الموضوع: سنه اولى كلاب

طب ممكن شوية معلومات عنه عشان اقدر اساعدك و يا ريت لو صورة و هو واقف ع ترابيزة عشان احاول احدد سنه تقريبيا

بس مبدأ الكل في سن 45 يوم ( الاسبوع السادس او شهر و نص يعني ) هطعمه تطعيم اسمه تطعيم الثماني و ده بيحمي من 8 امراض بتتعرض لها الكلاب دايما و بعد 3 او 4 اسابيع بطعمه جرعة تنشيطية لتطعيم الثماني و احيانا الدكتورممكن يقولك تطعمه جرعة تنشيطية تانية بعد 3-4 اسابيع تانيين
و كل سنة او سنة و نص بياخد جرعة تنشيطية لتطعيم الثماني لمدة 6-7 سنين

و ع الشهر التالت او الشهر السادس ان شاء الله بطعمه تطعيم السعار و ده ضد السعار وبعدها تطلع له رخصة عادي

بالنسبة اسعار التطعميات : الثماني يتراوح من 50-70 جنيه
السعار في حدود 45 جنيه

اهم حاجة التطعيمات ديه عشان مفيش اي امراض و خاصة ان بعض الامراض ديه ممكن تنتقل للانسان و بتكون مميتة فالافضل الوقاية خيرا من العلاج و منهملش في التطعيم

و فيه مستشفي الشعب في العباسية
و مستشفي القوات المسلحة ورا النادي الاهلي مدينة نصر

بالنسبة الاكل من سن شهر لحد سن 3 شهور تديله 3 وجبات و لو قدرت تديله 4 يبقي تمام

اغلب الاكل يكون لبن و مقطع فيه عيش و عوده ع عيش بلدي من دلوقتي من المدعم طبعا اللي بناكل منه و مرة الصبح و مرة بليل لبن مع عيش الغدا حاول يكون خفيف زي حتة لحمة مفرومة او مخلفات لحوم في البيت مع عيش و لو باقي خضار و اوعي يكون فيه اي عضم لأن العضم بيكون صعب عليه خاصة و هو صغير و ممكن يعمله نزيف داخلي
يعني عوده ع بواقي البيت من الاخر عشان ميتأمرش حتي لو مفيش لحمة ممكن تحطله شوربة يكون فيها الريحة حتي بس هياكلها زي الاهبل هههههههه

من سن 3 شهور لسن 6 شهور برده 3 وجبات بس تزود الوجبة شوية
الصبح لبن و عيش و الوجبتيين التانيين برده زي مقولت فوق بس حاول تقسمهم عشان يكفوه و حطله عيش معاه
اخر كلب عندي كنت اسلق الجلود و الدهون و اظبطها ملح و حلقة بصل عشان الزفارة و اكترله العيش و خضار لو باقي و احطله فوقهم كبشة او كبشتين شوربة مكنش بيفرق و بياكل مهو مش كل يوم هياكل لحمة مهياش هيصة ههههههههه

من سن 6 شهور لسن سنة و نص
وجبتين بس يكونوا كبار شوية الصبح عيش و لبن
التانية كالمعتاد بس زي مقولت تكون اكبر عشان تكفيه بقيت اليوم و ميبقاش جعان

من سن سنة و نص فيما فوق
وجبة واحدة بس كبييييييرة عشان تكفيه طول اليوم او لو عايز تقسمها ع مرتين مفيش مشاكل بحيث مرة الصبح و مرة بليل

حاول متجبش كبدة كتيير عشان كترها غلط عليه زي ما هي غلط ع البني ادميين يمكن ع الكلاب اكتر يعني ممكن مرة كل اسبوع او اسبوعين

من وقت للتاني جيبله حتة ماسورة منها يسنن سنانه و منها مفيدة عشان الكالسيوم

و طبعا الكلب زي حالاتنا مينفعش تأكله نفس نظام الاكل كل اسبوع يعني غيرله نظام كل اسبوع و حاول تشكل بدل يجيله اكتئاب مش هنبقي احنا و الكلاب هههههههههههه

فيه حاجات بقي اوعي تقرب بيها ناحية الكلب مهما حصل و هي كالآتي :

- العنب - الزبيب - فاكهة الافوكادو و الحبوب التي داخل التفاح وقشر التفاح نواة المشمش و الكرز والخوخ - الثوم - البصل- القهوه - الشاى - الكحوليات- الشكولاته - السكريات بكميات كبيره - السمك بكثرة - الملح بكثرة - تقديم اللبن أو منتجات الالبان للكلاب الكبيره بيسبب لهم الاسهال - البيض النيء- اللحم النيء - العضم المطبوخ - الاكل الفاسد - المشروم - الدهون الزائده - المكملات الغذائيه الخاصه بالانسان

يا رب مكونش نسيت حاجة نظرا لأن بعضها بيكون سام ليه و بعضها مضر صحيا
و خلي بالك اوعي تحطله اي لحوم نية

بالنسبة المية حاول تغيرله المية دايما اكتر من مرة في اليوم

-----------------------------------------------------------------------------------

بالنسبة للاداوت اللي هتحتاجها ان شاء الله لتربية الاستاذ

- طوق و سلسلة او جلد

- عضاضة

- كمامة لما يكبر ان شاء الله

- جوانتي زي بتاع حارس المرمي ميسمحش بنفاذ الشعر لايديك عشان تتعامل معاه , حاول بقدر الامكان متلمسش الكلب بايديك حتي لو محميه و تتعامل دايما بجوانتي و بعد ما تلمسه تغسل ايديك

- فلفل اسود عشان تدربه ع الحمام لو عمل حمام في مكان غير اللي انت عامله ليه حط ع المكان اللي عمل فيه فلفل اسود مش هيقرب ناحيته تاني


النظافة :
- طبق بلاستيك كبير - شفشق صغير- فوطة - قماشة - شامبو ( بلاش شامبو العادي بتاعنا شوف شامبو كلاب او جونسن لأن الشامبو العادي بيسقط شعر الكلاب و ثانيا ضار لعينه نظرا للمواد الكيميائة اللي فيه و طبعا متجيش بالصابونة ناحيته )
بالنسبة الحموم في الشتا مرة واحدة و يتنشف و يطلع ع الشمس عالطول
في الصيف مرتين - 3 مرات بالكتيير في الشهر
و حاول المية متجيش عند عينه او المية تدخل جوة ودنه بدل ما يبقي اطرش او اعمي منطقة الراس ممكن تنضفها بحتة قماشة مبلولة او سفنجة اما باقي جسمه عادي من الشفشق او الطبق الصغيرة و فوق جسمه و البس كيس في ايديكو انت بتحميه او جوانتي تاني تخصصه للحموم

- مشط شعر و ده بتختاره ع حسب اذا كان الكلب شعره كتيير او قليل لو كتيير يبقي مشط اسنانه بلاستيك و فتحاته واسعة لو متوسط يبقي مشط اسنانه بلاستيك او معدن فتحاته متوسطة لو شعره زي الدوبر مان يبقي مشط اسنانه معدن و ضيقة

- ديتول لتنضيف مكانه
- ديزانون برده لتنضيف مكانه لكن اقوي بس خلي بالك اوعي الكلب يلحسه او يجي جانبه لأنه سام فبعد ما تنضف بيه تسيب المكان يتهوي و خلي بالك انت كمان

- امبولات ( بارس ) و ديه عشان الحشرات و رخيصة و بتحط حوالين الرقبة و بين البطن و الايدين و الرجلين و بيدوم شهور و طبعا بيمنع الحشرات و البلاوي ديه انها تقرب من الكلب

الأكل :
- 2 طبق فخار كبير( اكل ) - صغير ( مية )


و اخيرا البيت لازم يكون مناسب لحجمه من الخشب و يكون اعلي من الارض حوالي 5 سم ع الاقل عشان الحشرات متوصلش ليه و تفرشه جوة حتة قماشة او موكيت

بس كده معتقدش اني نسيت حاجة تاني

بالنسبة تدريبه ع الاوامر فده موضوع يطول شرحه شوف بس الكلام اللي فوق و هبقي اقولك ع الباقي بس عامة بداية التدريب انك دايما تنده باسمه من دلوقتي عشان يتعود ع الاسم و ينتبه ليك لما يسمعه
و حاول من دلوقتي تعوده ع مكان يعمل فيه حمام و الكلب عامة بليل لما بينا و بالمناسبة الكلب بيعمل حمام بعد الاكل بحوالي تلت - نص ساعة يعني تاخده ع مكان الحمام عشان يعملها و لما يعملها تطبطب عليه بمعني انه عمل حاجة كويسة هنا بس ابقي سد منخيرك هههههه :)

و التدريب ع الاوامر يبتدي من سن 3 شهور عشان يكون زي ما تقول عقله نضج شوية وبيفهم اما قبل كده سيبه يلعب مع نفسه و متنزلوش الشارع قبل 3 شهور عشان ميخفش من الناس و لما يوصل ل 3 شهور ينزل عشان يتعود ع الشارع و الناس و حاول التدريب يكون مرتين او تلاتة بالكتيير في اليوم و كل مرة متزدش عن ربع ساعة او تلت ساعة عشان الكلب ميزهقش

و طبعا مننساش
المكافأة لما ينفذ الامر صح بعد كام مرة زي مثلا بسكوت او حاجة بيحبها يلعب بيها او انك تطبطب عليه و تبتسم و تقول كلمة زي good او bravo عشان يفهم انه كده عمل حاجة صح و انت بتكافئه
او العقاب عن طريق ان تكلمه بلهجة شديدة شوية او تضربه ع راسه بس مش ضربة بمعني ضربة يعني حاجة خفيفة كأنك بتبطب ع طفل لسه مولود اوعي تستعمل معاه العنف

و التدريب ع الشراسة يبتدي من سن 6 شهور ع الاقل عشان يكون اخد تطعيم السعار بس يفضل التشريس تدربه في مركز متخصص زي مركز الشرطة لأنه محتاج ادوات و مدرب محترف
و من اهم التدريبات غير الطاعة انه مياكلش من ايد حد او ياكل من ع الارض و متخليش حد من اصحابك يخوفه و هو صغير عشان ميطلعش جبان او عدائي اكتر من اللازم
و فيه تدريبات تانية زي الحراسة الاولية و الحراسة الشخصية و ممكن مع التشريس تدربه عليهم

و معلومة اخيرة الكلب دايما ولائه المطلق لصاحبه اللي رباه و طبعا اسرة صاحبه بيكن لهم الولاء برده لكن زي مقولت ولائه المطلق لصاحبه

و اي استفسار اتفضل

بالتوفيق ان شاء الله