى ركبتها مره او اتنين ف مش متعود عليها
برضه الفتيس تحس انك بتوطيله سنه صغيره كده عشان تنقل النقله او تتنى ظهرك شويه لقدام
من الكنبه الخلفيه .. دى بقى لازم تحس انك قاعد فوق اللى قدامك .. لازم مهما حصل تكون اعلى منه لدرجه انى بحس ان اللى راكب ورا لو بص قدام هيشوف على مستوى بصره سقف العربيه من جوه اللى هوه ناحيه الشماسات ...
ضيف على اللى سبق الدركسيون .. مش عارف ليه مش عاملين دركسيون باور ! والله لو كان اتعمل باور كانت هتبقى تحفه ( انا شفت ردك طبعا اللى هوه بتاع الثبات على السرعات ) لكن ده مش منطقى بصراحه لان اللى بيبقى كده بيبقى خفيف فى الركنه يعنى وانا بركن مثلا هتلاقيه خفيف جدا Full Power وانا بجرى يتقل عشان الدركسيون يبقى أثبت .. لكن هوه فى الحالتين نفس الكلام ونفس الدرجه ( اللى بتتكلم عنه ده اللى موجود فى البونتو 2002 مثلا اللى اسمها City Power ) ...

بالنسبالى ميزتها الرهيبه ارتفاعها الجبار ووسع صالونها جدا واستهلاك البنزين فى اللوجان حاجه خياليه بصراحه !!
قطع الغيار مش ببصلها اوى اما اجى اركب عربيه ف مش هتكلم عنها

موضوع الثبات عنه مش هتكلم برضه لان مش كل الناس بتجرى بس هيه من أحسن العربيه فى الفئه بتاعت ال 70 الف

بس حبيت أوضح كل حاجه فيها من وجهه نظرى و هيه من الاختيارات اللى تناسب الطرق المصريه جدا

لصاحب الموضوع وده رأى الخاص بعد ما وضحت اللى فات .. لو انا معظم طرقى نظيفه زى صلاح سالم مثلا مفهاش مطبات عاليه وبمشى فى طرق كويسه مثلا او بسافر كتير فى طرق نظيفه برضه هشترى الصنى
لو بحمل العربيه كتير وبمشى فى طرق نوعا ما مش ممهده اوى وممكن مطب يحك فى العربيه ساعتها هجيب اللوجان