الموضوع: تحذير هام لساكني العبور 4-2-2012

تحذير هام..........................
من ساعة تقريبا حوالي 10:15 و انا طالع من العبور اول ما طلعت علي الطريق لاقيت موتسيكل لازق في الجنب الشمال وعمال يدي سارينة .....بصيت في المراية لاقيت واحد ضخم و اسمر ولابس نظارة سمش وبصراحة شكلة غلط.
المهم جة جنبي و بيشاور علي الفرة اللي ورا بما يعني انها نايمة او فاضية ...المهم هزيت راسي بما معناه طيب شكرا.
لاقيتة جه قدامي وادي اشارة يمين و ابتدي يهدي اللي هوة يعني تعالي ورايا.

انا رحت دايس دبرياج و حرقت حرقتين جامدين فهو اتخض و راح واخد يمين و انا كملت علي طول.
بصيت في المرايا لاقيته لما لاقني ما وقفتش راح لافف عشان يرجع نفس المكان اللي جالي منه تاني.

انا كملت و حاسس ان العربية عادي و عشان اطمن دخلت البزنينه اللي بعد العبور ووقفت في الماركت و نزلت لاقيت مافيش اي حاجة خالص.

الموضوع دة كان في اتجاة القاهرة

عشان كدة بحذر يا جماعة في الظروف الغير عادية اللي احنا فيها لازم رد فعلك ما يكونش عادي
زمان في موقف زي دة كان ممكن اقف و انزل اشوف لاكن دلوقتي مستحيل و في داهية ستين فردة كاوتش.


انا ما كنتش عارف احط الموضوع فين لاني نفسي اكبر عدد يشوفوة دلوقتي يمكن ربنا يجعلنا سبب ان ما حدش يتأذي او تتسرق عربيتة و شكرا
مهندس احمد عزمي