الموضوع: تقرير تركيب فرش نيسان صنى سوبر صالون 2012 – جينز كار

بسم الله الرحمن الرحيم

إخوانى الكرام اليكم تقرير عن تركيب
فرش + خياطة دبل + تنجيد + عزل + أرضية جلد فى جينز كار
لعربيتى الجديدة نيسان صنى سوبر صالون 2012

فى البداية احب أشكر الأخ المحترم أحمد مصطفى (Ahmed TV) للتوصية الجامدة عند الحاج أحمد مشعل صاحب جينز كار مع ان بصراحة الحاج أحمد مشعل مش محتاج توصية
و الراجل محترم فوق الوصف و انا كتير سمعت من أعضاء المنتدى اللى اتعرفوا عليه شخصيا بس الكلام حاجة أقل بكتير من الواقع

نبتدى بقى التقرير

الأمانة لله العمال عارفين و حافظين العربية
لأن فى أقل من 5 دقائق فرش العربية كله كان مفكوك
و بصراحة انا اتخضيت من المنظر ما تنسوش ان العربية لسه زيرو و مش سهل اشوفها على الأرض كدة :)

و يا ريت الحكاية جت على الفرش بس لأ كما بدأوا يفكو الأرضية علشان العزل و بقت العربية على الصاج
و قلبى مش مستحمل اللى انا شايفه بس ثقة الحاج أحمد و العمال فى شغلهم طمنى

و بعدين جابوا العازل و بدؤا يفصلوه على أرضية العربية

و زى ما الصورة موضحة حاطين طبقتين عزل علشان صوت الحصى و خلافه ما يبقاش مسموع من جوه العربية

بعدها العزل مباشرة لقيت أحد العمال جايب فرش الأرضية الجلد و بدأ يشتغل
و الملاحظ هنا ان الناس دى فاهمة شغلها كويس جداا

فى نفس الأثناء كانت الكراسى بتتنجد و ذلك بإضافة طبقة من الفيبر و الإسفنج لمعالجة النشفان بتاع كراسى الفبريقة

و دة الشكل قبل و بعد التنجيد و تركيب فرش الجلد

زى ما نتوا شايفين الخياطة الدبل عاملة تفتيح و شكل جمالى للفرش

صورة أقرب للخياطة الدبل

و بعد ما التنجيد و تركيب الفرش خلص بدؤا تركيب الكنبة و الكراسى تانى فى العربية

و كمان الحاج أحمد أمر بتنجيد الكنصول و تركيب جراب جلد لفرامل اليد بنفس نوع الجلد و الخياطة الدبل و شكلهم كان فى منتهى الشياكة

مش عارف اوصفلكم الراحة اللى شعرت بيها بعد التنجيد كأنى استلمت العربية زيرو مرة تانية بل أحسن من الزيرو
و كنت فى غاية السعادة

طبعا الحاج أحمد عمل خصم الـ 20 % الخاص لحاملين استيكر نايل موتورز و العرض دة متاح لغاية 1/3/2012 بس فاللى عايز يلحق يلحق

و فى النهاية اتمنى يكون التقرير عجبكم
و بكرر شكرى مرة تانية للحاج أحمد مشعل بصراحة هو عمله نادرة فى هذا الزمن و لم أقابل فى حياتى شخص فى إحترامه و طبعا أخوه المحترم أ/ يوسف
و طبعا أنا عاجز عن شكر أخى الحبيب
أحمد مصطفى (Ahmed TV)

و السلام عليكم و رحمة الله و بركاته

جميلة وشيك ....ربنا يباركلك فيها ....