الموضوع: مشكلة مع إتصالات dsl و مش عارف أتصرف معاهم إزاي

المشاركة الأصلية كتبت بواسطة abo_lina

إزيكو يا شباب
الموضوع إني من شهر و نص تقريبا قررت أشترك في خدمة ال دي إس إل و بعد تفكير و مقارنة وقع إختياري على شركة إتصالات لسمعتها الجيدة >
كلمتهم و إتفقت معاهم إن هاييجي مندوب من عندهم للبيت يسلمني الراوتر و نمضي العقود و بالفعل جاء المندوب قبل ميعاده بيومين ! و معه الراوتر و مضيت العقد و و إستلمت الراوتر و دفعت مبلغ ٩٩ جنيه ~ كنت سعيد بأن الشركة سريعة و تم التعاقد قبل الميعاد بيومين و في المنزل ~ أكد لي المندوب أن الخدمة ستبدأ بعد يومين أو تلاتة من التعاقد >
مرت الأيام و كل يوم أجرب الراوتر و أشوف الخدمة وصلت و لا لأ ، و في اليوم الخامس تقريبا قررت أكلم خدمة العملاء أشوف إيه المشكلة و إيه سبب تأخر الخدمة ، إتصلت و إستفسرت و كانت المفاجأة التي تحملها لي المندوبة بتاعتهم على الهاتف قائلة بصوت يملأه الفرح : مبروك يا أفندم تم تفعيل الخدمة و أهلا بيك في إتصالات دي إس إل ، طبعا إستغربت و قلتلها بس لمبة الدي إس إل مش ثابتة و بتنور و تطفي ، طبعا إستمرت المحاولات ثم نصحتني أجرب أدخل السلك اللي جاي من البوكس للراوتر على طول و أتجاوز السبليتر لأن السبليتر قد يكون سبب المشكلة ( برغم إن السبليتر ده بتاعهم و كان جاي في علبة الراوتر )
جربت كلامها و لا حياة لمن تنادي و ما زالت لمبة ال دي إس إل بتنور و تطفي
المهم كلمتهم تاني المرة دي المندوب بتاعهم إقترح إني أقدم طلب عشان يجيلي البيت فني التركيب عشان يحل المشكلة و التكلفة ٧٥ جنيه ، وافقت على طول لرغبتي في حل المشكلة بسرعة و إحتياجي للإنترنت
بعد يومين جاء فني التركيب بالفعل و بعد قضاء تلات ساعات عندي في البيت ما بين طلوع و نزول و تشييك على البوكس و مكالمات بينه و بين أشخاص في السنترال ، بعد كل هذا إستمرت المشكلة و لكن هذه المرة إنقطعت حرارة الهاتف أيضا !! يعني أنا جبتهم يظبطولي ال دي إس إل بوظولي خط التليفون > طبعا مندوبهم ما كانش عارف يقول إيه و قعد يزعق مع ناس في السنترال على الموبايل ، ثم إستأذن يمشي مع وعد إنهم هايتابعوا المشكلة مع السنترال >> طبعا أنا كنت متنرفز و قلت للمندوب إن دي خدمة سيئة و مش ممكن إن بقى عندي لا نت و لا تليفون و مادفعتش ال ٧٥ جنيه بتوع فني التركيب و صراحة هو مطلبهمش >>
على المغرب كده كلمتهم و حكيتلهم القصة و كان رد مندوبهم إن الفني قدم تقريره و قدم شكوى في السنترال و إنهم بصدد حل المشكلة لكن هاستنى ليوم الأحد لحل المشكلة لأن اليوم ده كان خميس ...و جمعة و سبت أجازة >> يعني خميس و جمعة و سبت بدون نت أو تليفون >>
يوم الأحد لقيت التليفون بيرن قلت كويس الحرارة جت عقبال النت رفعت السماعة لقيت واحد بيقولي (جرب الراوتر كده) طبعا من لهجته و طريقة كلامه عرفت إنه مش مندوب خدمة عملاء و إنما فني (طبعا إستغربت إن شركة زي إتصالات بتخلي فنيين تكلم العملاء و ليس مندوبي خدمة العملاء ~ بس كله يهون المهم النت ييجي )، قلت له حاضر و وضعت الراوتر في الكهرباء و شغلته و كالعادة لمبة ال دي إس إل بتنور و تطفي ، طبعا الأخ قالي إنهم مظبطين كل حاجة عندهم و المشكلة عندي و إقترح عليا أكلم ( ريس المنطقة ) و أحكيله المشكلة طبعا أنا حسيت إني بكلم واحد عامل شبكة و هايديني وصلة من عنده مش شركة محترمة ~ المهم قلتله هو حضرتك تبع إيه يعني و إسمك إيه قالي إن إسمه محمد علي تقريبا و شغال في إتصالات قطاع الدعم العام تقريبا ~ المهم الكلام بتاعه و إني أدور على الأخ ريس المنطقة ده حسيت إنه غير مقنع فقلت أكلم أنا خدمة العملاء ( مع إن هم اللي مفروض يكلموني مش يسيبو فني يكلمني )
كلمتهم طبعا مندوبهم إستغرب من موضوع ريس المنطقة ده و قالي إن قدامه لسه مافيش جديد و إني أنتظر المشكلة تتحل عن طريق المصرية للإتصالات و هم اللي هايتابعوا معاهم >
الكلام ده كان أول إمبارح الصبح ، و طبعا أنا مازلت مستني و بقيت بقرف لما أفكر أكلمهم تاني و أقعد أحكي المشكلة من أول و جديد كل شوية ، و مش عارف هافضل منتظرهم كده لإمتى
بجد أنا أملي خاب جدا في شركة إتصالات و مش عارف مطلوب مني إيه كعميل عشان يدخل ليا خدمة دي إس إل ،
يا ريت يا جماعة تشوروا عليا إيه الإجراء اللي ممكن أخده في قضية زي دي لأني مش عارف أروح لمين أو أعمل إيه ، و زهقت من ال يو إس بي مودم >>>
هل يعقل إن ده مستوى خدمة عند شركة مرموقة زي إتصالات >> ده كده الشركات الحكومية رحمة >
أنا حبيت أشارك معاكو تجربتي و منتظر إقتراحاتكم للي ممكن أعمله
لا إله إلا الله > أستغفرك ربي و أتوب إليك

أسف بس بصراحه كلمه محترمه خساره فيهم حاول تعرف من جيرانك مركبين تبع اي شركه وتتعامل معاهم بدل شركه استهبالات

اتصالات تتميز باغبى خدمة عملا في تاريخ البشرية

صاحبي اتصل بيهم قدامي 4 مرات ورا بعض بيسالهم على الفاتورة و والله ولا مرة الفاتورة طلعت نفس الرقم


صاحبي التاني بيكلمهم في مشكلة في الفاتورة قالولو لازم صاحب الخط ال يكلمنا يقولهم انا ابنه مفيش لغاية ما زهق شتم البت و قالها انتي غبية و قفل و اتصل تاني و طلب نفس البت و قالها انه ابو نفسه و خلاها تطلعه البيانات


اتصل و اطلب انك تكنسل الخط و بعديها بيومين اتصل اسال على ال cancellation number هيقولولك مطلعش اقفل و اتصل بجهاز تنظيم الاتصالات قولهم مش راضيين يطلعو الكانسل و بعديها بيوم او اتنين هتلاقيهم كلموك و قالولك الرقم

غريبه جدا..انا كنت اتصالات وكانوا ممتازين جدا بجد ومحصلش معايا كل ده!!!وكان اجمل مافيهم خدمة العملاء وبالذات التقنيين لو فى مشكله فى الراوتر او الخط عموما
هو ممكن يكون فى حاجه فى السنترال..انما هما كخدمة كانوا ممتازين
انا الان دى لينك وممتازين جدا بالنسبالى
رايي انك تنزل فرع من فروع اتصالات وتعمل مشكله هناك ومتمشيش الا لما تاخد حل عملى يا الا تفسخ العقد وانت واقف..وخللى بالك وجودك فى الفرع افضل لانك بتزعق قدام عملاء داخلين خارجين فده يخليهم يتصرفوا بسرعة عكس التليفون