الموضوع: باركولي يا جماعة ! بقيت من ملاك المارد الكوري

السلام عليكم ورحمة الله وبركاته

بقالي مدة طوووويلة بسمع اساطير وحكايات عن المارد الكوري واللى بيعمله في اغلب العربيات في فئة 1600 ! اكنه وحش كاسر بيكسر اي حاجة قدامه <<< بس لو راجل وقفه وهي دي مشكلته الازلية انه بيجري بس مش بيقف

وكان نفسي بصراحة اركب العربية دي مع واحد سويق واتفرج على الماتور ده بيجري ازاي وبيعمل ايه ؟ ؟

نعم انها الفيرنا

وبقدرة قادر مرة واحدة كدة هووووب بقيت من ملاك المارد الكوري وبقى فيه وحش تحت تصرفي
<<< اسكت دي عربية الشركة مش عربيتك

هي فعلا عربية الشركة وانا ماليش غير الياريس حبيبتي

لكنها بقت تحت تصرفي ومعايا بشكل دائم

العربية فيرنا 1500 مانويل <<< كان نفسي بصراحة تكون 1600 بس النصيب

العربية موديل 2007 والمشكلة انها عاملة 150 الف كيلو ! ! لكن بصراحة حالة العربية من برة ومن جوة زيرو ماتحسش انها عاملة عدد الكيلو متر ده ابدا الا لما تبص على العداد !

وفي الشركة قالولي ان اتعملها كل صيانتها في التوكيل وانها لسه راجعة من التوكيل مباشرة قبل ماستلمها ! ! لكن العربية صوت الماتور عالي جدا ولما سالت قالولي محتاجة تغيير زيت الماتور طب منين لسه راجعة من التوكيل ومنين محتاجة تغيير زيت ماتور ؟ ؟

انا مش هقدر اقول انطباعي او رأيي في العربية بشكل عام لاني يدوب لسه مستلمها ومارحتش بيها الا مشوار واحد فقط من الهرم للدقي <<< وياريتني مارحت

العربية بطلت مني يجي 70 الف مرة ! وكلاكسات واخدت شتايم لما قلت يابس

<<< منا بقالي خمس سنين بسوق اتوماتيك ؟ نسيت المانويل !

لدرجة انها بطلت مني في حتة مطلع شوية وحلفت انها مش عايزة تتحرك

ادور العربية اسيب الدربايش تفصل ! ياسيتدي يهديكي يرضيكي انا موقف الشارع كله ورايا وهيا مافيش فايدة حالفة ماتمشي ! والكلاكسات طبعا مش هقولكو ! واللى طالع من العربية ياعم ادي الاول ! واللى يقولي ياعم سيب الدبرياش براحة ! لحد ماجيه واحد وقالي انزل بعد اذنك قلتله معلش بقى اخوك لسه جديد ركنلي العربية على جمب والشارع كله مشي وكل واحد طبعا نظرات زي الفل وانا بقول في سيري استنو عليا بس هتعود عليها وهاجي ابهدلكو كلكو

هو مشكلتي حاليا بس انا عشان بقالي مدة طويلة مش بسوق مانويل او ماسوقتش مانويل ده الا في الاول خالص لما جيت اتعلم سواقة بعدها سوقت اتوماتيك لمدة طويلة

فالطلعة عملالي مشكلة حبتين تلاتة ! بعد كدة الامور بتبقى كويسة

فيه شوية ملاحظات كدة ضايقتني من العربية ومش عارف بصراحة هل ده طبيعي في الفيرنا ولا عشان عاملة 150 الف كيلو وفيه حجات محتاجة تغيير ؟ خاصة بعد ماقالي رجعت من التوكيل وعايزة تغيير زيت بدات اشك في الموضوع فانا هستفسر من حضراتكم بعد إذنكم طبعا بما اني بقيت واحد منكم

1- اول حاجة ضايقتني من العربية هي المرايات ! المرايات مش بتكشف الطريق بشكل كويس يعني في الياريس المرايا بتبقى جايبلي الطريق كويس اوي بعكس في الفيرنا حسيت اني يدوبك ببقى شايف العربية اللى على بعد حارة واحدة مني ! ابعد من كدة مش بتجيب ؟ ؟ ودي حاجة خلتني مش عارف اركز في السواقة وملخوم ! هل ده الطبيعي بتاع مرايا الفيرنا ؟ ولا المرايا دي مش اصلية وملعوب فيها ؟

2- الدركسيون يعتبر نوعا ماتقيل شوية ! هو مايعتبرش تقيل بصراحة بس مقارنة بدركسيون الياريس تقيل على الرغم اني في الياريس مجنط وحاطط كاوتش عريض والدركسيون بعد الجنط تقل شوية عن الاول بس برضوا اخف وانعم من فيرنا ! ! فهل عشان الياريس باور كهرباء ؟ بس انا برضوا كنت بسمع كتير عن ان الفيرنا الدركسيون بتاعها ناعم وخفيف جدا ؟ ؟

3- الكلاكس ! ! صعب اوي بصراحة هو لازم اضغط على كلمة هيونداي عشان تكلكس ؟ ؟ ايه الشلل ده ؟ انا ببقى عايز اكلكس وبدوس مافيش اكتشفت اني لازم اضغط على كلمة هيونداي ؟ ده الطبيعي برضوا ؟ ولو الطبيعي هل ليها حل ؟

4- بحكم ان العربية عاملة 150 الف كيلو المفروض اشيك على ايه عشان ابقى مطمن ؟ وايه احسن زيت ممكن احطه ؟ انا بفكر في ليكوي مولي او فولفين ؟

5- الدبرياش نوعا ما سعات كدة بحسه بيتقل مع الغيارات ! مش عارف ليه

6- العربية بتعمل صوت غريب كدة وانا برجع لورا خاصا وانا بركن ؟

فيه شوية ملاحظات تانية كانت على بالي وانا سايق بس بصراحة نسيتها

لكن فيه حجات برضوا ضايقتني من العربية غير موضوع المرايات والكلاكس ! الفتيس المشاوير بتاعته قصيرة وبتلخبط ! يمكن عشان انا في الاول لسه ومش متعود عليها

يعني مرة بدل مادي التاني اديت الرابع ! خايف الواحد بدل مايدي الرابع يدي ال R هتبقى كارثة

دي الملاحظات اللى على بالي حاليا واكيد هيبقى فيه ملاحظات تانية هكتشفها مع كتر المشاوير والتعود على العربية

لكن انا ملاحظ ان اغلبها ملاحظات بسبب بس ان العربية جديدة عليا او الواحد غصب عنه بيقارنها بالعربية اللى كان سايقها قبل كدة فحاسس باختلاف شكلا وموضوعا في كل حاجة !

بس مع التعود الامور دي هتبقى احسن كتير ان شاء الله

وانا مبسوط وسعيد اني بقيت احد افراد قسم هيونداي ونشوفكم على خير في اقرب مقابلة ان شاء الله