الموضوع: أستشارة سريعة بخصوص نقل ملكية وترخيص

المشاركة الأصلية كتبت بواسطة eng.geo

انا جايب عربية من أسكندرية تبع مرور المنتزة
الرخصة بأسم صاحبها لغاية دلوقتي والرخصة هتنتهي يوم 30
انا أساسا تبع مرور عبود
عايز أنقل ملكية وأرخص تبع عبود
مطلوب مني أيه بالظبط ؟
المفروض أروح لعبود الأول ولا المنتزة ؟
وايه الأجراءات عشان ماخبطش مشاوير كتير
ان شاء الله مسافر بكرة ... لو المفروض أسافر علي اسكندرية يعني

-عقد مسجل فى الشهر العقارى باسمك...

و خلى بالك هتحتاج شهادة بيانات من مرور العربية للشهر العقارى

لو روحت تسجلها بعد تاريخ انتهاء الرخصة.

-شهادة مخلفات من المرور التابعة ليه العربية

-غالباً و انت بتفحص هيطلب منك تعمل مطابقة بصمة و ديه هتضطر تروح المرور اللى العربية كانت فبه

عشان تعملها....بس مش لازم تروح بالعربية الموضوع ورق بيخلص ع حد علمى

و استنى شوف الناس هتقولك ايه برده

نقل الملكية:
1- روح مرور أبيس ف سموحة
2- طلع شهادة مخالفات تبع مرور المنتزة (طوسون)
3- اطلع علي مرور طوسون يوم كدة من الصبح
4- اركن العربية برة وادخل المرور المبني الرئيسي.. شوف رخصتك تبع أنهي واحدة من المكاتب اللي تحت وقولها عاوز أنقل ملكية وأجدد
5- حاتعملك حبة حاجات وتديك ورقة تروح بيها الخزنة ف نفس الهول وتدفع وتجيب ملف قول له نقل ملكية وتجديد وهو حايديك الورق كله.
6- اطلع برة خد العربية وادخل بيها الشارع الجانبي اللي جنب المرور.. حتلاقي الناس واقفة صفين طابور عشان البصمة.. ماتنساش تظبط الراجل ب 5 جنيه قبل ما يرفعلك البصمة عشان يطلعها نضيفة.
7- خد العربية وادخل بيها جوة المرور للفحص وخلافه. لما توصل مكتب الفحص ادي القزم اللي قدام المكتب الورق اللي حايقلك عليه من الملف ومعاه اللي فيه النصيب واطلع بالعربية برة.
8- ادخل تاني من غير العربية (دورها خلص) وخد الورق منه.. خد معاك بالمرة طفاية الحريق وشنطة الاسعافات واسأل علي مكتب الطفايات طلع منه شهادة صلاحية بالطفاية.
9- روح لأي مكتب تأمين وطلع شهادة تأمين بنفس عدد السنين اللي حاتجدد بيها.
10- خد الورق روح مكتب الظابط (اللي جنب مكتب الطفايات) وادي الورق اللي حايطلبه العسكري له عشان يديه للظابط يمضيه بالأحمر.
11- روح ادفع حق تجديد العربية بالمدة اللي انت عاوزها ومعاك طبعا ورق التأمين اللي انت دفعته في المكتب اللي تحت مش عند الخزينة.
ملحوظة (مش فاكر ترتيب رقم 10 - 11 كدة صح ولا العكس يا ريت حد يأكد)
12- لم بقي كل اللي انت عملته ده.. حتلاقي فيه ورقة ماحدش لمسها فيها بيانات مطلوبة منك تكتبها كلها ومنها مثلا اقرار انك ماعكش عربية تانية (عشان ضريبة الرفاهية) وكام حاجة كدة والله ما فاكرها معلش. لو مش عاوز تتكعبل اطلع الدور الأول واسأل حد من اللي بيسلمو الورق هناك ايه اللي تملاه بالضبط.
13- روح مكتب التصوير اللي علي جنب وهات ورقتين كمبيوتر.
14- دور ف المكاتب اللي ف الدور الأول والتاني عن المكتب اللي رخصتك تبعه. سلم فيه الورق وحاتراجع واحدة كل حاجة فيه. المشكلة الوحيدة اللي ممكن تقابلك انها ماتشوفش البصمة.. حاتديهالك تاخد معاك عسكري (دور علي واحد فاضي أو علي ساعي) وقوله عاوز الظابط يراجع البصمة واديله اللي فيه النصيب.. حايخلص هو ويجيبهولك.
15- هي بقي حاتكتب حاجات تبعها وتكتب ورقة الكمبيوتر وتديهالك. تنزل تسلمها ف المكتب اللي تحت خالص (الشباك اللي برة) وتستني لما ينادو عليك ومبروك الرخصة باسمك.

ورق حاتحتاجه
كام صورة بطاقة وكام صورة رخصة للعربية ونفس الكلام عقد البيع والتسجيل طبعا. و ع العموم مكتب التصوير هناك بيشهل ومافيش مشاكل. أهم حاجة خلي معاك قلم أزرق عشان الأقلام الزرقا بتخلص ف المكاتب اللي حوالين المرور بسرعة.

المفروض نقل المرور بتطلع شهادة بيانات وماعرفش اذا كنت بتسلم الملف ف نفس المرور أو في المرور التاني. اسأل الأول عشان ماخليكش تعمل خطوة وترجع تقول اني دبستك. أنا نقلت ملكية من طوسون لطوسون ماغيرتش المرور.

للأسف دا كل اللي أقدر أفيدك فيه. وبالتوفيق ان شاء الله.

ملحوظة: روح بدري عشان استلام الأوراق بينتهي الساعة 12 ونص يعني تسلم الملف قبل 12 ونص وبعد كدا استلام الرخصة أو شهادة البيانات مش مشكلة.

المشاركة الأصلية كتبت بواسطة eng.geo

شكرا يا باشا
انا كدة أول حاجة هروحها هي مرور المنتزه عشان أجيب شهادة المخالفات وشهادة البانات وأعمل مطابقة بصمة
تمام كدة ؟

ما دام العقد موجود يبقى مش هتحتاج شهادة بيانات للشهر العقارى و لا ليك اى تعامل معاه من اساسه

اللى هتحتاجه شهادة المخالفات و ممكن شهادة بيانات للمرور لو الرخصة انتهت قبل ما ترخص (غالباً)

موضوع مطابقة البصمة ده ع حد علمى مش انت اللى بتطلبه ...ده لازم بيديك بيه ورقة المرور هنا و انت بتفحص و بعد كده ترح المرور القديم تعمله

هو المفروض ان موضوع مطابقة البصمة فى حالة النقل من مرور لمرور ده كان بيبقى بظروفه و مش دايماً ...و حتى لو مطلوب كان ممكن تتعامل و تتخطاه

بس انا سمعت من كذا واحد بيرخص انهم مشددين عليه عشان العربيات المسروقة بهبل

و بالتوفيق ان شاء الله

المشاركة الأصلية كتبت بواسطة eng.geo

طاب اللي انا فهمته من العضو crayvor
اني هعمل كل حاجة في مرور المنتزه
حتي الترخيص هيبقي هناك
وهنقل الملفات وكل حاجة من خلال المنتزة لعبود
انا كدة شكلي أتلخبطت ولا أيه ؟

بص يا هندسة ...انا مش عارف بصراحة هل العضو الفاضل قصده زى ما انت فهمت

و لا هو اساساً مش منتبه لنقطة انك تبع مرور تانى فى محافظة تانية

انا عن نفسى عمرى ما سمعت و لا ييجى فى خيالى انك ترخص عربية تبع القاهرة فى وحدة مرور فى اسكندرية!!

بس برده لأنى كل شىء وارد وانا مش ضليع فى الموضوع فجايز يكون فيه حاجة احنا مش فاهمينها


بس انا راضى ذمتك....ينفع تخلص مصلحة من نفس المكان من غير مرمطة و مشاوير رايح جاى؟؟

و تستريح كده بالساهل ...طيب لو استريحت قولى وقتك يضيع ازاى؟؟

طيب بلاش ..فرضاً هما حبوا يريحوك....طيب فين استمتاعك بالرخصة بعد ما تخدها بالساهل؟؟

بذمتك هتبقى سعيد كده و انت مطلعها من غير بهدلة و شحتفة!!!!