الموضوع: أخويا عمل حادثة

يوم الأتنين اللي فات بالليل كان راجع من درسه الساعة 7:30 بالليل
كان راكب تاكسي عالدائري وجت عربية نقل شاطت العربية من ورا
فين النقل فين التاكسي فين سواق التاكسي ! .... انا معرفش لغاية دلوقتي
في ناس ولاد حلال خدوه لعيادة وأتصلوا بينا
كنت عنده في ربع ساعة والله ماعرف وصلت أزاي
لقينا الدكتور عامله أشعة وطلع في كسر في رجله الشمال تحت صابونة الرجل في العضمتين
وشروخ في الحوض وكدمات في باقي الجسم وجرح في مكان كسر الرجل
الدكتور الله يكرمه نضفله الجرح وربطله رجله برباط ضاغط
كل ده قبل ما أوصله
أول ما وصلتله قالي ودوه مستشفي الهلال في رمسيس ... ده أحسن مستشفي عظام
خدته في العربية وطلعت عالمستشفي
طبعا انا مش أسعاف فكان لازم أستخدم قلة أدب عشان الناس الواطية ومينفعش أستحمل حد في الوقت ده وهو عمال يصرخ ورا

وصلت المستشفي ودخلناه عشان يعمل الأشعات من تاني
هقول علي تقييمي للمستشفي من دلوقتي
المستشفي مش وحشة كأمكانيات
بس نظام غبي جدااااااااااا
هو داخل المستشفي الساعة 9
لغاية 11 بيعملوا في أشعات وشوية يسيبوه ويعملوا حجة تانية وأكتر حاجة ضايقتني
كل شوية روح أدفع الوصل ده عشان نخرجلك الحقنة كذا من هنا
20 في 30 في 50 ... 500 جنيه أتدفعوا علي 20 مرة
وأخويا يفضل مستني علي ما أروح أدفع وأجي
انا وبابا وماما كنا عمالين بنلف في المستشفي
لو حد عامل حادثة ومعهوش فلوس مش هيعبروه
لو أتأخرت في الدفع ... سواء بقي في طابور سواء أي حاجةى .... هيتأخروا في العلاج
حركة واطية

أكمل بقي
كان في خلع في الركبة فوق الكسر
لازم يرضوا الخلع ده
انا كل اللي شفته انهم راحوا ماسكين رجله وشادينها ... انا مش عارف عملوا كدة أزاي وفي كسر كدة !
جبسوا رجله وقالوا في عمليتين ولازم يتحجز في المستشفي أسبوع
الكلام ده خلص 4 الفجر
روحت جبت هدوم وفلوس تاني ورجعت ... الوقت ده مكانش في بني أدم في الشارع
عمل العملية يوم الخميس الصبح
دخل عمليات الساعة 8 وخرج الساعة 2
عمل عملية واحده وقالوا التانية هنستني عليها عشان ممكن تلحم لوحدها
هو ركب شريحتين و 4 مسامير وجهاز غريب أول مرة أشوفه ... أسمه ilizarov
انا مش عايز أحط سورة ليه عشان محدش يتقرف .. اللي عايز يعرف يعمل search
هو حاجة زي تقويم السنان بس علي الرجل وواصل بالعضم مخترق اللحم !
يوم السبت كشفوا عيه قالوا في تحسن كبير في الحوض
يوم الحد الصبح كانت المفاجئة ... خروج !
الحمد لله
الدكتور الأستشاري مكانشمصدق ترتيب الأشعات بالأيام
الجهاز ده هيفضل متركب 3 شهور
طلبنا أسعاف أمبارح عشان ياخده ونروح البيت
من 12 ل 10 بالليل محدش عايز ييجي
بعد كتييييييييير ... كلما واحد معرفه خرج عربية أسعاف خاص وفي ربع ساعة كانوا وصلولنا
الحمد لله وصلنا البيت الساعة 12 بالليل أمبارح

مش هنسي أبدا وقفة الناس معايا والناس اللي جاتلي
الواحد مش غير أهله وحبايبه وأصحابه هيعيش دنيا وحشة
وبعتذر لو حد أتصل ومردتش عليه عشان الموبايل كان بايظ

الحمد لله علي كل حاجة

الف مليون سلامه ياباشا