الموضوع: مقارنة بين الكورولا والبيجو 308 sw

السلام عليكم ورحمة الله وبركاته
بعد متابعة متواصلة لكل الماركات والآراء عنها فى المنتدى, وفى الحقيقة فيه ناس كتير الله يبارك لهم دايما بيشاركوا بآراء قيمة ومفيدة, حصرت اختياراتى بالنسبة لشراء سيارة جديدة فى التويوتا الكورولا الفول أوبشن والبيجو 308 sw الفول أوبشن لاعتبارات خاصة. أنا أدرك أنه فى حدود هذا السعر (حوالى 155 ألف) يوجد اختيارات أخرى جيدة ولكن إختيارى هذا نتيجة أنى فوق الخمسين فى السن يعنى مايهمنيش زمن التسارع ولا الثبات على سرعة 170 مثلا ولا الشكل الجديد ولا الإكسسوارات ولا أنوى بيع السيارة واستبدالها قريبا. يهمنى أساسا إن أعطالها تكون قليلة وإنها تكون مريحة فى القيادة وفى الصالون الداخلى وإنها تكون معمرة وإنها تكون مريحة وآمنة فى المسافات الطويلة لأنى باحب أروح الغردقة والساحل الشمالى كتير. ممكن أزود عشرين ألف واجيب الفانتازيا لو كانت تفرق كتير فى مزاياها ولو إنى خايف من صيانتها لأن فيه ناس بتقول إن فيها كهربا والكترونيات صعب التعامل معها بواسطة التوكيل أو الورش

السلام عليكم ورحمة الله وبركاته
متشكر جدا لاهتمام الأخوة اللى تعبوا نفسهم عشان يساعدونى فى الاختيار رغم إن حيرتى واختياراتى رجعت زادت تانى. غالبا سأنتظر معرض الأهرام فى آخر مارس واتفرج هناك واقارن واقرر بإذن الله. ياريت لو أعضاء المنتدى يتفقوا يتقابلوا هناك