الموضوع: منتجات اكواثيرم للسباكه

المشاركة الأصلية كتبت بواسطة khaloooda

هو فيه بس معلومة عن اكواثيرم او المواسير البلاستيك عموما
عرفتها مع الاسففففففففف بعد ما ركبت
هي ان حضرتك لو هتركب سخان كهرباء والترموستات بتاع السخان باظ وده وارد جدا وبيحصل كتير
درجة حرارة المياه هتعلي اوي - تزيد عن 100
وفي الحالة دي هتؤدي الي حدوث ما يشبه انتفاخ في المواسير البلاستيك اللي لا تحتمل الدرجة دي من الحرارة بما فيها اكواثيرم الالماني
ومع الوقت ممكن اللحام يفك ويحصل تسريب
ولان المواسير جوه الحيطة
فحضرتك مش هتشوف التسريب غير بعد ما يتحول الي كااااارثة

ملحوظة : المعلومة دي قالها لي مندوب من شركة اكواثيرم وهو اللي نصحني بعدم تركيب سخان كهرباء مع العلم اني جايب اكوا ثيرم الماني
وكنت متخيل ان لو جهنم الحمرا مش هتأثر فيه

بصراحة انا غير مقتنع بكلام هذا المندوب بالمره من كلام سباك فاهم اسمه السيد وحيد مشرف على الاعمال الصحيه فى موقع مستشارك للبناء هذا ما قاله حرفيا بخصوص هذا الموضوع والتجربه خير برهان على ذلك :

ومواسيرالبولى بروبلين تستخدم للحار والبارد بدون اى مشاكل ان شاء الله وجربت ذلك بنفسى اول نزوله السوق فوضعت قطعة ماسورة ملحوم بها كوع فى ماء يغلى لدقائق عديدة ولم يحدث اى تغييرات ولم يفك لحام الكوع

المشاركة الأصلية كتبت بواسطة tza

بصراحة انا غير مقتنع بكلام هذا المندوب بالمره من كلام سباك فاهم اسمه السيد وحيد مشرف على الاعمال الصحيه فى موقع مستشارك للبناء هذا ما قاله حرفيا بخصوص هذا الموضوع والتجربه خير برهان على ذلك :

الكلام اللي اتقالي يا جماعة كان من اكتر من شخص جميعهم متخصصين
وبصراحة انا ندمت جدااااااااا علي استخدام الاكواثيرم او المواسير البلاستيك عموما
وعلي فكرة الكلام ده مش يبان من كام دقيقة احط فيهم الماسورة في ميه بتغلي زي ما بتقول حضرتك
اللي قالهولي المندوب بتاع اكواثيرم واللي قاله كمان تاجر امين بيبيع المواسير دي من زمان
بس مع الاسف قالهولي بعد ما ركبت
ان المسألة بتكون مع الوقت
مش من شهر ولا سنة
ده مع الوقت بيحصل ان المواسير بتتنفخ شوية ويبتدي اللحام يتأثر

عموما يا جماعة انا حبيت افيد مش اكتر
هي البلاستيك لبها مميزاتها مفيش كلام
ده غير انك مش بسهولة تلاقي سباك بشتغل حديد دلوقتي
اغلبه رمي عدة الحديد واشتري عدة البلاستيك وكمان الصبيان اللي معاه
بتوع الحديد غير بتوع البلاستيك
الصنايعي بيستسهل

معلومة اخيرة عرفتها برضه بالنسبة للتكلفة
ممكن تسمع من تاجر ان متر البلاستيك ارخص من الحديد ويحاول بقنعك بانه اوفر
هو ده صحيح ومش صحيح في نفس الوقت
لان متر المواسير البلاستيك صحيح ارخص لكن ارتفاع تكلفتها عن الحديد بيكون في الكوع والمتلوت وغيره من الوصلات اللي بيكون سعرها في البلاستيك وخاصة الاكواثيرم مبالغ فيه
وفي الحديد ارخص كتير

يارب اكون افدت حضرتك من غير ما احيرك

لو عاوز نصيحتي : خليك في الحديد
طول عمرنا مجربينه وعايشين عليه ومشتكاش
اركب براحتي سخان غاز كهرباء اللي عاوزه من غير ما اخاف
وبرضه سعره ارخص

المشاركة الأصلية كتبت بواسطة khaloooda

لو عاوز نصيحتي : خليك في الحديد
طول عمرنا مجربينه وعايشين عليه ومشتكاش
اركب براحتي سخان غاز كهرباء اللي عاوزه من غير ما اخاف
وبرضه سعره ارخص

متنساش برضو إن الحديد بيصدي جامد .. والقطر الداخلي للماسورة الحديد بيقل نتيجة لتراكم الصدا فوق الصدا.
ولو خلعت ماسورة حديد شغالة وبصيت جواها هتتصدم.
وعلى فكرة المواسير الحديد بتعمل برومة وتتكسر (في الغالب عند التيهات والكيعان).

خليك في البولي .. ومش أي بولي .. هات أنضف شيء.
لإنه هيتحمل ضغط أعلى .. ومبيتفاعلش مع الميه .. ويتحمل درجات حرارة أعلى.
لو عاوز نصيحتي: حاجتين في السباكة متستهونش بيهم (نوع المواسير وفلتر الميه)
شوف الموضوع ده:
http://www.nilemotors.net/Nile/196583-a.html

السلام عليكم ورحمه الله و بركاته .... انا عايز اسعار مواسير الصرف وملحقاتها وايضا مواسير المياه اكواثيرم ... مع الشكر
مهندس/ احمد سالم 01115668887

اكواثيرم اغلى وشركه مندوبيها زى الزفت وكمان واحد اسمه عمرو :) مفروض حسب ما قال مدير خدمه العملاء
حاجه تقرف الصراحه والسباك قالى بتلككوا علشان ميدوكش الضمان!!!! من اللى شفته من الموظفين اللى موظفين الحكومه افضل منهم بكتير ومن بتاع خدمه العملاء بالمقارنه بشركه باننجر واللى عملوه مع صديق ليا وانهم لقوا شغل السباك بايظ كله قاموا غيروه على حسابهم وكسبوا سمعه وسباك وعميل بيخلينى اقوول اياكم و اكواثيرم خاااااااااااااااااالص والباننجر ممتازه ومصرى- منه لله اللى قالى اكواثيرم واحسن وانا مرضتش استخسر فى السباكه ولما سألت ناس كتيييييييير قالولى مفيش بنهم فرق وده المانى استيراد وبتاننجر المانى لكن بيصنع هنا ومتجرب وكل الناس بتشكر فيه _ انا بقالى اسبوعين عايز اخلص الكبس وقررت اكلم باننجر ولو ياخدوا فلوس ويكبسوا ويطمنونى ولو فى لحام عايز يتغير هغيره منهم

السلام عليكم ورحمة الله وبركاته
انا هنا مش موظف في اكوا ثيرم
انا هنا ناصح ليكم
الناس اللي بتتكلم عن الاكوا ثيرم او اي منتج بولي بروبلين انه اسوأ مايكون
احب اقول لحضراتكم
المانيا كلها بتشتغل بالاكوا ثيرم ومعظم مباني القوات المسلحه والداخليه والقصور الرئاسيه بتركب الاكوا ثيرم لانه الماني صرف بالبلدي ( من بابه ) مافيش ايد مصريه لمسته غير السباك
ثانيا الناس الللي بتتكلم عن غير خبره
موضوع السخان بسيط وسهل جدا
انت حضرتك داخل تاخد دش - تشغل السخان قبلها بنص ساعه ولما تدخل الحمام نزل الزرار او شيل الفيشه
توفير رللكهربا - امان لحضرتك لو الترموستات باظت مش هايفصل زي الاساتذه الافاضل قالوا انه هايبوظ القطعه بسن
لان درجة الحراره عدت درجة الغليان والسائل اصبح غاز
طبيعي اي قطع نحاس تسخن لدرجه عاليه هاتسيح البولي ( البلاستيك ) وهاتخرج منه
**الحديد كذلك
ازاي لان الحديد مش هايسيح بس هايبوظ السخان او السخن هايدخل ع البارد هايصبح عندك الخطين سخن
واللي بيقول من عنده كلام غييييير صحيح
ان استاذ عمرو والمعامله من المندوبين زي الرزفت
استاذ عمرو موظف بيوزع المندوبين والمندوبين دول واخدين اوامر عدم التهاون مع السباك على حساب العميل والا الاقصاء الفوري من الشركه
ويكفي ان المندوب بيجي لحضرتك من غير مايكلفك مليم واحد خدمه مجانيه
بيطلع روحه وعينه وبيطفح الدم وهو مش منتظر من حضرتك حاجه
وفي الاخر المندوب سيء وبشع والمنتج وحش وبيشفط العميل
والمندوب اللي جاي لحضرتك جاي عشان يطمنك على فلوسك وامانك
ازاي ؟؟؟
اقول لحضرتك - لااااازم اللحامات تكون مطابقة للمواصفات وده عشان ماتجبش مياه بعدين وتبوظلك الدنيا
السباكين مبيحبوش يشتغلوا في الاكوا ثيرم وبيفضلوا المنتجات الاخرى اسباب مقدرش اقول عليها لان الامانه الاخلاقيه اني لا اعيب في منتج منافس
اللي اقدر اقوله والله والله والله الاكوا ثيرم انا نصحت اختي انها تركبه عندها في الشقه
وبروح ابراج وتجمعات وجامعات خاصه مركبه الاكواثيرم
يا جماعة الخير من قال لا اعلم فقد افتى
الاكوا ثيرم حاصله على شهادات جوده عالميه
الاكوا ثيرم الرائد الاول على مستوى العالم
انا ماليش دعوه بسباك ليه مصالح شخصيه معندوش ضمير الاهم عنده مصلحته عن مصلحة العميل
\والله والله والله بيلطعونا بالساعه والساعه الا ربع في الشمس عشان عارفين اننا بنزهقهم في عيشتهم عشان حضرتك تبقى مطمن من المنتج اللي راكب واي حد ليه اي استفسار انا تحت امره
والله امانه وشهاده اتحاسب عليها يوم الدين
ان انا مالي مصلحه في الكلام ده الا ان انا
مبحبش حد يفتي ويتكلم وهو مش فاهم
ومش عاوز اقول اسباب تطفيشكم من المنتج بواسطة السباك لاني مش هانزل لمستوى عرضه الرخيص للمنتجات الاخرى وده عشان المنافسه الشريفه
اخر حاجه هاقولها
المانيا مش مستنيه مصر هيه اللي تشغل منتجها
المنتج مسوق نفسه على مستوى العالم من غير دعايه ولا اعلان