الموضوع: بدأت التعديلات في البرافو

رحت امبارح مركز البرقان و معايا الديسكات و التيول EBC و معايا بارات Ultra Racing عشان أركبهم في العربية. قابلت المهندس وليد (محترم و فاهم و مريح جداً في التعامل) و قلت له على اللي عايز أعمله، قال لي الديسكات و التيول هو عارفهم و يركبوا عادي و في كذا واحد ركبهم منهم واحد معاه جراند سماوي (مين يا شباب؟)، لكن بالنسبة للبارات دي جديدة عليهم و مش متأكد يعرفوا يركبوهم ولا لأ

المهم، بدأنا بالديسكات و التيول و وقفت معاهم و هما بيركبوها و كله بقى تمام، و بعدين قلنا نبص على البارات و نشوف نظامهم إيه .. أول واحد اللي بيركب عالموتور لقينا مقاساته مظبوطة تمام و تركيبه سهل قمنا مركبينه على طول (صورة من الموقع http://www.ultraracing.com.my/VGreen...4T%20front.jpg ) و بعد ما خلصنا كانت الساعة ٥ و اليوم خلص.

رحت انهارده عشان نكمل تركيب و استفتحنا بالبار التحتاني ورا ( http://www.ultraracing.com.my/VGreen...ar%20lower.jpg ) و ركب تمام .. و ده كان أخر بار يركب

- البار بتاع الشنطة ده ( http://76.my/Malaysia/ultra-racing-2...axAudio@24.jpg ) بيركب من الطرفين مضبوط على مسامير اللسان اللي بتعشق فيه الكنبة .. المشكلة إن فيبر القايم لازم أفتح فيه فتحة مكان ما البار ها يفوت أو أعمل فيبر عمولة، ده غير إن الكنبة مش ها ترجع تقفل للأخر و ظهرها هايريح على البار (مش مشكلة كبيرة أوي، هو بس ظهر الكنبة ها يبقى تقريباً عامل زاوية قايمة، يعني صحي )

- البار التحتاني أمامي له أربع نقط تثبيت ( http://76.my/Malaysia/ultra-racing-4...MaxAudio@2.jpg )، اتنين مكانهم موجود تمام في القنطرة، بس الاتنين التانيين مش واضحين و لازم بتاع عفشة فاهم يبص عليها


تقييم الفرامل: طبعاً لسه التيول بتطبع عشان دي محتاجة حوالي ٥٠٠ كم سواقة هادية و فرملة تدريجي من غير كبس أو تحميل، و إن شاء الله لما تبقى تمام هاعمل بيها تقرير.
تقييم البارات: العربية راكب فيها بار الموتور و بار تحتاني خلفي .. ما أخدتش غرز جامدة ولا ملفات على سرعة عالية عشان ما اضطرش اكبس فرامل، بس مبدئياً حاسس بتحسن في تماسك جسم العربية، دقة أكبر في الSteering، و في غرزة عالماشي كده أخدتها عالدائري و أنا راجع حسيت اني هاتكيف من البارات دي لما أجربها بجد

مين بقى يعرف عفشجي كويس ممكن يساعدني في البار التحتاني، و واحد بتاع فيبر عمولة يضبطني عشان بار الشنطة؟

المشاركة الأصلية كتبت بواسطة formulator

@ azakareya
مبروك يا باشا,
بس أنا كان رأيى انك تغير العفشة الأول (سوست ودامبرات).
وبعديها تغير الـAnti-Roll bar/ Stabilizer bar ورا وقدام..

الفرق فـ الهاندلينج والثبات بيبقى رهييييييييب (عن تجارب بسوست Eibach بس, وبعديها ركبت دامبرات Bilstein).. العربية اتحولت..؟؟!!!

وآخر حاجة تركب هى الـStrut bars..
بس هما عموما هيفرقوا معاك فـ الملفات السريعة, الغرز القطم.. و مطبات الهواء جااااااااااااااامد.
وأهدى شوية فـ الجرى.. ربنا يستر طريقنا كلنا isA

الله يبارك فيك .. أنا عارف رأيك ده كويس من قبل كده و برضه شفته في كذا منتدي، بس مشكلتي إن من ساعة ما جبت العربية غيرت مساعد أمامي مرتين و لسه يوم الأحد اللي فات و أنا عالدائري بيك-أب واقف على الشمال بيغير كاوتش و سايب العجلة يمين العربية بمتر قامت عربية مقطورة حدفت عليا و لبستني في العجلة، الدركسيون بقى حادف سيكا و غالباً فيها مساعد تالت .. خسارة في شوارعنا دي أجيب D2 أو KONI أو Bilstein .. غير إن دي عربيتي الأساسية في كل حركتي و مش عايز أوطيها أكتر من كده عشان ما أجيش أتزنق في حتت ما أعرفش أمشي بيها