الموضوع: عيادة بدون ترخيص... فتوى من طبيب

المشاركة الأصلية كتبت بواسطة shnory

تقريبا علي قد ما اعرف
بتعمل سجل تجاري وبطاقه ضريبيه للمكان
ولو حد كلمك بتقوله انك لسه ماشي في اجرائات الرخصه

عارف قصة الحكومة والتأمينات والسجل التجاري والضرايب
إلخ
إلخ
منا عاوز أتفادى القصة دي.. لحد ماشوف المشروع هيرسى على إيه
لو هيجيب همه
يبقا يستاهل القرف الحكومي في التراخيص وخلافه

المشاركة الأصلية كتبت بواسطة dr ahmed

الأرياف القريبة من المراكز بتترخص العيادات فيها
لو جمبك أعداء ممكن يشتكوك فى نفس اليوم
هو طبعا القاعدة إمشى عدل يحتار عدوك فيك لكن لو مرخصتش ممكن طبعا بس تبقى مغامرة الله أعلم بنتائجها
لو رخصت مجمع عيادات تبقى مشروع رائع ومش هيكلف كتير إن شاء الله ، ابدأ باطنة وأطفال وجراحة وأسنان مش لازم كل التخصصات من الأول وربنا يوفقك المشروع ده بيجيب فلوس كويسة جدا

ربنا يكرمك يادكتور

أنا بس مش عاوز أكلف فلوس..إحتمال ماتمشيش
أنا مش عارف ظروف القرية هتبقا إيه .. وربنا المستعان طبعا
أنا بس عاوز أعرفف موقع التفتيش ؟؟
وهل التفتيشات بتنزل بعد العصر.. ولا لأ ؟

مع العلم..إنها مش هتحوي غرفة عمليات.. كشوفات فقط
يعني مكتب.. وبرافان.. وشيزلونج .. وجهاز ضغط وسكر وسماعة وبلطو أبيض
وكام كرسي بره
وجاري الأتفاق على سونار

المشاركة الأصلية كتبت بواسطة syd

طب مانت بتجاوب علي نفسك اهو يا دكتور

طالما الكل كدة اسأل حواليك واعتمد علي الله

بس الأحسن طبعا تمشي صح

وبعدين انت هتفتح عيادة عشان تشغل الصيدلية ؟؟؟

انصحك بلاش

ماتزعلش مني يا احمد بس الصراحة دي هتخليك متكتف يا أما الدكتور هيخالف ضميره يا انت هتخالف ضميرك

هحكيك علي موقف مشابه كنت هعمل فيها مصيبة بس اخويا اتدخل فيها وهداني ولم الموضوع

بنتي كان عندها سنة ونص روحت بيها مركز طبي والدكتور كتبلها 3 اصناف حقن بيتخلطوا ببعض بأجمالي 6 سم

روحت صرفت الروشتة علي الحظ من صيدلية صاحبها شريك في المركز الطبي

اول لما وريت الروشتة للدكتور في الصيدلية قالي "اااااه هو الدكتور ..... متعود يكتب الدوا دة" وراح محضر السرنجة (6سم) في حقنة 5 سم وادي لبنتي الحقنة علي مرتين

اول لما بنتي خدت الحقنة (انا كنت ماسكها) اتشنجت وعيطت بهيستريا لمدة نص ساعة

تاني يوم كنت في زيارة عند جماعة قرايبي
وروحت اكرر الروشتة عشان الجرعة التانية من الحقنة (بعد 12 ساعة)

اول لما الدكتور شاف الحقنة (علي فكرة صيدلية في سنتماي جمبك) قالي ايه دة ؟؟؟؟؟؟؟؟ هي عندها قد ايه ؟ قولتله سنة ونص

قالي يا بيه الحقن دي شديدة جدا ومش اقل من 6 سنين ولو راجل كبير خادها بيغم عليه
وفعلا بنتي كانت بتاخدها وتروح من الدنيا

رجعت شايط وكنت هعمل محضر في القسم للدكتور المعالج وللصيدلي الي بأيده ادالها الحقنة لأنه معدوم الضمير يعني الدكتور في سنتماي (للعلم بيطري) عنده امانة وضمير ومرضيش يدي بنتي الحقنة وانت معدوم الضمير حضرتها وشايف البنت هتموت منها ومع ذلك عشان 20 ولا 30 جنيه تموت البنت

وكنت رايح اضرب الدكتور في الصيدلية

لولا قابلت اخويا تحت البيت شافني شايط قالي رايح فين حكيتله قالي انا جاي معاك

والدكتور الحيوان الصيدلي غيرلي العلاج علي حسابه (لأني كنت كمان واخد ادويا شرب وبردو غير مناسبة لسنها) وصاحب الصيلية اعتذرلي جدا وطبعا قعد يبرر ليه الدكتور كتب الروشتة والكلام الفارغ دة

فبصراحة يا احمد انا خايف انك تقع في نفس المطب

الدكتور يخالف ضميره والقسم الي حلفه عشان يمشي صنف عندك غالي
او انت تخالف ضميرك عشان تبيع الدوا حتي لو الدكتور كاتبه غلط لكونه من طرفك ومش عايزه يتاخد عنه سمعة مش كويسة

انا بعتذرلك لتاني مرة
بس انت اخ عزيز وانا اخاف تقع في الغلط

والله المستعان
،
،

هههههههه
حبيبي
الارياف أساسا ماينفعش فيها روشتات أغلى من 30 ج بالكتيررررررر

ومن ناحية الضمير
أنا لو كنت هخالف ضميري.. كنت بعت ترامادول.. وشهيصت نفسي
أنا محتاج من العيادة دي
كام روشتة في اليوم . وهوفر لهم الأصناف إلي هيكتبوها
طبعا غير النسبة إلي هتطلعلي شخصيا منهم

يعني
التكلفة الإيجار والعمالة
وهوصلهم كل يوم كمان لو مش معاهم عربيات

يعني ممكن تظبط دخل الصيدلية شوية + دخل إضافي كمان من النسبة
وكده الحمد لله على فضله مليون مرة

المشاركة الأصلية كتبت بواسطة dr ahmed

يا أخى الفاضل
يعنى حقنة لطفل عنده 6 سنين هتخلى راجل كبير يغم عليه؟
معلش أنا بتضايق جدا من الشخصيات اللى بترمى بلاها على غيرها زى الدكتورالبيطرى اللى حضرتك بتضرب بيه المثل فى الأمانة
وكل الشخصيات اللى حضرتك قلتها فى رأيى اتصرفت غلط
الدكتور الأول: أساسا لا يجب خلط الإبر خاصة وبالذات لو أكتر من صنفين حتى لو أحسن اختيارهم وجرعتهم
الصيدلى: لا يجب عليه إعطاء الحقنة ، دى مهمة تمريض ، الصيدلى لا يستطيع التعامل مع المشاكل المحتملة
الدكتور البيطرى: الأسوأ لإنه أساسا لا يعلم شئ عن الجرعات المناسبة للسن لإن جرعات الحيوانات وأدويتها غير أدوية وجرعات البشر والمثل اللى ضربه ليك فى غاية المبالغة ولا يهدفإلا لتشويه سمعة الآخر والظهور بمظهرالشريف العفيف الشاطر اللى بيخاف على الناس وتلاقيه بيعمل أشياء مشابهة أو أكثر والله أعلم

الشاهد إنك طالما وثقت فى دكتور تاخد علاجه وملكش دعوة خالص برأى الصيدلى أو أى شخص متخصص فى الفتاوى المعلبة القائمة على الجهل ، لو فيه استفسار عن العلاج اسأل الطبيب اللى كتبه مش الصيدلى.

بص حضرتك هو الروشتة كلها تناسب السن فيما فوق ال6 سنوات ولو واحد كبير خدها طبعا مش بيغم عليه ولكن الحقنة كانت تقيلة فعلا علي طفلة عمرها سنة ونص

2- في حاجات كتيرة اوي انا كنت قرفان من الدكتور بسببها ولكن الزنقة وحشة
يعني مثلا بيدخل بال6 حالات مع بعض وياخد كلمتين من الأم وبناء عليه يكتب روشتة
مثلا والدتي راحتله عندها برد وقالتله انا عندي سكر وضغط ومع ذلك كتبلها ادوية رفعت الضغط
انا اساسا بوديها عند استشاري أطفال من سنة 77 (استشاري من 77 وليس خريج 77) بس للأسف البنت تعبت اوي الساعة 12 بليل واضطريت اوديها للدكتور بتاع كله دة الساعة 1:30 بدليل ان بعد 12 ساعة كنت في بلد تانية وبردو كنت مضطر للسفر ببنتي

3- الدكتور رغم انه بيطري بس ابن خالتي بيشكرلي فيه جدا وانه فعلا بيفهم من كتر وقوفه في الصيدلية - وانا معاك ان المفروض اسأل الدكتور مش الصيدلي بس هتعمل ايه في الزنقة وانت كمان مش معاك تليفون الدكتور

ارجو تكون الصورة وضحت

ومتشكر جدا لحضرتك علي النصيحة وربنا يعافي جميع مرضي المسلمين وكفانا الله واياكم شر المرض

مرة تانية بشكرك

والله المستعان
،
،