الموضوع: تقرير شامل عن الألنترا 2012 بالصور ( حصرى لنايل فقط )

مساء الخير يا رجاله نايل موتورز

لسه راجع من الأيقاف فقولت انزل بموضوع جامد جدا عشان حبى فى المنتدى والناس اللى فيه وده بمثابه رساله اعتذار مش اكتر عن سوء الفهم لكلامى اللى حصل


المهم مبدئيا قبل اى كلام احب اشكر العضو D/ AHMED او propagaanda على تقريره المميز للأفانتى واللى بجد خلانى احول التفكير للألنترا بعد ماكنت بفكر فى السيراتو بجديه .


- تانى حاجه العربيه مش بتاعتى ولكنها خاصه بواحد قريبى وجربتها منه 3 ايام متتاليه كانت معايا


ندخل على الشغل الجد :


السياره : هيونداى النترا 2012


الفئه : اول فئه اوتو


الكماليات : اوتو – سنتر – باور – تكييف - ايرباج – طاره مالتى – مرايات كهربا – سنتر – انذار ( اوبشنز قليل الى حد ما )


التوكيل : ( تغوور من وش غبوور ) ده شعارى انا وصاحبها عشان كده اشترناها من اوتو سمير ريان خليجى


اللون : كريمى او سمنى (هو لون غريب وخلاص )


المحرك الموتور :

المحرك طبعا DOH 1.6 بتكنولوجيا CVVT للأسف مش ال GDI و هو ، ذو سعة 1600 سي سي 16 صمام الجديد بقوة 121 حصانوعمودي كامة لكن ادائه جيد جدا ودى صورته

ولمن لا يعرف المحرك ال GDI فدى نبذه عنه من موضوع الدكتور احمد عن الأفانتى :

المحرك: من نوع GDI (Gasoline direct injection)
140 حصانخلينا نحكي يعني اي جي دي اي ..... فكرته بسيطة جدا عبارة عن طلمبة بنزينميكنيكية شغالة عالتاكيهات و 4 بخاخات بتصب البنزين مباشرة في غرفةالاحتراق (ده بيزود القوة و يوفر في الوقود و تكاليف الصيانة لأن مفيشمانيفولد ولا مسطرة رشاشات ولا حساسات كتير بسيط بس عملي)
و سير الكاتينة جنزير زي الانترا بتاعة غبورتقييمي : غبور ضحك على كل واحد جاب النترا من غير GDI
العربية ماشية على 150كم/س .... على 3 ار بي امالسحب عالي جدا ... الصوت مش مسموع غير في السرعات العاليةمن الاخر الموتور ده ثورة فعلا !!!!
ده شكله

و ده لما شلت الكفر ,,,, هتلاقوا الموضوع مختلف عن ال DOHC ., وكمان هتلاقو طرمبة البزين اللي بتلمع دي فوق الكامة اللي جوه

الجير بوكس ( الفتيس ) :

متطور جدا الى اقصى درجه 6 SPEED وانا بجرى وبشد بالعربيه اشغل النظام المانوال وكان مستجيب بطريقه كبيره جدا جدا جدا وبنظام هايل ( افضل من السيراتو 2009 /2010 )

نظم التعليق (العفشه) :

وانا ماشى بالعربيه على سرعه من 60 : 100 بحس بكل تفصيله فى الطريق واى طوبه او نقره او عيون القط بحس بيها وده للأسف من احد العيوب يعنى كان المفروض تبقى العفشه مش ناشفه بالطريقه دى تكون اهدى من كده شويه

لكن فى المطبات العاديه اللى على بطىء العفشه ممتازه

الفرامل :

الفئه اللى معايا بدون APS لكن ادائها جيد خصوصا انها على ديسكات فى يعتبر ادائها عالى لكن ضرورى يكون فى كل الفئات APS

الشكل الخارجى :

طبعا من المعروف ان شركه هيونداى هى شقيقه كيا فى كوريا وبينعكس طبعا على الأسواق الأخرى فعندما نرى ثوره فى التصميم فى كيا تحدث بعدها فى هيونداى والعكس صحيح طبعا

ولكن فى السياره دى بالذات التصميم ذات طابع خاص يشبه موج البحرويعتبر حاد وشرس وهادىء وجذاب فى نفس الوقت وهى دى المعادله اللى نجحت هيونداى فى اضافتها فى الألنترا وهتنجح ايضا كيا فى اضافتها فى السيراتو الموديل الجديد

وده الشكل من الأمام :

ومن الخلف :

ومن الجانبين :

يعيب هذا الشكل شىء واحد فقط انه لاقدر الله لو حصل خبطه او حادثه او احتكاك فى الأجناب هيكون عايز فنان يرجعها زى ماكانت مش زى اغلب سمكريه مصر اللى بيتبعوا مبدأ الفهلوه والضحك على الزبون

والخبطه اللى من الأمام دى كانت بسبب عدم تأقلم صاحبها على الأبعاد فأحذرو النقطه دى

الشكل الداخلى :

الرهبه والخوف هو اول شعور يتملكك من اول نظره للسياره دى لأول مره لكن الشعور ده بيقل تدريجيا حتى يتحول لثقه فى النفس وهدوء غير طبيعى

وركبت وظبطت المرايات والكرسى والسى دى وكمبيوتر الرحلات استعدادا للتجربه اللى استمرت 3 ايام اخرهم الجمعه :

صور من الداخل :

نظام جميل جدا بيظهر درجه الحراره فى الخارج :

الرؤيه الخلفيه :

ودى صور للعدادات :

العزل :

للأسف العزل بتاعها الخاص بالصوت مش بدرجه امتياز ولكنه ممكن ياخد جيد مرتفع ان لم يكن جيد جدا

الثبات :

لم ابدأ الشد والجرى بيها الا بعد الألف كيلو وصيانتها وبعد كده جربت لحد 160 K لكن حسيت ان فى حاجه غلط بأمانه شديده خفيفه جدا على السرعات العاليه وده اللى خوفنى منها فمزودتش عن كده خالص لكن يعتبر الثبات جيد بدرجه كبيره .

صندوق الأمتعه واماكن التخزين :

واسع وعملى ودى صورته

جراب النضاره :

النظام الصوتى :

لا تعليق غير انه شكلا وليس موضوعا

استهلاك الوقود ( البنزين ) :

جيد جدا جدا حتى الأن بالنسبه لى لأن العربيه عامله الفين كيلو ونص يعنى لسه بدرى على الحكم على استهلاك البنزين لكنه بالنسبالى ممتاز وبحطلها بنزين 92 وزى الفل ودى صوره التانك

التكييف :

رغم بروده الجو ولكنى جربته وادائه جميل وسريع ويعيبه انه لا يوجد شاشه ديجيتال للبيانات وده مهم بالنسبالى على الأقل ولكن كمان مفيهوش Douple Zone بس مش مشكله

الباور :

خفيف جدا جدا وممتع فى قيادته لكنه على السرعات العاليه ثابت

التقفيل ( THE FINISH ) :

امتياز بأمانه شديده يعيبه فقط صوت تزييق خفيف جدالا يكاد يكون مسموع الا لأذن حساسه جدا جدا وشخص موسوس ( اللى هو انا طبعا ) وده ناتج عن البلاستيك الموجود بالتابلوه .

نظام ال ECO :

وده نظام ال ECONEMICE او الأقتصاد وده بيوفر فى البنزين وبيعتبر اوبشن جميل وعملى وفرق معايا للأمانه كتيير وبيتظبط من الطاره وكمبيوتر الرحلات او من الزر الجانبى لتعليه الأنوار وبيظهر فى التابلوه

مفتاح السياره :

اخيرا خرجت هيونداى عن الكلاسيكيه وانضمت لركب الفخامه فى كل شىء حتى مفتاح العربيه زى الأوكتافيا والمرسيدس بنز وكمان الصينى هههه

والمفتاح على شكل سلاح وشيك جدا جدا جدا

العيوب والسلبيات من وجه نظرى :

- غبوور وده اكبر عيب فى العربيه بس تخلصنا منه بالخليجى .

- المحرك المفروض كان يكون زى الأفانتى ال GDI مش ال DOH 1.6 اللى المفروض انتهى عصره خلاص

- صوت الحرك مسموع بصوره بسيطه

- سعر مبالغ فيه بطريقه استفزازيه

- كماليات كانت المفروض تبقى موجوده لكنها مش موجوده حتى فى HIGH INE او ال FULLY LOAD زى شاشه تكييف ديجيتال

و نظام AUTO DOWN فى الأزاز كله ( ده موجود فى الأسبرانزا الصينى ) وموجود بس فى باب السائق

كمان كان المفروض الأستفاده بلوحه العدادات اكتر من كده بمعنى ان يكون فى بيان بالباب المفتوح او الشنطه او الكبوت الأمامى زى السيراتو الهاى لاين والأسبرانزا 516 مش العلامه اللى من اول مااخترعوا هيونداى وهى موجوده اللى هى البابين

- لا يوجد نظام ال DOUPLE ZONE فى التكييف بس دى مش مشكله كبيره عادى يعنى

- لا يوجد قفل مركزى من اول التشغيل او الحركه .

- العفشه الناشفه اللى حد ما .

- الأنذار كان المفروض يكون تكنولوجى عن كده شويه لكن ساعات بحس انه بيهيس جامد

- العزل كان المفروض يزيد عن كده .

- الركن والرؤيه الخلفيه محتاجه اعاده نظر من اللى مصممها لأنها صعبه شويه

- عدم وجود فتحات تكييف خلفيه للركاب اللى فى الخلف

المميزات :

لاتعد ولاتحصى

- عربيه ليها ايدولوجيه مختلفه خالص وشخصيه مستقله عن اى عربيه تانيه تشعر معها بالخوف والرهبه والأطمئنان والثقه بالنفس كل ده فى وقت واحد .

- تكنولوجيا عاليه مناسبه .

- ديناميكيه عاليه .

- انتشارها فى ازدياد مما يجعل قطع الغيار متوفره ودى ميزه .

- شكل جبار .

- مقصوره فخمه .

- شنطه واسعه وكبيره .

- كمبيوتر رحلات متطور جدا .

- زجاج امامى كبير جدا يسمح برؤيه عاليه وكبيره .

- فرش وتقفيل ممتاز .

- عدادات طياره جيده .

- مميزات كتير جدا تغطى على السلبيات الى حد ما

و دى درجات التقييم ( من وجه نظرى ) :

محرك : 8/10

جير بوكس : 9/10

مقصوره : 9/10

عفشه : 7/10

فرامل ( بدون APS ) : 8/10

اماكن تخزين : 10 /10

ثبات : 8/10

كماليات الهاى لاين : 9/10

سعر : 5/10

توكيل للى عايزها من غبوور : - 20 /10 ( ده اقل واجب )

والتقرير ده من اعدادى بكل حرف فيه وكل كلمه وكل صوره من اعدادى الشخصى واتمنى انه ينال اعجابكم وكل مافيه يعبر عن وجه نظرى المتواضعه جدا جدا جدا جدا مقارنه بالخبراء اللى هنا فى المنتدى .

وفى النهايه انا ناوى بأذن الله قريب جدا اجيب عربيه جديده بجانب الأسبرانزا لأنى اكتشفت ان الأوبشن اللى فيها يفوق ويتخطى الكورى بكتيييييييييييير جدا ودى مش مبالغه والله لكنها تجربه فعليه مع السيراتو و والألنترا وللأسف الشديد الصينى تفوق بكمالياته الكتير على كماليات وجمال السيارات الكورى ( بغض النظر عن الأساسيات اللى معظمها لصالح الكورى اكيد ).

ومازالت فى حيره مابين السيراتوا الهاى لاين ولا الألنتر ولكن بأذن الله لو النترا هجيبها افانتى فولى لوود بمحرك GDI من المزدلفه ببورسعيد زى ماكتب وحكى عنها الدكتور احمد اللى بشكره جدا على رده على استفساراتى واسئلتى .

ولكن الأقرب حتى الأن الأفانتى الى ان تنزل سيراتو 2013 ونشوفها غير كده مازالت فى حيره من الأختيار وكل ده بعد ماشلت من دماغى فكره الأرتباط والجواز هههههه .

وبعتذر جدا جدا جدا على الأطاله لكن حبيت اوضح كل تفصيله ولو صغيره فى العربيه عشان اللى بيفكر فيها يكون عارف كل حاجه عنها واتمنى انه يعجبكم واى استفسار انا تحت امركم .

تقرير رائع جزاك الله كل خير