الموضوع: "بوابة الأهرام" تنشر أسعار وكيفية توزيع السولار والبوتاجاز والبنزين بـ"الكارت الذكى"

ع اد اني شايف ان ده ممكن يأثر ع ناس بيستخدموا العربية كتييير
لكن في نفس الوقت اعتقد انها فكرة غير مباشرة لمواجهة الازمة المرورية و بالتالي ناس كتيير هتخف مشاويرها بالعربيات و هيركنوا و ياخدوا مواصلات و العربيات تقل في الشوارع شوية و في نفس الوقت مش هنلاقي السواقين الــ....اللي بيحرقوا و يجروا زي الميكروباصات و التاكسيات و هيحترموا نفسهم شوية و مش بعيد يبيعوا عربياتهم و يخفوا شوية من الشوارع و نرتاح منهم هههههههه
لكن في نفس الوقت اعتقد ان من المفترض ان يتم تجديد جميع وسائل المواصلات و تصل لكل منطقة بدون تقصير و اقصد المواصلات العامة مش الخاصة زي الميكروباصات
و المترو قايم بالواجب في وسط البلد لحد معرض الكتاب المهم بقي لسكان المدن الجديدة زي حالاتنا عايزين اكتر من خط يشتغل

و بالنسبة ليا مفيش اي مشاكل لأني نص الوقت بسيب العربية و اخدها مواصلات عشان ارتاح من قرف الشارع و السواقة و شايف ان العجلة أفضل صحيا و بيئيا و توفيريا هههههههه
و نسينا اهم حاجة ان الناس هيبطلوا يبصوا للرفاهية اوي و يجيبوا عربيات صغيرة موفرة في استهلاك البنزين او يجيبوا موتسيكلات زي ما حصل في السعودية لما البنزين سعره غلي كله جاب عربيات صغيرة و مشي بيها عادي
و هنلاقي ان حاجة العربيات رخصت طبعا لأن التجار ممكن ميشتغلوش اوي فبدل ما كانوا بيغلوا علينا الاسعار يدوهلنا بسعرها الطبيعي

بالنسبة الانابيب يا ريت يكون زي التموين بالكارت و يتسجل كل اسرة اخدت اد ايه و كل مستودع نزله اد ايه عشان ميحصلش الهبل اللي بنشوفه في المستودعات و اخيرا زي ما انتوا عارفين اللي حصل في مستودع انابيب عباس العقاد
اعتقد انبوبة - انبوبتين في الشهر لكل اسرة معندهاش غاز طبيعي كافية و هنقول في السنة الشخص ليه 20 تغييره مثلا يغيرها يغيرها في السنة يغيرها في شهر هو حر و يكون فيه عربيات لتوزيع الانابيب تتبع الشركة بخط ساخن مش الناس اللي بياخدوا الانبوبة بــ5 جنيه و يبعوها بــ 20 جنيه
و الحل الجذري للانابيب هو توصيل الغاز الطبيعي و نرتاح من الازمة ديه نهائي و ديه ممكن تخلص في كام شهر بس محتاجة ميزانية

و في نفس الوقت كل ده هيوفر فلوس كتيير بتروح في الهوا

يعني لو اتنفذت صح هتحقق حاجات كتيير جداااا

و لا ايه رأيكم و لا حد معترض ع كلامي :)