النهاردة شوفت موقف دايقني وندمان اني متصرفتش

**eng.m7md.ali** · 23-01-2012 06:30 PM

النهاردة راجع من اكتوبر على الدائري وعند نزلة الطريق الزراعي او شبرا الخيمة شوفت عربية كيا سيراتو عاملة حادثة وطالعة على الرصيف الفاصل بين النزلة والطريق الدائري
وانا معدي بقى شوفت كام واحد كدة راكنين تروسيكل قدام العربية وشغالين تقليب فيها
فكوا الفوانيس والمرايات والجنوط ال 17 وكل ده لقطه كدة يادوبك ثانيتين بس وتنحت من اللي شوفته ومخي وقف مقدرتش افكر انزل ولا منزلش خصوصا اني معايا عصاية البيسبول
وانا مكمل في طريقي لقيت عربيتين لوجان شرطة وموتوسيكل واقفين على اليمين ونزلت طبعا اقولهم على اللي شوفته ولا حد فيهم اتحرك وردهم كان ( اتصل ب 122 وبلغ )
مشيت طبعا وانا قرفان من اشكالهم روحت ماسك الموبيل واتصلت على 122 وبلغت على اللي شوفته
بس حاسس ان محدش اتحرك ولا عمل حاجة وزي مايكون كدة بتاع التروسيكل ده واللي معاه خلعوا قبل ماحد يوصلهم
وحسبي الله ونعم الوكيل انا بجد مخنوووووووووووووق جدا
ياريت اللي يعرف حاجة عن الموضوع ده او لاحظ حاجة يقول

**ahmed_h_g** · 23-01-2012 06:33 PM

أنت كده عملت الصح
ممكن لو كنت وقفت وحد فيهم معاه سلاح كانوا قلبوك أنت كمان

**ahmed_h_g** · 23-01-2012 06:41 PM

المشكله ان الناس بتخاف ومفيش حد عنده أستعداد يصلح الغلط
الناس بتحب تتفرج فقط يعنى لو حادثه أو أى شكل مقرف تلاقى الطريق أتقفل من الناس علشان الناس عايزه تتفرج وتصور الحادثه
لكن لو موقف زى ده لو وقفت مفيش حد هيقف معاك كله هيقول يا نفسى

**el_nahal2004** · 23-01-2012 06:45 PM

مكنش ينفع تعمل غير الى انت عملته
الا كدة كان هيبقى عليك ريسك جامد
وهما اكتر من واحد
هو كان فى حل كنت ممكن افكر اعمله لو انا مكانك
اروح اتكلم مع ناس شايفة الموقف معاك استجدع اتنين تلاتة كدة وانا معاهم
وفى ناس مابتوصاش وعايزة تطلع غلها فى الناس دى مثلى تماما
ونروحلم ونظبطهم العلقة التمام
وناخدهم على النقطة الى حضرتك بلغت فيها دى

**Donzi** · 23-01-2012 06:53 PM

انت مش غلطان و خاصة انك لوحدك بس لو كان معاك اتنين تلاتة صحابك ولا حاجة كان ممكن تحاول تخوفهم عشان يمشوا قبل ما يكملوا على العربية كلها

و ربنا يسهل و الشرطة تتعدل بقى عشان نعرف نعيش في امان