مفيش حد ادامة فيات 124 سبور كوبية للبيع

**mego_100** · 28-01-2012 03:28 AM

مفيش حد ادامة فيات 124 سبور كوبية للبيع على شرط تكون كل حاجتها الاصلية موجودة فيها
و مش متعدلة التعديلات العجيبة اللى بنشوفها

**engahmedsamy** · 28-01-2012 05:00 PM

صعبة اوي

**mego_100** · 31-01-2012 08:20 AM

مش صعبة ولله , موجودة لكن بشوف حالات سيئة

**DONYO** · 31-01-2012 10:57 AM

اعتقد ال 128 سبور نفس الشكل تقريبا ومنتشرة اكثر نسبيا لكن 124 قليلة قوي

**w-m-a** · 31-01-2012 11:23 AM

شوف ده
وربنا يوفقك
http://www.nilemotors.net/Nile/231233-124.html

**mego_100** · 03-02-2012 09:20 AM

الف شكر يا باشا بس انا بدور على واحدة مش معدلة يعنى نواكلها كاملة,اكسدماتها الاصلية,مش متغير شكلها

**aliyehia** · 05-02-2012 10:48 PM

كان معايا واحده مو 73 زيتى 1600 سى سى 110 حصان و مافيهاش اى لعب ما عادا جنوط سبور و فانوسين شبوره نيكل على الاكصدام و كل حاجه فيها شغاله ما عدا ساعه التابلوه
العربيه بصراحه كانت منظر و الناس توقفك فى الشارع عايزه تشترى
و غالبا الى سنه اقل من 30 سنه يسألك العربيه دى نوعها ايه رغم علامه الفيات الى على الكابوت
و فى السفر حدث و لا حرج 120كم/س دا العادى و مره وصلت ل 150 كم/س و خفت
الحقيقه انا بعتها من 5 شهور و جبت جوليت
و طبعا بتسأل ليه بعتها
فى الحقيقه انا ما كنتش بأبخل على العربيه فى اى حاجه و مدلعها على الآخر لكن المشكله بقى ان العربيه دى حاجتها قمه فى الندره
و مش بأقصد الموتور او العفشه ( نفس حاجه ال 132) لكن اقصد الاكسسوار الى بيميز العربيه القديمه و معتنى بيها عن العربيه القديمه و ضايعه و راكب لها اكر 128 و اكصدام فبر و فوانيس لانوس و دركسيون لادا ( كل ده شفته فى عربيات زى الى كانت معايا)
و الحقيقه انى ما كنتش اقبل انى اغير حاجه من الاصليه فى العربيه بحاجه من عربيه موديل مختلف و بصراحه و يمكن تستغرب ده انا طول ما انا كنت سايق العربيه بأبقى خايف من اى خبطه لا قدر الله تخلينى الف حوالين نفسى علشان فانوس او رفرف
قمت بعت العربيه و هى لسه بحالتها و مش معووره و ربنا يبارك للى اخدها ( ما اقدرش انكر انى ندمت انى بعتها لكن الحمد لله ) و لما غيرت جبت الجوليت لان ليها قطع غيار فى كل حته و اعتماديه و عاجبانى
و ربنا يوفقك لما فيه الخير

**mego_100** · 16-02-2012 04:00 AM

بعتها فعلا!!!!! لية بس كدة , ممكن صور ليها؟ و حضرتك ساكن فى مدينة نصر و تعرف ممكن اوصل للخدها ازاى ممكن يكون بيبيع
و بعتها بكام
شكرا جدا

**mego_100** · 16-02-2012 07:24 PM

حضرتك ساكن فى مدينة نصر جنب امن الدولة كدة؟

**aliyehia** · 17-02-2012 11:17 AM

مضبوط
انا ساكن فى مدينه نصر الحى السابع
و العربيه فعلا كانت مميزه جدا لكن زى ما قولت لك لازم تصرف عليها بدون تفكير
انا نسيت اقول لك انى اول ما اخدتها غيرت الفتيس ال 4 غيار ب 5 غيار بتاع بولونيز علشان الجرى فى السفر
و كمان جبتلها كربيراتير زيرو (تستغربها لكنه كان بعلبته اسبانى بتصريح من شركه ويبر)
و كورونا استيراد و كردان و دينامو
يعنى من الاخر لازم تصرف علشان تبقى مطمن و انت راكب ان العربيه عمرها ما تقل اصلها معاك
انا كنت شاريها من 3 سنين ب 16 الف و خلال ال3 سنين صرفت عليها حوالى 5 الاف فى الحاجات الى سبق و قلتها و بعتها ب 15.500 من حوالى 3 شهور
و الغريبه بقى انى دايما حاسس انى استمتعت بالى دفعته و مش خسران ابدا
اما بالنسبه للى اشتراها فلا اخفيك سرا انا حاولت اكلمه من شهر يمكن يفكر يبيع لكنى اكتشفت ان الرقم اتمسح من الموبايل و كل الى اعرفه انه ساكن نواحى مصر القديمه
عامه دور و ربنا حيكرمك