الموضوع: بربريز الأوبترا

السادة الاوبتراوية المحترمين :
حبيت اشرككم معايا فى تجربة حصلت ليا النهاردة الصبح وان شاء الله يكون فيها استفادة حتى ولو بسيطه لاعضاء المنتدى الأعزاء ... كنت ماشى بعربيتى الأوبترا النهاردة الصبح على الطريق الدائرى فى اتجاه المريوطيه ويظهر ان قدامى كانت فى عربية نقل محمله حصى وكالعادة فى مصر ان اى عربية محملة اى حاجه بترمى جزء من حمولتها على السيارات اللى حواليها ودى طبعا حاجة كلنا اتعودنا عليها. المهم ان فى حاجة طارت على البربريز الامامى عندى والحمد لله على كل شىء احدثت نقرة مكان ما سقطت على البربريز وكمان لقتها فرشت باتساع دائرة صغيرة قطرها حوالى 2 سم ... طبعا مع شخص زى حالاتى موسوس وبيخاف على عربيته جدا موضوع زى ده عملى فترة نكد صباحى استمرت حوالى ساعتين ، أول لما فكرت قلت اكلم مركز قطع غيار منصور ابو رواش عشان أسأل على سعر البربريز الأمامى كام عشان لو النقرة وسعت ابقى اغير البربريز علطول .. عامة المفاجأة اللى عرفتها لما اتصلت وسألت كانت ان سعر البربريز الأمامى للأوبترا هو 2050 جنية وطبعا ده استهبال واستعباط من التوكيل لأنى عرفت من حد من زمايلى انهم بيركبوا زجاج جريش المصرى والألفين وخمسين جنيه دول ما هم إلا مجرد اشتغاله من اشتغالات منصور والفرق الوحيد عن الزجاج اللى خارج التوكيل انهم بيعملو اختبار اسمه ضغط الهواء بيفيد فى حالة تسريب للهواء مع تركيب الزجاج الجديد ... طبعا دخلت على منتدانا المحترم وشفت من خبرات الأعضاء ان زجاج جريش هو افضل نوع ممكن اركبه بره التوكيل ، طبعا انا مكدبتش خبر ورحت داخل على الموقع بتاع دكتور جريش وجبت ارقام تليفوناتهم ورحت مكلمهم وحددتلهم مواصفات العربية وردوا عليا انه موجود واقدر اجى فى اى يوم اركبه وسعره كان مفاجأة بالنسبة لى لانه شامل التركيب بيكون 285 جنية فقط كمان مع اختبار ضغط الهواء وكمان المفاجأة انه بخلاف مركزهم الرئيسى اللى فى العاشر وصفتى عنوان قريب فى مصر الجديدة فى 26 شارع ابراهيم - متفرع من شارع دمشق - الكوربة .. انا بجد اتطمنت لما عرفت ان لو حصلت مشكلة فى البربريز هيكون حلها بسيط ان شاء الله وحبيت اشارك بالموضوع معاكم فى المنتدى المحترم ..