كام مرة سمعت السؤال؟
وكام مرة طلعت واديت؟
وكام مرة اتنصب عليك؟
وكام مرة اتحرق دمك من حال البلد اللي اتملى من النماذج دي؟
الموقف بحذافيره بسلطاته..
المكان: شارع الدقي قدام مختار بتاع التحف
الزمان: واحدة ونص الظهر النهاردة
ماشي في أمان الله عايز أشهل أجيب دوا من الصيدلية وأرجع الشركة جري قبل ما تيجي 2
لاقيت واحد جاي من الناحية التانية وقف وبيقولي يا أستاذ..
أكيد شحات..قلت في سري
ركبت الوش الخشب و..
أفندم؟
ممكن جنيه والله أروح بيه؟
وصف الراجل:
متوسط الطول وباين عليه متغذي كويس
مش باين عليه عيان لا سمح الله ولا حاجة
لابس هدوم موظف متوسط الحال
هدومه كلاسيك نضيفة ومكوية ...بنطلون قماش على قميص على جاكت...كأنه مطقم من وسط البلد
شايل كيس بلاستيك سميك وفيه حاجات
عنده حاجة وأربعين
لقطت الصورة بعيني ومن كتر ما دمي اتحرق وبرضه مش عايز أغلط في حد..التهتهة اشتغلت:
وأنا..وأنا..وأنا عايز أسيب البلد دي!
هو ببرود الدنيا: طيب خلاص..وقام واخد بعضه وماشي
السؤال الحلمنتيشي..ازاي واحد يقبل على نفسه يشحت وفي عز الضهر ومش باين عليه محتاج؟
ومحدش يقولي لأ أصل كان حصله الظروف!
ده مش واقف يستعطف الناس مثلا..لأ ...ده ماشي في طريقه عادي جدا وشافني راح موقفني وعايز فلوس!!! نسميه إيه ده؟
الشحاتين وبياعين المناديل واللي بيقعدوا قدام ال atm مخصوص واللي تجيب جوزها على كرسي متحرك كل يوم 9 الصبح وتوقفه في نص الشارع قدام المستشفى يلم الغلة واللي واللي واللي واللي واللي ...عرفناهم وحفظناهم
لكن الشحاتة توصل للناس العادية كمان؟!
دي مش أول مرة تحصل معايا من ناس شكلها محترم
بس أول مرة في حياتي أرد ناشف على حد يطلب سلاش يشحت
اوعوا تفتكروا إني ندمان..ده لو أطول ألمهم كلهم ويتحبسوا في مدينة مقفولة عليهم كنت عملتها ويبقوا يشحتوا وينصبوا على بعض بقى
المنطقة دي بقت موبوءة بيهم
أفففففففففففففففففففففف أستغفر الله العظيم
عارف إن مفيش حل
بس كان لازم أفضفض مع حد قبل ما أطق من جنابي
سلامي للكل
المفضلات