استشاره قانونية - رجاء الرد للأهميه

**msobhy** · 28-02-2012 12:19 AM

لدى صديق عزيز جدا وقع فى مشكله وارجو الرد
صديقى تزوج لمدة 34 يوم وقامت زوجته بترك منزل الزوجيه بعد اخذ اغلب متعلقاتها - حدثت مشكله صحيه لديها فى اليوم ال 30 وأكتشفوا انها حامل بالصدفه ومع ذلك اصرت على الطلاق - بدون اى سبب واضح
قامت برفع جميع القضايا التى من الممكن ان تتخيلوها - تبديد قائمة منقولات - نفقه - خلع - طلاق ....... بالاضافه للكثير من المشاكل له على الصعيد الشخصى
المهم فى خلل تلك الفتره قامت باخباره بأنها غير حامل وتم ذلك عن طريق محاميها
بعد ذلك قامت بتغيير طلباتها من نفقة زوجيه الى نفقة صغير
ولغاية دلوقتى تقريبا مفيش مشكله
المهم كل القضايا ديه خلصت ما عدا نفقة الصغير
وهيه ديه المشكله
الاول اتحكم لها بمبلغ 175 مقابل مأكل وملبس وحضانه لكنها عملت استئناف - وللأسف المحامى بتاعى صاحبى تقريبا محضرش ولا جلسه - وهما طبعا تقريبا قالوا ان دخله الثابت 10.000 جنيه بالاضافة انه يملك عقارات وبيوت ودهب وفضة وياقوت ومرجان وتقريبا انه ناوى يشترى نص مصر من كتر ما هو معاه فلوس ومش عارف يوديها فيييييين وهيه ديه المصيبه لغاية لما اتحكم لها بمبلغ 500 جنيه وده طبعا اكبر من مقدرة صاحبى بمراحل لأنه متزوج ويعول وظروفه مش ولا بد
المهم ان المحامى بتاعه الحيوان اكد له انه لو عمل التماس اعادة النظر لازم الالتماس هايتقبل لأسباب كتييييييييييييره
المهم المحامى بتاعوه بالاضافه للمحامى بتاعهم لعبوا لعبه قذره انهم خلوا التماس اعادة النظر ده اخد سنتين فى المحاكم وكل ده والنفقه بتتراكم عليه وكل ده على أمل ان المبلغ يتعدل بما يناسب دخله
دلوقتى طبعا هو عليه فرق النفقه المهول اللى اتحسب عليه بالاضافه لمتجمد النفقه عن الفتره اللى ما دفعهاش
طبعا هو عرض عليها الف عرض للصلح او حتى انه ياخد الطفل لكنها رفضت والمحامى بتاعها هو اللى عرفه هيه رفضه ليه - بمنتهى البساطه لأنها بتصرف من بنك ناصر وبالظبط من لسان المحامى ان الطفل ده هو البيضة اللى هاتبيضلها الدهب - وفعلا هيه بتتفنن انها تقلب صاحبى فى الفلوس
لغاية لما اكتشف ان الهانم متجوزه من وراه من غير ما تعلنه أو تعرفه

السؤال بقى
1- هل فعلا قانونيا كان يجب عليها اعلانه بزواجها؟
2- هل يوجد فى القانون ما يفيد بأسقاط نفقة المسكن ونفقة مقابل الحضانة فى حالة زواج الام؟
3- فى حالة وجود رقم 2 هل يمكن اسقاط متجمد النفقه الرهيب اللى على صاحبى وبالمناسبه هما رافعين عليه تقريبا 4 قواضى متجمد نفقه؟
4- بنك ناصر المفروض انه يعمل ايه فى المرحله ديه مع العلم انه حتى هذه اللحظه لما يخاطب صديقى؟
5- دعوى الضم فى حالة وجود والدتها الكبيره فى السن هل تكون رابحه - خاصة ان والدة صديقى صغيرة فى السن وصحيا احسن بكثير من أم زوجته السابقة

لو حد عنده اى حاجة ممكن صاحبى ده يعملها ياريت يقول خاصة انه داخل على جلسات النطق بالحكم فى الحبس وفعلا معهوش ولا جنيه تانى يدفعه وفى طريقه للحبس
اعتذر لو ده مش المكان الصحيح للموضوع لكن انا ملقتش مكان مناسب اكتر من هنا ةاعتذر على الاطاله

**msobhy** · 28-02-2012 07:07 AM

طيب رد واحد :(

**أحمد كمال** · 28-02-2012 09:18 AM

1- هل فعلا قانونيا كان يجب عليها اعلانه بزواجها؟

لا

2- هل يوجد فى القانون ما يفيد بأسقاط نفقة المسكن ونفقة مقابل الحضانة فى حالة زواج الام؟

لا لانهم من حق الاطفال بس بيتغير القابض ليهم من المطلقة لأمها

3- فى حالة وجود رقم 2 هل يمكن اسقاط متجمد النفقه الرهيب اللى على صاحبى وبالمناسبه هما رافعين عليه تقريبا 4 قواضى متجمد نفقه؟

لا مالهاش دعوة

5- دعوى الضم فى حالة وجود والدتها الكبيره فى السن هل تكون رابحه - خاصة ان والدة صديقى صغيرة فى السن وصحيا احسن بكثير من أم زوجته السابقة

ممكن ...... و ممكن يحاول يثبت ان العيال مع امهم مش جدتهم في الواقع

**msobhy** · 28-02-2012 09:23 AM

استاذ احمد - الف شكر لرد سعادتك - فى انتظار باقى ردود الاعضاء

**shaddadfalcon1** · 28-02-2012 09:26 AM

لا حول ولا قوة الا بالله
هو في ستات كده

**أحمد كمال** · 28-02-2012 09:33 AM

المشاركة الأصلية كتبت بواسطة shaddadfalcon1

لا حول ولا قوة الا بالله
هو في ستات كده

فيه اوسخ من كده ..... لسه صديق امبارح بيحكي لي عن صديق ليه ..... جالي استبحس و الله من الحكاية

محتاج اخد رايك فى الموضوع ده .....
صحبى شغال معايا وهو قريب منى جدا ..... الموضوع ده من رمضان .....
قعد معايا و حكالى انوا اتجوز فى يوليو الماضى قبل رمضان ب 20 يوم .... فى تالت يوم من زواجه قال لزوجته انشاء الله فى رمضان نعزم بابا و ماما يوم عندى فى البيت و نقضى يوم عائلى جميل .... و كانت البدايه ان مراته قالتلوا انت مش اخدنى خدامه علشان اخدم اهلك وقف فى المطبخ طول اليوم ... انا بنت ناس و حرام عليك ... افرض كنت حامل ممكن الجنين يسقط من وقفه المطبخ ..... اللى طلع عليه انوا بصلها و سكت و مكلمش من صدمه ردها .... بس كان مضايق جدا و قال يمكن يكون فعلا معاها حق .... و كانت اول مره فى حياته يسأل زوجته على حاجه و يكون ده ردها ....
بعدها بأسبوع كان عندوا مشكله فى سخان الغاز .... و هوه مابيفهمش فيه .... قام كلم اهله علشان حد يجى يصلحه .... والده قالوا انا هاكلملك صيانكوا يبعتوا حد يصلحوا .... جه الراجل تانى يوم و اخوه جه وقف معاه فى بيتوا .... بعد مالراجل مشى عزم على اخوه يقعد يشرب معاه عصير .... مراتوا مطلعتش تسلم على اخوه ... دخل يندهلها لاقها بتكلم امها فى التليفون و الغضب على وشها .... اخدها و جت سلمت على اخوه وخلص الموضوع ... بعدها بيومين زار اهلها و كان معزوم على الغداء .... فوجئ ان امها بتلومه على اخوه و ايه اللى جابوا البيت فى التوقيت ده .... قالهم البيت بيتى وده اخويا و انتوا ايه مشكلتكوا مش فاهم ..... عدت و مرضاش يكبر الموضوع .....
جه فى رمضان .... والدته بعتتلوا الفطار مع اخوه الصغير قبل المغرب بنص ساعه .... عزم على اخوه ان يقعد يفطر معاهم .... مراتوا قالتلوا افطر انت و اخوك لوحدكوا انا مش هافطر معاكوا و سبتوا ودخلت غرفتها و سبتوا يحضر الفطار لوحده و هوه مش عارف يعمل ايه و يقول ايه لى اخوه الصغير ... و لما اخوه سألوا فين مراتك قالوا دى تعبانه و مش هاتقدر تفطر ....
تانى يوم فى رمضان ... كان معزوم عند اهل مراتوا ... والدته اتصلت بيه و قالتلوا ادينى حماتك اسلم عليها .... قالتلها انت ليه تاخدوا بنتى عندكوا و تغصبوها انها تجيلكوا .... ردت عليها و قالت دى جيه مع جوزها فى بيت ابوه و ايه المشكله .... وحصل مشكله وعدت ....
سافر و رجع الشغل فى رمضان قلتلوا مبروك على الجواز .... قالى الله يلعن ابو الجواز والسواد اللى شفتوا ..... الصراحه بعد ماحكالى انا سكت و مردتش لأن مكنتش عايز ارد رد يكون سبب فى زياده الضغط عليه ....
بعد شهر يعنى اقل من شهرين من جوازه جالى يقولى انا طلقت ..... فكرتوا بيهزر او بيهوش مراتوا .... طلع معاه حق .... ليه .... قالى يرضيك تروح تاخد كل حاجات بيتى من خزين البيت زى السكر و الزيت و الرز و تشيلوا من غير ماتعرفنى .... قلتلوا لأ مايرضيش حد حتى لو هيا هاترميه فى الشارع على الاقل تعرفك ..... قالى يرضيك تروح تشتغل من غير ماتقولى بعد ماسفرت باسبوع و انا ببعت ليها مصروفها و لا تقولى انها اشتغلت او عايزه تشتغل ... قولتلوا انت معاك حق انك تطلقها وربنا يعوض عليك ..... انت انسان طيب و راجل و مافيش راجل يرضى بكده ....
امبارح قالى اهلها عايزين يرجعوها تانى و يصلحوا بينهم بس هوه قالى الموضوع منتهى و انا معنديش استعداد ارجع للزباله دى تانى ...... ادينى رأيك ....

**msobhy** · 28-02-2012 02:11 PM

مع احترامى ليك يا استاذ احمد قصة صاحبى ابشع بمرااااااااااااااااااحل
أولا الحق يقال البنت وانا اعرفها شخصيا محترمه جدا لكن أمها فعلا ليها حساب عظيم يوم الدين
بعد ما صاحبى اتجوز سافر يقضى شهر العسل ولما رجع حماته كانت بتصيف وأول لما رجعت حماته فعلا الموضوع بقى زباااااااااااااااااااااال ه
اجبارى البنت كل يوم لازم تحكى لها ايه اللى حصل وكلمت والدة صاحبى ولا لأ - وزارتها ولا لأ
طبعا بداية الانهيار انها كانت بتتغدا عند حماتها والهانم رفضت تماما انها تعمل اى حاجه بحجة انها عروسه
وأول لما صاحبى راح عند حماته أول كلمه قالتها له على الباب قبل ما يدخل - هو انتوا واخدين بنتى خدامه
المهم بعدها على طول دخل رمضان وحماته عزمته على الفطار وهو رفض بشكل مؤدب وقال لمراته قولى لأهلك انى سافرت فجأه لغاية لما الامور تهدئ
المهم لما راح لحماته بالليل على السحور علشان ياخد مراته فوجئ ان مراته قالت لأمها الحوار كله وانه مكنش مسافر ولا حاجه وحماته بتديله على دماغه لغاية لما انفجر فيها وسيب البيت وقال لمراته هاتيجى معايا ولا هاتقعدى عند اهلك - وطبعا البنت لأنها مغلوب على امرها فضلت عند اهلها
بعدها بحوالى اسبوعين البنت كلمته علشان يرجعها البيت - أول لما رجعت صاحبى تعب والموقف ده كله حصل قدامى - المحترمه اللى كان متجوزها رفضت انها تروح مع جوزها المستشفى وأول لما نزل كلمت اهلها وجم البيت ومعاهم اتنين بلطجية علشان يا خدوا كل حاجه غصب
المهم ولعت الدنيا وولاد الحلال هدوا الدنيا شويه - تانى يوم اهلها جم واخدوا كل حاجة ممكن تأخذ من البيت
بعدها بدأت القواضى وصاحبى اكتشفانهم زورا فى القايمة وزودا دهب ب 20 أو 30 الف
بالاضافه للفضايح اللى كانوا بيتعمدوا يعملوها فى صاحبى فى شغله
صاحبى مع كل ده حاول اكثر من مره انه يرجعها لكن امها كانت دايما واقفه له
لغاية لما فى مره امها قالت له لو عايز مراتك ترجعلك وتشوف ابنك ونتنازل عن القواضى تبيع شقتك وتشترى شقه بأسم بنتى وتكتب لى (اللى هيه حماته) شيك ب 100.000 جنيه والشقه اللى تيجى لازم تكون جنب بيتى علشان بنتى تبقى تحت عينى وايقى كل يوم عندها
ايه رأيكم فى العالم الزبااااااااااااااااااااا اااااله ديه؟؟؟؟؟؟؟؟
وبالمناسبه هما مطلعين عين صاحبى لغاية النهارده مش عارف يشوف ابنه وكل اللى بيعملوه انهم بياخدوا منه فلوس وبس

**msobhy** · 28-02-2012 04:02 PM

استاذ يوسف كلام حضرتك صح - احب اوضح انه كان بيدفع لغاية الزياده اللى جت فى الاستئناف
حضرتك بتتكلم على الصلح
طيب لو قلت لحضرتك انه عرض عليهم الصلح بشتى الطرق وبرضو هيه رفضت أو امها رفضت

سؤال يا شباب بعد اذنكم
دلوقتى هيه بتاخد الفلوس من بنك ناصر - ايه اللى المفروض يتم دلوقتى مع البنك؟

الموضوع: استشاره قانونية - رجاء الرد للأهميه

LinkBack

أدوات الموضوع

عرض

استشاره قانونية - رجاء الرد للأهميه - انشر الموضوع فى :

-

-

-

-

-

-

المواضيع المتشابهه

السمسار قارفني - اتصرف معاه ازاي - رجاء الرد للأهميه

استشاره قانونية من اهل الخبرة.

ارجو الرد للأهميه

استفسار مهم جدا و ارجوا سرعة الرد للأهميه

طلب صغيييييربخصوص موتور رينو 9 موديل 85 أرجو الرد عليه للأهميه القصوى؟

الكلمات الدلالية لهذا الموضوع

المفضلات

المفضلات

ضوابط المشاركة